މޫސުމީ ހިރާސްތަކުން ރައްކާތެރިވުމަށް ރާއްޖެއިން ކުރާ މަސައްކަތްތައް ސްޕީކަރސް ކޮންފަރެންސްގައި ހިއްސާކޮށްފިއެވެ.
ރައްޔިތުންގެ މަޖިލީހުން ބުނީ މިހާރު ޔޫގަންޑާގެ ވެރިރަށް ކަމްޕާލާގައި ކުރިއަށްދާ 27 ވަނަ ކޮންފަރެންސް އޮފް ސްޕީކާސް އެންޑް ޕްރިސައިޑިންގ އޮފިސާސް އޮފް ދަ ކޮމަންވެލްތުގައި ރައްޔިތުންގެ މަޖިލީހުގެ ރައީސް މުޙައްމަދު އަސްލަމް އިންޓަރވިއު ދެއްވާފައިވާ ކަމަށެވެ.
އެ ކޮންފަރެންސްގައި އަސްލަމް އިންޓަރވިއު ދެއްވީ ތިމާވެއްޓާއި، ދުނިޔޭގެ މޫސުމަށް އަންނަ ބަދަލުތަކާ ގުޅޭގޮތުންނެވެ. އެގޮތުން އެމަނިކުފާނުގެ ވާހަކަފުޅުގައި ދިވެހި ރާއްޖޭގެ ތިމާވެށީގެ ހާލަތުގެ ތަފްސީލް ދެއްވިއެވެ. އަދި ރާއްޖެއަކީ ދުނިޔޭގެ މޫސުމަށާއި ކަނޑުގެ ދިޔަވަރަށް އަންނަ ބަދަލުތަކުން އެންމެ ބޮޑު ނޭދެވޭ އަސަރެއްކުރާނެ އެއް ޤައުމުކަން ފާހަގަ ކުރެއްވިއެވެ.
މީގެ އިތުުރުން މޫސުމަށް އަންނަ ބަދަލުތަކާއި، ތިމާވެއްޓަށް ލިބޭ ގެއްލުމާ ދެކޮޅަށް ޤައުމީ ފެންވަރުގައި ކުރެވެމުންދާ މަސައްކަތްތަކާއި މެދު ވާހަކަފުޅު ދެއްކެވިއެވެ. ހަމައެހެންމެ އެފަދަ މަސައްކަތްތަކަށް ދިމާވެފައިވާ ގޮންޖެހުންތަކަށް އަލިއަޅުވާލެއްވިއެވެ. ރައްޔިތުންގެ މަޖިލީހުގެ ރައީސް މުޙައްމަދު އަސްލަމްގެ ވާހަކަފުޅުގައި ތިމާވަށި ރައްކާތެރި ކުރުމަށާއި، 2030 ވަނަ އަހަރު ނެޓް ޒީރޯ ޤައުމަކަށް ވުމަށް ރާއްޖެއިން ކުރަމުންދާ ދަތުރުގައި ރައްޔިތުންގެ މަޖިލީހުގެ ދައުރާއި ގުޅޭގޮތުން ވެސް ވާހަކަފުޅު ދެއްކެވިއެވެ.
މިހާރު ޔޫގަންޑާގެ ވެރިރަށް ކަމްޕާލާގައި ގައުމުތަކުގެ ޕަލިމެންޓްގެ އިސް ފަރާތްތަކާއި އަސްލަމް ވަނީ ބައްދަލުކުރައްވާފައެވެ.
