3،000 ހައުސިން ޔުނިޓް ތަރައްގީކުރުމުގެ އެއްބަސްވުމެއްގައި އެފްޑީސީން ސޮއިކޮށްފި
5 ޖެނުއަރީ 2024 | ހުކުރު 02:32އެ ޔުނިޓުތައް ތަރައްގީ ކުރާނެ ސަރަހައްދެއް އެފްޑީސީން އިއުލާންކޮށްފައެއް ނުވޭ
މިދިޔަ ސަރުކާރުން ފެށި ގެދޮރުވެރިޔާ ފްލެޓްތައް
ރާއްޖޭގެ ސަރަހައްދުތަކުގައި 3،000 ހައުސިން ޔުނިޓް ތަރައްގީކުރުމުގެ ފްރޭމްވޯރކް އެއްބަސްވުމެއްގައި ފަހި ދިރިއުޅުން ކޯޕަރޭޝަން (އެފްޑީސީ)އިން ދެ ކުންފުންޏަކާއެކު ސޮއިކޮށްފިއެވެ.
ބުރާސްފަތި ދުވަހު ސޮއިކުރި އެއްބަސްވުމުގެ ދަށުން އެ މަސައްކަތް ކުރިއަށް ގެންދިޔުމަށް ނިންމާފައިވަނީ "ޖޮއިން ވެންޗާ" މަޝްރޫއެއްގެ ގޮތުގައެވެ.
އެގޮތުން އެ މަޝްރޫއުގެ ހަވާލުކުރި ދެ ކުންފުންޏަކީ، ސްރީލަންކާގެ ކުންފުންޏެއްކަމަށްވާ ހޭލީސް އޭވިއޭޝަން އެންޑް ޕްރޮޖެކްޓްސް ޕްރައިވެޓް ލިމިޓެޑާއި ރާއްޖޭގެ ކުންފުންޏެއް ކަމަށްވާ އޮނިކްސް ބިލްޑާސް ޕްރައިވެޓް ލިމިޓެޑްއެވެ.
އެ އެއްބަސްވުމުގައި އެފްޑީސީގެ ފަރާތުން ސޮއިކުރެއްވީ އެކުންފުނީގެ މެނޭޖިން ޑިރެކްޓަރ ހަމްދާން ޝަކީލްއެވެ. އަދި ޖޮއިން ވެންޗާގެ ގޮތުން، ހޭލީސް އޭވިއޭޝަން އެންޑް ޕްރޮޖެކްޓްސް ޕްރައިވެޓް ލިމިޓެޑްގެ ފަރާތުން ސޮއިކުރީ ރާއްޖޭގެ ރިޕްރެޒެންޓޭޓިވް ކަމަށްވާ އޮނިކްސް ބިލްޑާސް ޕްރައިވެޓް ލިމިޓަޑް ގެ މެނޭޖިންގ ޑިރެކްޓަރ ހަސަން ހުސެންއެވެ.
އެ އެއްބަސްވުމުގެ ދަށުން ރާއްޖޭގައި 3000 ސޯޝަލް ހައުސިން ޔުނިޓް ޑިޒައިން ކުރުމާއި ފައިނޭންސް ކުރުމާއި އިމާރާތްކުރުމުގެ މަސައްކަތްކުރާނީ ހަވާލުކުރެވިފައިވާ ދެ ކުންފުނިންނެވެ.
އެހެން ނަމަވެސް އެ މަސައްކަތްތައް ކުރިއަށްދާނެ ސަރަހައްދެއް އެފްޑީސީން އިއުލާންކޮށްފައި ނުވާއިރު، އެ މަސައްކަތް ކުރިއަށްދާނީ އެކުންފުންޏާއި ސަރުކާރުން ކަނޑައަޅާ ސަރަހައްދުތަކެއްގައި ކަމަށް ވަނީ ބުނެފައެވެ.
