ޖަމާއަތް ހަދައިގެން މާރާމާރީ ހިންގި މީހަކު ބަންދުން ދޫކޮށްލައިފި
ބަންދުން ދޫކޮށްލިޔަސް އެއްވެސް އަމުރެއް އިސްތިއުނާފު ނުކުރާނެ ކަމަށް ތަހުޤީޤީ އޮފިސަރު ފަރާތުން ބުނެފައިވޭ
ކްރިމިނަލް ކޯޓު
ޖަމާއަތް ހަދައިގެން މާރާމާރީ ހިންގި މީހަކު ބަންދުން ދޫކޮށްލައިފިއެވެ.
29 ނޮވެމްބަރު 2023 ގައި ހިންގި މާރާމާރިއެއްގައި ހިމެނޭ މީހަކު ދޫކޮށްލުމުގެ އަމުރަކަށް އެދުނީ ފުލުހުންނެވެ. ބަންދުން ދޫކޮށްލާފައިވަނީ ކ. މާލެ، މ. ރަނިކަ، އަހުމަދު ޒިވާން ރަޝީދެވެ. އޭނާ ބަންދުން ދޫކޮށްލާފައިވަނީ ޝަރުތު ކުރުމަށްފަހުގައެވެ.
އޭނާ ބަންދުން ދޫކޮށްލަން އަމުރުކުރި ސަބަބުގެ ގޮތުގައި ބުނެފައިވަނީ މައްސަލައިގެ ވަށައިގެންވާ ކަންތައްތަކަށް ބަލާއިރު، ޖިނާއީ ބޮޑު މައްސަލައެއްކަމުގައި ނުވާތީއާއި، ހާދިސާ ހިނގިފަހުން ގިނަ ދުވަސްތަކެއް ވެފައިވާ އިރު، މި ހާދިސާއާ ގުޅޭ އިތުރު ކަމެއް އަދި ހެއްކަށް ނުފޫޒު ފޯރުވުމުގެ ކަމެއް މިހާތަނަށް ކޮށްފައިވާ ކަމަށް ފާހަގަ ކުރެވިފައި ނުވާތީ، އަދި އޭނާ ބަންދުން ދޫކުރި ނަމަވެސް އޭނާގެ ފުށުން މުޖްތަމައުގެ ސަލާމަތަށް ނުރައްކަލެއް ކުރިމަތިވެދާނެ ސަބަބެއް އޮތްކަމަށް ނުފެންނާތި ޝަތުރުކޮށް ބަންދުން ދޫކޮށްލުމަށެވެ.
މީގެ އިތުރުން 2023 ނޮވެމްބަރު 29 ގައި ހިނގި ހާދިސާއަކާ ގުޅިގެން އޭނާ ހައްޔަރުކޮށް، ހެތްކަށް ނުފޫޒު ފޯރުވަފާނެ ކަމަށް ބުނެ ބަންދު ކުރަން އެދުނު ނަމަވެސް، ހާދިސާގެ ފަހުން މިއަދާ ހަމައަށް އޭނާގެ ފުށުން ހެތްކަށް ނުފޫޒު ފޯރުވުމުގެ ގޮތުން އަމަލެއް ހިންގިކަން އެނގޭނެ ކަމެއް ފުލުހުން ބަޔަންކޮށްފައި ނުވާ ކަމަށެވެ. އަދި އެފަދަ ހެތްކެއް ހުށަހަޅާފައިނުވާތީ އެ އިހްތިމާލު އޮތްކަމަކަށް ނުބެލެވޭ ކަމަށް ވެސް ބުނެފައިވެއެވެ.
އަދި އިންޓެލިޖެންސް ރިޕޯޓުގައި މާރާމާރިއެއްގެ އަމަލުގައި އޭނާ ބައިވެރިވި ކަމަށް ބަޔާންކޮށްފައިވާ ކަމަށާއި، އަނިޔާ ލިބުނު 3 މީހުންގެ ބަޔާނުގައި ވެސް ބޮޑު އަނިޔާއެއް ނުވާތީ، ޑޮކްޓަރަށް ދައްކާފައި ނުވާކަމަށް ބަޔާންކޮށްފައިވެއެވެ. އަދި މި މައްސަލައިގައި އެއްވެސް ބަޔަކަށް ތުހުމަތުކޮށް ތަފްސީލީ ބަޔާނެއް ދިނުމަށް ދެކޮޅު ހަދާފައިވާކަން ބަޔާންތަކަށް ބެލުުމުން އެނގޭ ކަމަށް ބުނެފައިވެއެވެ.
މި މައްސަލައިގައި މިހާތަނަށް 10 މީހުން ހައްޔަރުކޮށްފައިވާކަމަށް ތަހުގީގީ އޮފިސަރު ބުނެފައިވާއިރު، މިހާރު ބަންދުގައި ހުރި އޭނާ އެކަނިއެވެ. އަދި ބަންދުން ދޫކޮށްލިޔަސް އެއްވެސް އަމުރެއް އިސްތިއުނާފު ނުކުރާނެ ކަމަށް ތަހުގީގީ އޮފިސަރުގެ ފަރާތުން ބުނެފައިވެއެވެ.
އަދި މިއާއެކު ވިކްޓިމް ކަމަށް ބެލެވޭ އަންހެން މީހާގެ ބަޔާނުގައި ވެސް އޭނާއަށް އިތުރު އެއްވެސް ނުރައްކަލެއް ނެތްކަމަށް ބަޔާންކޮށްފައިވެއެވެ. އަދި މުޅި މައްސަލައިގެ ހާދިސާއަށް ބަލާއިރު ތޫނު ހަތިޔާރެއް ނުވަތަ ނުރައްކާތެރި ހަތިޔާރެއް ނުހިމެނޭކަން ހުށަހެޅިފައިވާ ހެކިތަކުން އެނގޭކަމަށް ބުނެފައިވެއެވެ.
އަދި މުޅި މައްސަލައިގެ ވަށައިގެންވާ ކަންތައްތަކަށް ބަލާއިރު ޖިނާއީ ބޮޑު މައްސަލައެއްގެ ގޮތުގައި ފާހަގަ ނުކުރެވޭ ކަމަށް ވެސް ބަންދުން ދޫކޮށްލި އަމުރުގައި ބުނެފައިވެއެވެ.
