ފުށިދިއްގަރު ފަޅު ހިއްކަން 10 ބިލިއަން ރުފިޔާ ހޭދައެއްނުވާނެ، އެ އުޅެނީ 5 ބިލިއަން ރުފިޔާ ޖީބަށް ލާން - އާދަމް އާޒިމް
4 ޖެނުއަރީ 2024 | ބުރާސްފަތި 17:30ފުށިދިއްގަރުފަޅު ހިއްކަނީ ސްރީލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީން
އާޒިމް
ފުށިދިއްގަރު ފަޅު ހިއްކަން 10 ބިލިއަން ރުފިޔާ ހޭދަނުވާނެ ކަމަށާއި، ސަރުކާރުން އުޅެނީ 5 ބިލިއަން ރުފިޔާ ޖީބަށް ލާންކަމަށް، މާލެ ސިޓީ ކައުންސިލަށް ވާދަކުރައްވާ އެމްޑީޕީގެ ކެނޑިޑޭޓް އެމްޓީސީގެ ކުރީގެ ސީއީއޯ އާދަމް އާޒިމް ވިދާޅުވެއްޖެއެވެ.
އެމްޑީޕީގެ ޖަގަހަ ޖަލްސާގައި ވާހަކަދައްކަވަމުން އާޒިމް ވިދާޅުވީ، މިހާރުގެ މާލެ ސިޓީ ކައުންސިލުން ރައްޔިތަކަށް ފައިދާވާނެ އެއްވެސް ކަމެއް ކޮށްފައި ނެތްކަމަށާއި އެކަމަށް ރައްޔިތުން ހެކިވާނެކަމަށެވެ. އެއާ ޚިލާފަށް އެމަނިކުފާނުގެ މޭޔަރުކަމުގައި ރައްޔިތުންގެ ބިން ބޭނުންކުރާނީ އާއްމުންނަށް ފައިދާ ހޯދައިދެވޭގޮތަށް ކަމަށް ވިދާޅުވިއެވެ. އާޒިމް ވަނީ އާއްމުންނަށް ފައިދާނުވާގޮތަށް މަޝްރޫއުތައް ހިންގާތީ އެކަމަށް ފާޑުވިދާޅުވެފައެވެ.
އާޒިމް ވަނީ ފުށިދިއްގަރު ފަޅު ހިއްކުމުގައި އޮޅުވާލާ ކަމަށާއި، އެއީ ބޮޑު އިސްރާފެއް ކަަމަށް ވިދާޅުވެފައެވެ. ރަސްމާލެ ހިއްކަން 10.7 ބިލިއަން ރުފިޔާއަށްވުރެ ބޮޑު އަދަދެއް ޚަރަދުވާނެ ކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު ވަނީ ވިދާޅުވެފައެވެ. ނަމަވެސް އާޒިމް ވަނީ، އެތަން ހިއްކަން ހިނގާ ޚަރަދު 10 ބިލިއަނަށް އަރަންވީ ކީއްވެގެންތޯ ސުވާލު އުފައްދަވާފައެވެ. އެމްޓީސީސީގައި ހުރި ގާބިލްކަމާއެކު 5 ބިލިއަނެއްހާ ރުފިޔާއަށް އެކަން ކުރެވޭނެކަމަށް އޭނާ ވިދާޅުވިއެވެ. އެހެންކަމުން އަނެއް 5 ބިލިއަނަށް ކުރައްވަން އުޅުއްވަނީ ކީއްތޯ އާޒިމް ސުވާލުކުރެއްވިއެވެ. އެ ފައިސާއަކީ ގެއްލޭ ފައިސާ ކަަމަށްވެސް އާޒިމް ވިދާޅުވިއެވެ.
ފުށިދިއްގަރުފަޅު ހިއްކަނީ ސްރީލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ (ސީއެމްސީސީ)އަށް ޖުމްލަ 70 ހެކްޓަރު، ދިގު މުއްދަތަށް ދީގެންނެވެ.
