ސިފައިންގެ އަދަދު އަންދާޒާކޮށްލެވޭވަރު ނުވާނަމަ އެއީ ސަރުކާރުގެ ނާގާބިލުކަން - ފައްޔާޒް

ރާއްޖޭގައި ތިބި އިންޑިއާ ސިފައިންގެ އަދަދު އަންދާޒާކޮށްލެވޭ ވަރު ނުވާނަމަ އެއީ މި ސަރުކާރުގެ ނާގާބިލުކަން ކަމަށް އެމްޑީޕީގެ ޗެއަރޕާސަން ފައްޔާޒް އިސްމާއީލް ވިދާޅުވެއްޖެއެވެ.

ރާއްޖެ ޓީވީގެ ފަލަސުރުޚީ ޕްރޮގްރާމުގައި ވާހަކަފުޅު ދައްކަވަމުން ފައްޔާޒް ވިދާޅުވީ ރައީސް ޔާމީން އިންޑިއާ އައުޓް ފެއްޓެވީ އެމްޑީޕީގެ ސަރުކާރު ވައްޓާލުމަށް ކަމަށެވެ. އިންޑިއާގެ ސިފައިން ރާއްޖޭގައި ތިބިކަމަށް ބުނި ކަމަށާއި، އަދި ރައީސް ޑރ. މުހައްމަދު މުއިއްޒު އަލްޖަޒީރާއަށް ދެއްވި އިންޓަރވިއުއެއްގައި، ރާއްޖޭގައި އިންޑިއާގެ އެތައްހާސް ސިފައިން ތިބިކަމަށް ވިދާޅުވި ކަމަށެވެ. އަދި އިންޑިއާ ސިފައިން ރާއްޖެގައި ތިބިކަމަށް އިިދިކޮޅުން އެއިރު ދައްކަމުން ދިޔަ ވާހަކަތާއި، އެމްޑީޕީގެ އެތެރޭގައި ޖެހުނު މައްސަލަތަކުގެ ސަބަބުން، ރައްޔިތުންގެ ތެރޭގައި އިންޑިއާ ސިފައިން ތިބި ވާހަކަތައް ގަބޫލުކުރެވެން ފެށުނު ކަމަށް ފައްޔާޒް ވިދާޅުވިއެވެ.

ފައްޔާޒު ވިދާޅުވީ އެއިރުންސުރެ އިންޑިއާ އައުޓް ކިޔަމުން އައިސް އިންޑިއާ މީހުންގެ ތެރޭގައި އޮތީ ދިވެހިން އިންޑިއާއާ މެދު ދެކޭގޮތާ ގުޅޭ ކަންބޮޑުވުން އުފެދިފައި ކަމަށެވެ. އަދި ރައީސް މުއިއްޒު އިންޑިއާ އައުޓް ބޭނުންކުރައްވައިގެން ވެރިކަމަށް ވަޑައިގެންނެވުމަށްފަހުގައި ވެސް އެހާ ހައްސާސީ ކަމެއް ނުރައްކާ ލެވެލްއަކަށް ގެންދަވަން އަދިވެސް މަސައްކަތް ކުރައްވަމުން ގެންދަވާ ކަމަށް ފައްޔާޒް ވިދާޅުވިއެވެ.

ފައްޔާޒް ވިދާޅުވީ މިހާރު އޮތް ސަރުކާރުން ބުނަމުން އައީ ހުރިހާ އެއްޗެއް ހާމަކުރާނެ ކަމަށާއި، އެހެންކަމުން އެ އެއްބަސްވުންތައް ރިވިއުކުރަން ޖެހޭނެކަމަށް ދެކިވަޑައިނުގަންނަވާ ކަމަށެވެ.

ފައްޔާޒު ވިދާޅުވީ ރާއްޖެއަކީ އަމިއްލަ ޒާތުގައި މިނިވަން ވަރުގަދަ ގައުމެއް ކަމަށެވެ. އެހެންކަމުން ދޭދޭ ގައުމުތަކާއި ދެކެވޭ ވާހަކަތާއި މަޝްވަރާތަކާއި ބައިލެޓްރަލް ގުޅުންތަކުގެ ތެރެއިން ކުރާ ކަންކަން ހިފަހައްޓަންޖެހޭނެ ކަމަށެވެ.

ފައްޔާޒް ވިދާޅުވީ މިހާރު މި ފެންނަ މަންޒަރަކީ ސަރުކާރުން އިންޑިއާއާއި ދެކޮޅުވާ މައްސަލަ އިތުރު ހަރުފަތަކަށް ގެންދިޔަތަން ކަމަށެވެ. ފައްޔާޒު މިފދައިން ވިދާޅުވީ ސަރުކާރުގެ ޑެޕިއުޓީ މިނިސްޓަރުންތަކެއް އިންޑިއާގެ އިސްވެރިންނާއި އިންޑިއާއަށް ފާޑުކިއާ ބަދުބަސް ބުނެފައިވާތީ އެކަމަށް އިޝާރާތްކުރައްވައެވެ.