އެފްއޭއެމްގެ އިންތިޚާބު އިންސާފުވެރިވާނެ- އިލެކްޓޯރަލް ކޮމިޓީ

މިހާރުވެސް އިތުބާރު ގެއްލިފައިވާ އެފްއޭއެމްގެ އިންތިޚާބު އިންސާފްވެރި ވާނެކަމަށް, އެއިންތިޚާބުގެ ކަންކަން ކުރިއަށް ގެންދަން އެކުލަވާލާފައިވާ އިލެކްޓޯރަލް ކޮމިޓީން ބުނެފިއެވެ.

ކޮމިޓީގައި ތިއްބެވީ ކޮން މެންބަރުންނެއްކަން ނޭންގޭ ކޮމިޓީން ނެރުނު ބަޔާނެއްގައި ބުނީ އިންތިޚާބުގެ ކަންކަން ކުރިއަށްގެންދާނީ އެފްއޭއެމްގެ ޤަވާއިދާއި, އޭއެފްސިއާއި ފީފާގެ ލަފަޔާ މަޝްވަރާގެ މަތީން އިންސާފްވެރިކޮށް ކަމަށެވެ. އިލެކްޓޯރަލް ކޮމިޓީން ބަޔާނެއް ޢާއްމުކޮށްފައި މިވަނީ ވެލެންސިޔާއިން ދެ ކެންޑިޑޭޓުންނަށް ތާއީދު ސިޓީ ދީފައިވާކަމަށް ބުނާ މައްސަލާގައި ލަފާ ހޯދަން އޭއެފްސީއާ ފީފާއަށް އިލެކްޓޯރަލް ކޮމިޓީން ސިޓީއެއް ފޮނުވި މައްސަލަ ފެންމަތިވެފައި ވަނިކޮށެވެ. އެ ސިޓީ އެފްއޭއެމްގެ މީޑިޔާ ގްރޫޕްގައި ހިއްސާކޮށް އެއީ ސައްހަ ސިޓީއެއްތޯ ނޫސްވެރިއަކު ސުވާލުކުރި ނަމަވެސް އެއަށް ޖަވާބެއް ނުދެއެވެ. އޭގެ ބަދަލުގައި އާއްމުކުރި ބަޔާނުގައި ބުނެފައިވަނީ ދެ ކެންޑިޑޭޓުންނަށް ވެސް ކްލަބް ވެލެންސިޔާއިން ތާއީދުކޮށް ސިޓީ ދީފައިވާ ކަމަށެވެ. އެހެންކަމުން މިފަދަ ހާލަތުގައި އަމަލުކުރާނެ ގޮތުގެ ލަފައަކަށް އޭއެފްސީ އާއި ފީފާގައި އެދިފައިވާނެ ކަމަށް ބަޔާނުގައި ބުނެފައި ވެއެވެ.

ނަމަވެސް ކޮމިޝަނަރ އޮފް ސްޕޯރޓްސްގައި ރަަޖިސްޓްރީ ކޮށްފައިވާ ކްލަބް ވެލެންސިޔާގެ ޗެއަރމަން އަބްދުالله އަޒްމީން ވަނީ އަހުމަދު ތާރިޤު (ޓޮމް) އަށް ފިޔަވައި އެ ކްލަބްގެ ތާއީދު ސިޓީއެއް އެހެން ކެންޑިޑޭޓަކަށް ދީފައި ނުވާނެކަމަށް ވިދާޅުވެފައެވެ. ތާއީދު ސިޓީގެ މައްސަލައިގެ އިތުރުން ވެލެންސިޔާގެ އީމެއިލް އިން އެ ކްލަބްގެ ޗެއަރމަން އަބްދުالله އަޒްމީން އިސްތިއުފާ ދެއްވާފައިވާކަމަށް ބުނާ ސިޓީއެއް އެފްއޭއެމްއަށް ފޮނުވި މައްސަލައެއް ވެސް ވަނީ ފެންމަތިވެފައެވެ. އެކަން ވެސް އަޒްމީން ވަނީ ދޮގުކުރައްވާފަ އެވެ.

މިފަދަ ގިނަ މައްސަލަތަކާއި, އުޞޫލާ ހިލާފަށް އިންތިޚާބު ބާއްވާކަން ފާހަގަކުރެވި ކޮމިޝަނަރ އޮފް ސްޕޯރޓްސް ވަނީ އިންތިޚާބުގެ ކަންކަން މަޑުޖައްސާލަން ވެސް އަންގަވާފައެވެ. ނަމަވެސް އެ އެންގުމަށް ބެލުމެއް ނެތި އެފްއޭއެމްއިން އިންތިޚާބުގެ ކަންކަން ކުރިއަށް ގެންދެއެވެ.