ސޮއި ފޯޖުކުރަން ނުޖެހޭނެ ކަމަށް ވިދާޅުވެ މުފާ ރައްދުދެއްވައިފި!

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ އިންތިޚާބުގައި ވާދަކުރުމަށް، ތާއީދު ހޯދުމުގެ ގޮތުން ސޮއި ފޯޖުކުރަން ނުޖެހޭނެ ކަމަށް ވިދާޅުވެ، ކުލަބު އީގަލްސްގެ ވަައިސް ޗެއާމަން މުފާވިޒް ހާޝިމް (މުފާ) ރައްދުދެއްވައިފި އެވެ.

މި މަހުގެ 31 ވަނަ ދުވަހު ބާއްވަން މަސައްކަތް ކުރަމުން އަންނަ އެފްއޭއެމްގެ އިންތިޚާބުގައި ވާދަކުރެއްވުމަށް މުފާ ވެސް ވަނީ ފޯމު ހުށަހަޅުއްވާފަ އެވެ. އިންތިޚާބުގައި ވާދަކުރަން ބޭނުންވާ ފަރާތްތަކުން ފުރަތަމަ ޑިވިޝަންގެ ތިން ކުލަބެއްގެ ތާއީދު ސިޓީ ހުށަހަޅަން ޖެހެ އެވެ. އެގޮތުން އިންތިޚާބުގައި ވާދަކުރެއްވުމަށް މުފާ ފޯމު ހުށަހެޅުއްވިއިރު، މުފާ އަތުގައި ކުލަބު ވެލެންސިއާގެ ތާއީދު ސިޓީ އޮތެވެ. އަނެއްކޮޅުން އެ އިންތިޚާބުގައި ވާދަކުރައްވަން ފޯމު ހުށަހެޅުއްވި އެފްއޭއެމްގެ ކުރީގެ ރައީސް އަޙުމަދު ޠާރިޤް (ޓޮމް) އަތުގައި ވެސް ވެލެންސިއާގެ ތާއީދު ސިޓީ އޮތެވެ.

އެ މައްސަލަ ބޮޑުވެފައި ވަނިކޮށް، ކުލަބު ވެލެންސިއާގެ ޗެއާމަން ޢަބްދުﷲ އަޒްމީން ސޮއިކުރައްވާ އެ ކުލަބުން ވަނީ އެފްއޭއެމްގެ އިލެކްޓޯރިއަލް ކޮމިޓީ އަށް ސިޓީއެއް ފޮނުއްވައިފަ އެވެ. އެ ސިޓީގައި ވިދާޅުވެފައި ވަނީ ވެލެންސިއާގެ ތާއީދު އޮތީ ޓޮމް އަށް ކަމަށާއި، އެ ކުލަބުގެ ނަމުގައިވާ އެހެން ސިޓީއެއްވާ ނަމަ، އެއީ ޞައްޙަ ސިޓީއެއް ނޫން ކަަމަށެވެ. އެހެންކަމުން، ވެލެންސިއާގެ ސޮއި ފޯޖުކޮށްފައިވާ މައްސަލަ ދިވެހި ފުލުހުން އަދި ކޮމިޝަނަރ އޮފް ސްޕޯޓްސް އަށް ވެސް ހުށަހަޅުއްވާނެ ކަމުގައި ވަނީ އަޒްމީން ވަނީ ވިދާޅުވެފަ އެވެ.

އެކަމަށް ރައްދުދެއްވާ މުފާ ވަނީ ހޯމަ ދުވަހު އެކްސްގައި ޕޯސްޓެއްކުރައްވާފަ އެވެ. އެ ޕޯސްޓުގައި މުފާ ވިދާޅުވީ، އިންތިޚާބުގައި ވާދަކުރައްވަން ސޮއި ފޯޖުކުރަން އޭނާ އަށް ޖެހިވަޑައިނުގަންނަވާނެ ކަމަށެވެ. އަދި ކުލަބު ވެލެންސިއާގެ ތާއީދު ސޮއި ނުހިމަނައި ވެސް، އެހެން ފަސް ކުލަބަކުން މުފާ އަށް ތާއީދުކޮށްފައިވާ ކަމަށް ވެސް ވަނީ ވިދާޅުވެފަ އެވެ. އެހެންކަމުން، ސޮއި ފޯޖުކުރަން ޖެހޭ ޙާލަތެއްގައި ހުރީ އޭނާ ނޫންކަން ފާހަގަކުރައްވާ މުފާ ވިދާޅުވީ، ވަކި ކޮޅަކަށް ނުޖެހި ދިވެހި ފުލުހުން އެ މައްސަލަ އިންސާފުވެރިކަމާއެކު ތަޙުގީގުކޮށް، ރައްޔިތުންނަށް ހަގީގަތް ހާމަކޮށްދިނުން އެދިވަޑައިގަންނަވާ ކަމަށެވެ.

މުފާ އަކީ މިހާރު ވެސް އެފްއޭއެމްގެ ހިންގާ ކޮމެޓީގައި ހިމެނިވަޑައިގަންނަވާ މެންބަރެކެވެ. ކުލަބު އީގަލްސްގެ ވައިސް ޗެއާމަންގެ މަގާމު ވެސް ފުރުއްވަމުން ގެންދަވާ މުފާ އަކީ، އީގަލްސް ހިންގުމުގައި އިސްކޮށް ހަރަކާތްތެރިވެވަޑައިގަންނަވަމުން ގެންދަވާ ފަރާތެއް ވެސް މެއެވެ. އެފްއޭއެމްގެ އިންތިޚާބުގައި އެ އެސޯސިއޭޝަންގެ ރައީސްކަމަށް ވާދަކުރައްވަން މުފާ ނިންމެވީ، މިހާރު އެ މަޤާމުގައި ހުންނެވި ބައްސާމް އަދީލް ޖަލީލް، އެ އިންތިޚާބުގައި ވާދަނުކުރައްވަން ނިންމެވުމުންނެވެ.

އެފްއޭއެމްގެ އިންތިޚާބު މި މަހު ބާއްވަން އިއުލާންކޮށް، މުއްދަތު ހަމަވެފައިވާއިރު، ސްޕޯޓްސް ކޮމިޝަނަރު ވަނީ އިންތިޚާބުގެ ކަންކަން މިވަގުތަށް މަޑު ޖައްސާލުމަށް އަންގަވާފަ އެވެ. އެއީ، އެފްއޭއެމްގައި ޤަވާއިދާ ޚިލާފަށް ގިނަ ކަންތައްތަކެއް ކުރަމުން އަންނަ ކަމަށް ބެލެވޭތީ އެވެ. އަދި އިންތިޚާބުގެ ކަންކަމުގައި އިތުރަށް އެއްޗެއް ވިދާޅުވާނީ، ދުނިޔޭގެ ފުޓުބޯޅައިގެ މައި އިދާރާ (ފީފާ) އަދި އޭޝިޔާގެ ފުޓުބޯޅަ އިދާރާ (އޭއެފްސީ)ގެ ބަހެއް ހޯދުމަށް ފަހު ކަމަށް ވެސް ސްޕޯޓްސް ކޮމިޝަަނަރު ވަނީ ވިދާޅުވެފަ އެވެ.