ދެން ބަލަން ތިބެވޭކަށް ނެތް - ރައީސް ޞާލިހު
އެމްޑީޕީ ސަރުކާރުން ފެށި މަޝްރޫއުތަކުގެ ތެރެއިން 70-80 އިންސައްތަ މަޝްރޫއު ހުއްޓާލައިފި
ކުރީގެ ރައީސް އަދި އެމްޑީޕީގެ ރައީސް އިބްރާހީމް މުޙައްމަދު ޞާލިޙު
މަޑުކޮށްލައިގެން ތިބީ ރައްޔިތުން އިންތިހާބުކުރި ސަރުކާރަކަށް ވާތީ، ވަގުތުކޮޅެއް ދޭންޖެހޭނެކަމަށް ގަބޫލުކުރައްވާތީ ކަމަށާއި، އެހެންނަމަވެސް ދެން ބަލަން ތިބެވޭކަށް ނެތް ކަމަށް ކުރީގެ ރައީސް އަދި އެމްޑީޕީގެ ރައީސް އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.
'ފެހި. ތަނަވަސް. މާލެ' ކެމްޕޭން ނިންމުމުގެ ޖަލްސާގައި ވާހަކަފުޅުއްދަކަވަމުން ރައީސް ޞާލިހު ވިދާޅުވީ އެމްޑީޕީ ސަރުކާރުން ފެށި މަޝްރޫއުތަކުގެ ތެރެއިން 70-80 އިންސައްތަ މަޝްރޫއު ހުއްޓާލާފައިވާ ކަމަށާއި، ރައްޔިތުން އެތަން ބަލަން ނުތިބޭނެ ކަމަށެވެ. ރައީސް ސާލިޙު ވިދާޅުވީ އެމްޑީޕީން ވެސް ތިބެގެން ނުވާނެ ކަމަށާއި، ޖަވާބުދާރީކުރުވަން އޮތް އެންމެ ބޮޑު ޕާޓީ އަކީ އެމްޑީޕީ ކަމަށެވެ. އަދި ޒިންމާދާރުކަމާ އެކީގައި، މި ސަރުކާރު ޖަވާބުދާރީ ކުރުވަން ޖެހޭ ކަމަށެވެ.
ރައީސް ޞާލިހު ވިދާޅުވީ ސަރުކާރު ޒިންމާދާރު ނުކޮށްފިނަމަ ރާއްޖެ ވެއްޓޭނީ ބޮޑު އަނދަވަޅަކަށް ކަމަށެވެ. ގެއްލިގެންދާނީ ރާއްޖޭގެ މަގުތަކުގެ އަމަންއަމާންކަން ނޫން ކަމަށާއި، އިގްތިސާދީ ގޮތުން ވެސް އެތަކެއް ދަށްޗެއް ކުރިމަތިވާނެ ކަމަށެވެ. އަދި ހާރިޖީ ގުޅުންތައް ނެތިގެމުންދާ ކަމަށާއި، މި ހުރިހާކަމަކަށް ބަލާ އެންމެން އެކީގައި ރުކުރުވާލާ ނުކުންނާނެ ކަމަށެވެ.
ހާރިޖީ ގުޅުންތަކުގެ ވާހަކައަށް ރައީސް ޞާލިހުގެ ވާހަކަފުޅުގައި އަލިއަޅުއްވާލައްވާފައިވަނީ، މި ސަރުކާރު ވެރިކަމަށް އައި ފަހުން، އަވަށްޓެރި އިންޑިއާއާއި އޮތް ގުޅުން ހީނަރުވެ، މި ސަރުކާރުގައި ތިބި ރައީސް މުއިއްޒުގެ އަރިސް ބޭފުޅުން އިންޑިއާގެ ވެރިންނާއި އިންޑިއާއަށް ބަދުބަސް ބުނެ، ގުޅުންތައް ގޯސްވެފައިވަނިކޮށެވެ.
ރައީސް ޞާލިހު ވާހަކަ ފުޅުގައި އިތުރަށް ވިދާޅުވީ މާލެއަށް ހައްލު ހޯދުމަށް މާލޭގައި ހަމައެކަނި ފުލެޓްތަކެއް އެޅުމުން ނުވާނެ ކަމަށެވެ. މުޅި ރާއްޖެ ތަރައްގީވާން ޖެހޭނެ ކަމަށާއި، މާލެއަށް މީހުން ޖަމާވިޔަ ނުދިނުމަށް މާލެ ނޫން ރާއްޖޭގެ ކަންކޮޅުތަކުގައި ހިދުމަތް ފޯރުކޮށްދޭން ޖެހޭ ކަމަށެވެ. އެނޫން ގޮތަކަށް މާލެއަށް ދާއިމީ ހައްލެއް އަދިވެސް ނުލިބޭނެކަމަށް ރައީސް ޞާލިހް ވިދާޅުވިއެވެ.
ރައީސް ޞާލިހް ވިދާޅުވީ އެމްޑީޕީގެ ވެރިކަމުގައި ކުރަމުންދިޔައީ އެ މަސައްކަތް ކަމަށާއި، ރާއްޖޭގެ އެކި ރަށްރަށުގައި ލިބެން ނެތް އަސާސީ ހިދުމަތްތައް ފޯރުކޮށްދިނުމުގެ މަސައްކަތް ފެށި، ގިނަ މަސައްކަތްތަކެއް ނިމުނު ކަމަށެވެ. ބޯހިޔާވަހިކަމާއި، ސިއްހީ ހިދުމަތް ރަށްރަށުން ލިބޭނެ ގޮތް ހަދާ ދަރިވަރުންނަށް ރަނގަޅު ތައުލީމެއް ލިބޭނެގޮތް ހެދުމަށް މަސައްކަތްތަކެއް ފެށުނު ކަމަށެވެ.
ނަމަވެސް ހިތާމައަކީ މިއަދު މިހާހިސާބަށް އައި އިރުގައި މި ސަރުކާރުން, އެމްޑީޕީގެ ސަރުކާރުން ކުރަން ފެށި އެތައް މަސައްކަތެއް ހުއްޓާލާފައިވާ ކަމަށެވެ. މިއީ ހަމައެކަނި މާލެ ވަށައިގެން ހިއްކައިގެން ހައްލު ލިބޭނެ ކަމެއް ނޫން ކަމަށާއި، މުޅި މައްސަލައަށް ހައްލު ލިބޭނީ މުޅި ރާއްޖެ ތަރައްގީކޮށްގެން ކަމަށެވެ.
