އޮންލައިން ޕޭމަންޓް ޕްލެޓްފޯމް މެދުވެރިކޮށް ފައިސާ ލިބިގަތުމަށް ހުރި ހުރަސްތައް ނައްތާލުމަށް ބޭންކް އޮފް މޯލްޑިވްސް (ބީއެމްއެލް) މެދުވެރިކޮށް ގިނަވެގެން ހަފްތާގެ ތެރޭގައި އީ-ވޮލެޓްގެ ޚިދުމަތް ފެށުމަށް ސަރުކާރުން ނިންމައިފިއެވެ.
އާދިއްތަ ދުވަހުގެ ރޭ ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ޕްރިންސިޕަލް ސެކްރެޓަރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ އަބްދުﷲ ނާޒިމް ވިދާޅުވީ، މިނިސްޓްރީ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް އިން މިކަމާ ގުޅޭ ގޮތުން ހުށަހެޅުއްވި ކަރުދާހަށް ވަޒީރުންގެ މަޖިލީހުގައި މަޝްވަރާ ކުރެއްވުމަށްފަހު ނިންމެވީ، އޮންލައިން ޕޭމަންޓް ޕްލެޓްފޯމް މެދުވެރިކޮށް ފައިސާ ލިބިގަތުމަށް ހުރި ހުރަސްތައް ނައްތާލުމަށް ބޭންކް އޮފް މޯލްޑިވްސް މެދުވެރިކޮށް ގިނަވެގެން އެއް ހަފްތާގެ ތެރޭގައި އީ-ވޮލެޓްގެ ޚިދުމަތް ފެށުމަށް ކަމަށެވެ.
ނާޒިމް ވިދާޅުވީ އީ-ކޮމަރސް ޕްލެޓްފޯމެއް ކަމަށްވާ ޕޭޕަލް އަށް އެކްސެސް ހޯދުމާއި، އެފަދަ އެހެން ޕްލެޓްފޯމްތަކުގެ އެކްސެސް ހޯދުމުގެ ގޮތުން އެފަދަ ޚިދުމަތްތައް ދޭ އެހެން ފަރާތްތަކާއެކުވެސް މަސައްކަތްކުރުމަށް ވަޒީރުންގެ މަޖިލީހުގެ ލަފާގެ މަތިން ރައީސް ޑރ.މުހައްމަދު މުއިއްޒު ނިންމަވާފައިވާ ކަމަށެވެ.
މީގެ އިތުރުން ނާޒިމް ވިދާޅުވީ ސައިބަރ ސެކިއުރިޓީގެ ގާނޫނެއް ވުޖޫދަށް ގެނައުމަށް އެކަމާ ގުޅޭ ބިލެއް ޑްރާފްޓުކުރުމާއި، ސައިބަރ ސެކިއުރިޓީގެ އިންފްރާސްޓްރަކްޗަރ ތަރައްގީކޮށް ކެޕޭސިޓީ ވަރުގަދަ ކުރުމަށް ޔުނައިޓެޑް އެރެބް އެމިރޭޓްސް އާއި ތުރުކީވިލާތާއެކު މަޝްވަރާތައް ކުރިއަށް ގެންދިއުމަށް ވެސް ނިންމާފައިވާ ކަމަށެވެ.
ބޯހިޔާވަހިކަމާއި އުމްރާނީ ތަރައްގީގެ ޓްރަސްޓް ފަންޑެއް ގާއިމުކުރުމާއި، ކުޑަ އިންޓަރެސްޓުގައި ލުއިލޯނު ސްކީމެއް ހިންގުމާއި ގުޅޭގޮތުން ވަޒީރުންގެ މަޖިލީހުގައި ވަނީ މަޝްވަރާކޮށްފައެވެ.
ނާޒިމް ވިދާޅުވީ މިނިސްޓްރީ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓް އިން މި ކަމާ ގުޅޭ ގޮތުން ހުށަހެޅުއްވި ކަރުދާހަށް ވަޒީރުންގެ މަޖިލީހުގައި މަޝްވަރާކުރެއްވުމަށްފަހު ނިންމެވީ، މި ކަމާ ގުޅޭ ގޮތުން އިކޮނޮމިކް ކައުންސިލްގައި އިތުރަށް މަޝްވަރާ ކުރުމަށް ކަމަށެވެ.
އެގޮތުން ޑިވެލޮޕްމަންޓް ބޭންކާއި އެހެނިހެން ބޭންކްތައް މެދުވެރިކޮށް ސޯޝަލް ހައުސިންގ ލޯނުތައް ދޫކުރެވޭނެ ގޮތްތަކެއް ހޯދައި، ދެނެގަނެ، ބޯހިޔާވަހިކަމަށް ސަރުކާރުން ތައާރުފުކުރުމަށް ކަނޑައަޅާފައިވާ ލޯނު ސްކީމްތަކެއް އޭގެ ތެރެއަށް ތައާރުފުކުރެވޭނެ ގޮތްތަކެއް ހޯދުމަށް ތަފްސީލުކޮށް މަޝްވަރާކުރުމަށް ވަނީ ނިންމަވާފައެވެ.
