"އެމްޑީޕީ މިވަގުތު ހިމޭނުން އޮތީ ސަރުކާރަށް މަސައްކަތް ނުކުރެވެނީ އޮޕޮޒިޝަންގެ ސަބަބުންނޭ ބުނެ އެ ބަދުނާމު އެޅުވުމުގެ ފުރުސަތު ނުދިނުމަށް"
ރައްޔިތުން މި ސަރުކާރާމެދު ހިތްހަަމަ ނުޖެހޭނަމަ، ވޯޓުން ރައީސް ޑރ މުޙައްމަދު މުއިއްޒަށް މެސެޖެއް ދެވިދާނެ
ކުރީގެ ޑިފެންސް މިނިސްޓަރު މާރިޔާ އަހުމަދު ދީދީ
ސަރުކާރުން ކުރާ ކަންކަމާއި ގުޅިގެން އެމްޑީޕީން މަގުމައްޗަށް ނުނުކުންނަނީ ސަރުކާރަށް މަސައްކަތް ނުކުރެވެނީ އޮޕޮޒިޝަންގެ ސަބަބުންނޭ ބުނެ އެ ބަދުނާމު އެޅުވުމުގެ ފުރުސަތު ނުދިނުމަށްކަމަށް ކުރީގެ ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެއްޖެއެވެ.
ބުދަ ދުވަހު ރާއްޖެޓީވީގެ ފަށާއިރު ޕްރޮގްރާމްގައި ވާހަކަފުޅު ދައްކަވަމުން މާރިޔާ ވިދާޅުވީ، އެމްޑީޕީން އަބަދުވެސް އިޖާބަދެނީ ރައްޔިތުންގެ އިހުސާސްތަކަށް ކަމަށެވެ. ރާއްޖޭގެ ޑިމޮކްރަސީގައި އަބަދުވެސް މަގުމަތިން ކަންކަން ޙައްލު ކުރުމަކީ އެންމެ ރަނގަޅު ގޮތަކަށް ނުވެދާނެކަން ފާހަގަ ކުރައްވައި މާރިޔާ ވިދާޅުވީ، މަޖިލިސް ފަދަ ދައުލަތުގެ އިދާރާތަކަށްވެސް ފުރުސަތުދޭން ޖެހޭކަމަށެވެ.
ރައްޔިތުންގެ ބޮޑެތި ކަންބޮޑުވުންތަކެއް މިހާރުވެސް ސަރުކާރާމެދު އެބަހުރިކަން ފާހަގަ ކުރައްވައި މާރިޔާ އިތުރަށް ވިދާޅުވީ، މީގެ ކުރިން ފެންނަމުން ދިޔައީ ކަމެއް ނުހިނގި ނަމަވެސް ދޭދޭ ޤައުމުތަކާ ގުޅުވައިގެންވެސް ހަމަނުޖެހުމެއް އުފެއްދުމަށް މަސައްކަތް ކުރަމުންދިޔަ މަންޒަރު ކަމަށެވެ.
ރައްޔިތުން މި ސަރުކާރާމެދު ހިތްހަަމަ ނުޖެހޭނަމަ، ވޯޓުން ރައީސް ޑރ މުޙައްމަދު މުއިއްޒަށް މެސެޖެއް ދެވިދާނެކަމަށް މާރިޔާ ވިދާޅުވިއެވެ.
ސަރުކާރަށް މަސައްކަތް ނުކުރެވެނީ އޮޕޮޒިޝަންގެ ސަބަބުންނޭ ބުނެ އެ ބަދުނާމު އެޅުވުމުގެ ފުރުސަތު ނުދެއްވާނެކަމަށްވެސް މާރިޔާ ވިދާޅުވިއެވެ.
