ބްރެޒިލްގެ ކޯޗުކަމުން ޑިނިޒް ވަކިކޮށްފި
އޭނާ މަގާމުން ވަކިކުރީ 6 މެޗުން ތިން މެޗުން ބަލިވުމުން
ބްރެޒިލްގެ ކޯޗު ފެނާންޑޯ ޑިނިޒް
ބްރެޒިލްގެ ގައުމީ ފުޓްބޯޅަ ޓީމުގެ ކޯޗުކަމުން ފެނާންޑޯ ޑިނިޒް ވަކިކޮށްފި އެވެ
ބްރެޒިލްގެ ފުޓްބޯޅަ ފެޑަރޭޝަނުން ބުނީ މި ނިންމުމަކީ ގައުމީ ޓީމު ނެރުނު ނަތީޖާތަކާ ގުޅިގެން ނިންމަން ޖެހުނު ނިންމުމެއް ކަމަށެވެ.
ޑިނިޒްގެ ކޯޗުކަމުގައި ބްރެޒިލް ކުޅުނީ ހެ މެޗެކެވެ. މީގެ ތެރެއިން ތިން މެޗުން ބަލިވެ، އެއް މެޗު އެއްވަރުވެ، މޮޅުވީ ދެ މެޗުންނެވެ. އޭނާ ކޯޗުކަމުން ވަކިކުރިއިރު ކޮންޓްރެކްޓްގައި ބާކީ އަދި އަހަރެއް އެބައޮތެވެ. އޭނާ އަށް ކޯޗުކަން ހަވާލުކުރީ 2022ގެ ވޯލްޑްކަޕަށް ފަހު ކޯޗު ކަމުގަމުން ޓިޓޭ އިސްތިއުފާ ދިނުމުންނެވެ. ޑިނިޒް ގައުމީ ޓީމަށް ކޯޗުކޮށްދެމުންދިޔައީ ބްރެޒިލްގެ ފުލުމިނޭޒީގެ ކޯޗުކަން ވެސް އަދާކުރަމުންނެވެ.
ބްރެޒިލްގެ މީޑިއާތަކުން ބުނީ އެ ގައުމުން މިހާރު މަސައްކަތް ކުރަމުންދަނީ ސައުޕޯލޯގެ ކޯޗު ޑޮރިވާލް ޖޫނިއާ އަށް ގައުމީ ޓީމު ހަވާލު ކުރުމަށެވެ. މީގެ އިތުރުން ކުރީގެ ކޯޗު ލުއިސް ފިލިޕޭ ސްކޮލާރީ އަކީ ވެސް ލިސްޓުގައިވާ ކޯޗެވެ. މީގެ އިތުރުން އިޓަލީގެ ރޯމާ އަށް ކޯޗުކޮށްދެމުން އަންނަ ތަޖުރިބާކާރު ކޯޗު ހޯސޭ މޮރީނިއޯ ވެސް ވަނީ އޭނާ އަށް ބްރެޒިލްގެ ހުށަހެޅުން ލިބިފައިވާ ކަމަށް ބުނެފަ އެވެ.
ބްރެޒިލުން މިދިޔަ އަހަރެއްހާ ދުވަހު މަސައްކަތް ކުރީ ރެއާލް މެޑްރިޑްގެ ކޯޗު ކާލޯ އެންޗެލޯޓީ ގައުމީ ޓީމަށް ގެނައުމަށެވެ. ނަމަވެސް އޭނާ ވަނީ މީގެ ދެ ހަފުތާ ކުރިން ރެއާލް މެޑްރިޑާއެކު ކޮންޓްރެކްޓް އައުކޮށްފަ އެވެ. އޭގެ ސަބަބެއް ނުބުނެ އެވެ.
