މާފުށީ ކައުންސިލަށް ބިލްޑިންގ ކޯޑެއް ނުހެދޭނެ - މިނިސްޓަރު
5 ޖެނުއަރީ 2024 | ހުކުރު 04:16އިމާރާތްކުރުމާއި ބެހޭ ގާނޫނުގައި ބުނާގޮތަށް މިނިސްޓްރީން ވާނީ ބިލްޑިންގ ކޯޑް ޝާއިޢުކޮށްފައި
ކ. މާފުށީ ކައުންސިލަށް އަމިއްލަ ބިލްޑިންގ ކޯޑެއް ނުހެދޭނެކަމަށް މިނިސްޓްރީން ބުނޭ
ކ. މާފުށީ ކައުންސިލަށް ވަކި ބިލްޑިންގ ކޯޑެއް ނުހެދޭނެކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެއެވެ.
މިނިސްޓަރު މިފަދައިން ވިދާޅުވީ ކ. މާފުށީ ކައުންސިލުން އެރަށުގެ ބިލްޑިން ކޯޑު ތައްޔާރުކޮށް އެކުލަވާލާދޭނެ ފަރާތެއް ހޯދުމަށް އިއުލާން ކޮށްފައިވަނިކޮށް، އެކަމާއި ގުޅިގެން އެކްސްގައި ކުރެއްވި ޕޯސްޓެއްގައެވެ.
މާފުށީ ކައުންސިލުން ކުރި އިއުލާނުގައި ބުނެފައިވަނީ ކައުންސިލް އިދާރާއިން ދޭ މަޢުލޫމާތާއި އެއްގޮތަށް މާފުށީގައި ބިލްޑިން ކޯޑެއް އެކުލަވާލުމަށް ބޭނުންވާތީ އެ މަސައްކަތް ކޮށްދިނުމަށް ޝައުގުވެރިވާ ފަރާތްތަކަށް އެފުރުސަތު ހުޅުވާލާ ކަމަށެވެ. އަދި ބީލަން ރަޖިސްޓްރީކޮށް އަންދާސީ ހިސާބު މި މަހުގެ 14 ވަނަ ދުވަހު ހުށަހެޅުމަށް ވެސް ކައުންސިލްގެ އިއުލާނުގައިވެއެވެ.
މިކަމާއި ގުޅިގެން އެކްސްގައި ކޮންސްޓްރަކްޝަން މިނިސްޓަރު ކުރެއްވި ޕޯސްޓުގައި ވިދާޅުވީ އިމާރާތްކުރުމާއި ބެހޭ ގާނޫނުގައި ބުނާގޮތަށް މިނިސްޓްރީން ވާނީ ބިލްޑިންގ ކޯޑް ޝާއިޢުކޮށްފައި ކަމަށެވެ. އަދި ވަކިވަކި ކައުންސިލްތަކުން ބިލްޑިންޑް ކޯޑު ހެދުމުގެ ބާރެއް ނޯންނާނެ ކަމަށެވެ. އަދި ކައުންސިލްތަކުގެ ހުރި ކަންބޮޑުވުންތަކަށް ހައްލު ހޯދުމަށް މިނިސްޓްރީން މަސައްކަތް ކުރައްވާނެ ކަމަށެވެ.
އިމާރާތްކުރުމާއި ބެހޭ ގާނޫނުގެ 95 ވަނަ މާއްދާގެ ދަށުން މިނިސްޓްރީން ހަދަން ލާޒިމް ކުރާ ގަވާއިދުތަކެއް ވެއެވެ. އެގޮތުން ގާނޫނުގެ 95 ވަނަ މާއްދާގެ (ހ) ގައި ބުނަނީ އެ ގާނޫނު ތަންފީޒުކުރުމަށްޓަކައި 14 ގަވާއިދެއްހަދަންޖެހޭ ކަމަށެވެ. އެގޮތުން އިމާރާތްކުރުމާއި ބެހޭ އިދާރީ ގަވާއިދު އަދި ބިލްޑިންގ ކޯޑް އެކުލަވާލުމަކީ އެ މިނިސްޓްރީގެ މެންޑޭޓްގައި ހިމެނޭ ކަމެކެވެ.
