ރިޔާސީ އިންތިޚާބުގައިވެސް ބާތިލު ވޯޓު ގިނަ، ހޭލުންތެރިކަން އިތުރުކުރުމަށް މިފަހަރު ގިނަ މަސައްކަތްތަކެއް ކުރާނެ: ޙަބީބް

ރިޔާސީ އިންތިޚާބުގައިވެސް ބާތިލު ވޯޓު ނުހަނު ގިނަ ކަމަށާއި، އެހެންކަމުން ހޭލުންތެރިކަން އިތުރު ކުރުމަށް މިފަހަރު ގިނަ މަސައްކަތްތަކެއް ކުރާނެކަމަށް އިލެކްޝަންސް ކޮމިޝަނުން ބުނެފިއެވެ.

ކުރިއަށް އޮތް އިންތިޚާބުތަކާ ބެހޭ މައުލޫމާތު ދިނުމަށް އާދިއްތަ ދުވަހު އިލެކްޝަންސް ކޮމިޝަނުން ބޭއްވި ނޫސްވެރިންގެ ބައްދަލުވުމެއްގައި އެ ކޮމިޝަނުގެ ނައިބްރައީސް އިސްމާއީލް ޙަބީބް ވިދާޅުވީ، ރައްޔިތުންގެ މަޖިލީހުގެ އިންތިޚާބުގެ ޤަވާއިދު މިހާރު ސަރުކާރުގެ ގެޒެޓުގައި ޝާއިއުކޮށްފައިވާކަމަށެވެ.

ޙަބީބް ވިދާޅުވީ، އިންތިޚާބުގައި ވޯޓުލެވޭ މީހުންގެ ލިސްޓެއް ޖެނުއަރީ މަހުގެ 10 ވަނަ ދުވަހު އާންމު ކުރައްވާނެކަމަށެވެ.

އަދި ފަސޭހައިން ޝަކުވާ ހުށަހެޅުމަށް ޝަކުވާ ޕޯޓަލްއެއްވެސް ތައްޔާރު ކުރުމުގެ މަސައްކަތް ކުރަމުންދާކަމަށް ޙަބީބް ވިދާޅުވިއެވެ.

ޙަބީބް ވިދާޅުވީ، ރިޔާސީ އިންތިޚާބުގައިވެސް ބާތިލު ވޯޓު ނުހަނު ގިނަ ކަމަށާއި، އެހެންކަމުން ހޭލުންތެރިކަން އިތުރު ކުރުމަށް މިފަހަރު ގިނަ މަސައްކަތްތަކެއް ކުރައްވާނެ ކަމަށެވެ.

މާލޭ ސިޓީ މޭޔަރު އިންތިޚާބާއި ބައެއް ދާއިރާތަކުގެ ބައި އިލެކްޝަން އިންތިޚާބަށް އަލިއަޅުވާލައްވާ ޙަބީބް ވިދާޅުވީ، 13 ޖެނުއަރީގައި އޮންނަ ބައި އިލެކްޝަނަށް މާލޭގައި 55 ވޯޓުފޮށި ބަހައްޓާއިރު، ވީހާވެސް ގިނަ މީހުން ނުކުމެ ވޯޓުލުމުގެ ޙައްޤު ބޭނުންކުރެއްވުމަށް އެދޭ ކަމަށެވެ. މޭޔަރު ހޮވުމަށް ހުޅުމާލެއާއި ވިލިމާލޭގައިވެސް ވޯޓުފޮށި ބަހައްޓާނެކަން ޙަބީބް ފާހަގަ ކުރެއްވިއެވެ.

މިފަހަރު ހާހަކަށްވުރެ ގިނަ މީހުން ބައިއިލެކްޝަންތަކުގެ އޮބްޒަރވް ކުރުމުގައި ޙަރަކާތްތެރިވާނެކަންވެސް ޙަބީބް ފާހަގަ ކުރެއްވިއެވެ.

ޙަބީބް ވަނީ އިންތިޚާބާބެހޭ ޤާނޫނުގައި ހުރި ކަންކަމަށް ސަމާލުވުމަށްވެސް އެދިވަޑައިގަންނަވާފައެވެ.

13 ޖެނުއަރީގެ ފަހުންވެސް އެކި ތާރީޚުތަކުގައި ބައި އިލެކްޝަންތައް ބޭއްވުމަށް ތާވަލު ކުރެވިފައިވާއިރު، އީސީން ވަނީ އެކަމުގެ ތަފްސީލުތައް ހިއްސާކޮށްފައެވެ.

ނިމިގެންދިޔަ ރިޔާސީ އިންތިޚާބުގައި ބާތިލު ވޯޓު ގިނަވި ސަބަބު ދެނެގަތުމަށް އީސީއިން ދިރާސާއެއްކުރާނެކަމަށް އެކޮމިޝަނުން މީގެ ކުރިން ބުނެފައިވެއެވެ.

ހަބީބު ވިދާޅުވީ މީގެކުރީގެ އިންތިޚާބުތަކުގައި ވޯޓު ބާތިލުވެފައި ހުރި ގޮތްތަކާއި މިފަހަރު ބާތިލުވެފައި ހުރި ގޮތްތަކަށް ބަލާއިރު އައު ކަންކަން ފާހަގަކުރެވިފައިވާކަމަށެވެ. އެހެންކަމުން އެކަންކަމަކީ ދިރާސާ ކުރަންޖެހޭކަންކަންކަމަށާއި އެކަންކަން އީސީން ދިރާސާކުރާނެކަމަށް ހަބީބު ވިދާޅުވިއެވެ.

މީގެއިތުރުން އިންތިޚާބުތަކާއި ބެހޭ ގާނޫނުތަކަކީ މީގެ 15 ވަރަކަށް އަހަރު ކުރިން ހެދިފައިވާ ގާނޫނުތަކަކަށްވާއިރު މިޒަމާނަށް ފެތޭ ގޮތަށް ގަނޫނަށް ބަދަލުތަކެއް ވެސް އަންނަންޖެހޭކަމަށް ހަބީބު ވިދާޅުވިއެވެ.

މި މަސައްކަތްކުރަންޖެހޭނީ އިންތިޚާބެއް ބޯމަތިވެފައި ނެތް ދުވަސްވަރެއްގައި ކަމަށާއި އެކަމާއި ގުޅޭގޮތުން ކަމާގުޅުންހުރި މުއައްސަސާތަކާއި ސިޔާސީ ޕާޓީތަކާއި އީސީން މަޝްވަރާތައް ކުރާނެކަމަށް ހަބީބު ވިދާޅުވިއެވެ.