މިއީ އެއްވެސް ޙާލަތެއްގައި ވަކި މީހަކާ ދިމާކުރުމުގެ ގޮތުން ލިޔަން ޤަސްތު ކުރި ރިޕޯޓެއް ނޫނެވެ. އަމުދުން، އެއްވެސް ބޭފުޅަކާ ޒާތީ ކަމެއް އޮވެގެން ދައްކާ ވެސް ވާހަކައެއް ނޫނެވެ. އެހެންވިޔަސް، މިއީ ރާއްޖޭގެ ސިޔާސީ މަސްރަހުގައި ހިނގަމުން މިދާ ކަންތައްތަކާއި، ފުރޮޅެމުންދާ ކަންކަމުގެ މައްޗަށް ނަޒަރު ހިންގައި، ވިސްނާލުމަށްފަހު ހިތަށް އެރުވި ލިޔުމެކެވެ!

މި ވާހަކަ އަކީ މި ނިމުނު ހަފުތާގައި، ނޫސްތަކުގެ ޞުރުޚީ ވެސް ޖާގަ ހޯދި ވާހަކަ އެކެވެ. އެހާ ވެސް ބޮޑު ވާހަކަ އެކެވެ. އެހެނެއް ކަމަކު، އަޅުގަނޑަށް ތަންކޮޅެއް މަޖާ އަދި ހަމަ އެހާމެ ހައިރާން ކަން ވެސް ލިބުނު ވާހަކަ އެކެވެ. ދިވެހިރާއްޖޭގެ ޒަކާތު ހައުސް އިފުތިހާހު ކުރުމަށް ސަރުކާރުން ބޭއްވި ޙަފްލާއި، އިސްލާމީ ކަންތައްތަކާ ބެހޭ ވަޒީރު ޑރ މުޙައްމަދު ޝަހީމް އަލީ ސައީދު ދެއްކެވި ވާހަކަފުޅުގެ ތެރެއިން، ވިދާޅުވި ވަރަށް ބޮޑު ވާހަކަ އެކެވެ.

ވަޒީރު ވިދާޅުވީ، އަދުގެ ރައީސުލްޖުމްޙޫރިއްޔާ ޑރ މުޙައްމަދު މުޢިއްޒު އަކީ، 100 އަހަރުން އެއް ފަހަރު ލިބޭނެ ފަދަ ވެރިޔެއް ކަމަށެވެ. އަދި މިވަގުތު ރާއްޖޭގެ ވެރިކަމުގައި ރައީސް މުޢިއްޒު ހުންނެވުމަކީ، ދިވެހި ޤައުމަށް ދަރުމަކުރެއްވި ވަރަށް މަތިވެރި ނިޢުމަތެއް ކަމަށް ވެސް ވިދާޅުވި އެވެ.

ކުޑަކޮށް މާޒީގެ ތެރެއަށް ޖެހިލައި، ހަނދާންތައް އަޅުގަނޑުގެ ސިކުނޑި އަށް ގެނައީމެވެ. މީގެ ކުރިން ވަޒީރު ވިދާޅުވެފައި އޮތް ވާހަކަތަކަށެވެ. އެއީ މީގެ ފަސް ވަރަކަށް އަހަރު ކުރި އެވެ. 2018 ވަނަ އަހަރުގެ ރިޔާސީ އިންތިޚާބުގެ އެންމެ ފޯރިގަދަ ދުވަސްވަރެވެ. އޭރުގެ ރައީސަކަށް ހުންނެވީ ޕީޕީއެމްގެ ކުރީގެ ރައީސް، ޢަބްދުﷲ ޔާމީން ޢަބްދުލް ޤައްޔޫމެވެ. އެމަނިކުފާނުގެ އިންތިޚާބީ ބައިވެރިޔަކީ، މިއަދުގެ އިސްލާމީ ކަންތައްތަކާ ބެހޭ ވަޒީރު، ޝަހީމެވެ.

އެ އަހަރު ވެސް ވަޒީރު ޝަހީމް ވިދާޅުވެފައި ވަނީ އެހެންނެވެ. ރައީސް ޔާމީނަކީ، 100 އަހަރުން އެއް ފަހަރު ލިބޭނެ ފަދަ ވެރިޔެއް ކަމަށެވެ. އެހެންކަމުން، ރައީސް ޔާމީންގެ ވެރިކަން ދަމަހައްޓައި، ދެ ވަނަ ދައުރަކަށް އެމަނިކުފާނުގެ ހޮވުމުގެ މުހިންމުކަން ޝަހީމް ވިދާޅުވެ ދެއްވި އެވެ. އެ ދުވަހު ވެސް ވިދާޅުވަމުން ގެންދެވީ، ރައީސް ޔާމީނަކީ ހެޔޮ ލަފާ، ރައްޔިތުންނަށް ރަނގަޅު ވެރިޔެއް ކަމަށެވެ. އެއީ ވެސް ނިޢުމަތެއް ކަމަށް އޮތީ ވިދާޅުވެފަ އެވެ.

އަޅުގަނޑު ގާތަށް ހިނި އައި ތަންކޮޅަކީ މިއީ އެވެ. އޭރު ރައީސް ޔާމީން ރަނގަޅުވެ، އެމަނިކުފާނުގެ ފަހަތްޕުޅުގައި ހުންނެވިއިރު، އެއީ ސަތޭކަ އަހަރުން އެއް ފަހަރު ލިބޭ ފަދަ ވެރިޔެކެވެ. އޭގެ ހަމަ އެންމެ ފަސް އަހަރު ފަހުން، ރައީސް މުޢިއްޒުގެ ވަޒީރުންގެ މަޖިލީހުގައި އިންނަވައި، އެމަނިކުފާނަކީ ވެސް ސަތޭކަ އަހަރުން އެއް ފަހަރު އަންނަ ވެރިޔަކަށް ވެއްޖެ އެވެ. މި އަހަރުތަކުގެ ހިސާބު ދިމާކުރާނެ ގޮތެއް ނިކަމެތި އަޅުގަނޑަށް ފަހުމެއް ނުވި އެވެ. ފަހަރުގައި އަޅުގަނޑުގެ ކަލްކިއުލޭޓަރުގައި ހިސާބު ޖެހުމުގެ މައްސަލަ އުޅެނީ ކަމަށް ވެސް ވެދާނެ އެވެ!

ދަންނަވަންތޯ އެވެ؟ ވަޒީރު ޝަހީމަށް ކަމުދާ ކޮންމެ ބޭފުޅަކީ، ސަތޭކަ އަހަރުން އެއް ފަހަރު އަންނަ ވެރިޔަކަށް ވާނެތޯ އެވެ؟ އެހެންވެއްޖެނަމަ، ރައްޔިތުން ދެން ހަދަންވީ ކިހިނެއްތޯ އެވެ؟ ރައްޔިތުންނާއި ރައްޔިތުންނެވެ. ސަތޭކަ އަހަރުން އެއް ފަހަރު އަންނަ ވެރިންނާއި، އެ ވެރިންނެވެ.

ދެން ދިމާވީ ރަޙުމަތްތެރިޔަކާ އެވެ. އޭނާއާ ވަޒީރު ޝަހީމްގެ އެ ވާހަކަފުޅު އަޅުގަނޑު ހިއްސާ ކުރުމުން އޭނާ ބުނީ މާ މަޖާ ވާހަކަ އެކެވެ. ސަތޭކަ އަހަރުން އެއް ފަހަރު އަންނަނީ، މަދުން ނޫނީ ނުފެންނަ ކަހަލަ ބަލިމަޑުކަމެކެވެ. މިސާލަކަށް އޭނާ ދެއްކީ މިފަހުން ދުނިޔެއިން ފެނުނު ކޮވިޑް19 ގެ ބަލިމަޑުކަމުގެ ވާހަކަ އެވެ.

ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ)ގެ ޑިރެކްޓަރު ޖެނެރެލް ޓެޑްރޮސް އަދަނޮމް ވިދާޅުވެފައި ވަނީ، ކޮވިޑްގެ ބަލިމަޑުކަމަކީ ސަތޭކަ އަހަރުން އެއް އަހަރު ދިމާވާ ފަދަ ބަލިމަޑުކަމެއް ކަމަށެވެ. ދެން ވެސް ހުރި ބައެއް ބަލިމަޑުކަމަކީ، ސަތޭކަ އަހަރުން އެއް ފަހަރު ކުރިމަތިވާ ކަންތައްތައް ކަމަށް ޞިއްޙީ ތަޖުރިބާ ކާރުން ބުނެ އެވެ.

ކުރުކޮށްލާނަމެވެ. އެހެންވެއްޖިއްޔާ، ވަޒީރު ޝަހީމްގެ ނަޒަރުގައި އެކަހަލަ ކިތަންމެ ސަތޭކަ ވެރިންނެއް ކުރިއަށް އޮތް ތަނުގައި ފެންނާނެ އެވެ.