ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ކަންކަން ބެލުމަށް ރާއްޖޭގައި ޙަރަކާތްތެރިވަމުން ދަނީ ޚާއްސަ ތަޙުޤީޤީ ޓީމެއްކަމަށް މައުލޫމާތު ލިބިއްޖެ އެވެ.

އިތުބާރު ހުރި ގޮތަކުން މައުލޫމާތު ލިބިފައިވާ ގޮތުގައި ތަޙުޤީޤީ ޓީމުން ރާއްޖޭގައި ޙަރަކާތްތެރިވަމުން ދަނީ، އެފްއޭއެމްގެ ވެރިންގެ މައްޗަށް ކުރެވޭ ޚިޔާނާތުގެ ތުހުމަތުތައް ބެލުމަށެވެ. އެގޮތުން އެއީ ދުނިޔޭގެ ފުޓުބޯޅައިގެ މައި އިދާރާ (ފީފާ)ގެ ބެލުމުގެ ދަށުން ކުރިއަށް ގެންދާ ތަޙުޤީޤެއް ކަމަށް ވެސް ވަނީ މައުލޫމާތު ލިބިފަ އެވެ.

އެނގިފައިވާ ގޮތުގައި މިހާރު ކުރިއަށްދާ ތަޙުޤީޤަކީ އެފްއޭއެމަށް ފީފާ އިން ދީފައިވާ ފައިސާ ބޭނުންކޮށްފައިވާ ގޮތް ބަލައި، ސާފު ކުރުމަށް ކުރިއަށް ގެންދާ ތަޙުޤީޤެކެވެ. އެގޮތުން ކޮވިޑް-19 ގެ ބަލިމަޑުގެ ތެރޭގައި ފީފާ އިން ރާއްޖެ އަށް ދިން 1.9 މިލިއަނަށް ވުރެ ގިނަ ރުފިޔާ ބޭނުންކޮށްފައިވާ ގޮތުގެ ތަޙުޤީޤެއް ހިންގަމުންދާ ކަމަށް މައުލޫމާތު ލިބެ އެވެ.

އެފްއޭއެމުގެ ޚިޔާނާތުގެ މައްސަލަ ފެންމަތިވެ، އެ އިދާރާގެ ރައީސް ބައްސާމް އަދީލް ޖަލީލަށް ވަނީ އިންތިހާ އަށް އާންމުންގެ ފާޑު ކިޔުންތައް އަމާޒުވެފަ އެވެ. އަދި ޚިޔާނާތުގެ ތުހުމަތުގައި އޭނާގެ ޕާސްޕޯޓް ހިފެހެއްޓުމުން މިހާރު ވަނީ އަވަސް އިންތިޚާބަކަށް ގޮވާލައިފަ އެވެ. ނަމަވެސް އިންތިޚާބުގެ ކަންކަން ފޮރުވައިގެން ކުރިއަށް ގެންދާތީ ވެސް ގިނަ ބަޔަކު އަންނަނީ އެފްއޭއެމަށް ނުރުހުން ފާޅުކުރަމުންނެވެ.

މީގެ އިތުރުން އަސާސީ ގަވާއިދާ ޚިލާފަށް ގިނަ ކަންކަން ކޮށްފައިވާކަން ވެސް ވަނީ ފަޅާ އަރައިފަ އެވެ. އޭގެ ތެރޭގައި އެފްއޭއެމްގެ ހިންގާ ކޮމެޓީގެ ބައްދަލުވުންތަކުގެ ނިންމުންތައް ހަމައެކަނި ވަޓްސްއަފް ގްރޫޕުގައި މަޝްވަރާކޮށްގެން ނިންމާފައިވާތީ، ކަމިޝަނަރ އޮފް ސްޕޯޓްސް ވަނީ ފީފާ އާއި އޭއެފްސީގެ ލަފާ ހޯދައި، ވަކި ގޮތެއް އަންގަންދެން އިންތިޚާބު ފަސްކުރަން އަންގައިފަ އެވެ. ނަމަވެސް ކޮމިޝަނަރުގެ އެންގުމަށް ބެލުމެއް ނެތި، އެފްއޭއެމުން ވަނީ އިންތިޚާބުގެ މަސައްކަތް ކުރިއަށް ގެންދާނެކަމަށް ބުނެފަ އެވެ.

އެފްއޭއެމުގެ ފައިސާ ހުސްވެ، މުވައްޒަފުންނަށް މުސާރަނުދޭތާ 10 މަހަށް ވުރެ ގިނަ ދުވަސްވެފައިވާއިރު، މައްސަލަ ބޮޑުވުމުން މިހާރު މުސާރައިގެ ބައެއް ދީފައި ވަނީ ފީފާގެ ޚާއްސަ އެންގުމެއްގެ ދަށުން ފޮނުވި ފައިސާއިންނެވެ.