ރައީސްގެ އާ އަހަރުގެ މެސެޖުގައި "ރައްޔިތުން ވެރީންނަށް ކިޔަމަންވުމާއި، ވެރިންނަށް އެއްބާރުލުން ދިނުމުގެ ވާހަކަ"

ރައީސުލްޖުމްޖޫރިއްޔާ ޑރ.މުހައްމަދު މުއިއްޒުގެ އާ އަހަރުގެ މެސެޖުގައި ރައްޔިތުން ވެރީންނަށް ކިޔަމަންވުމާއި، ވެރިންނަށް އެއްބާރުލުން ދިނުމުގެ ވާހަކަ ހަނދުމަކޮށްދެއްވައިފިއެވެ.

އާ އަހަރާއި ގުޅިގެން ދެއްވި ހިޠާބުގައި ޤައުމެއްގެ ތަރައްޤީގެ ބިންގަލަކީ އަދި ކުރިބޯށްޓަކީ ރައްޔިތުންނާއި ވެރިންގެ ގުޅުން ކަމަށް ރައީސް ވިދާޅުވިއެވެ. ދިވެހި މަސްއޮޑިއެއް އެކުލެވިގެންވަނީ، އޭގެ ފަށަނުގެ ދެފަރާތަށް އިންދޭ ގެތިގެންވާ މަޑޫތަކަކުންކަމަށް އެމަނިކުފާނު ވަނީ ވިދާޅުވެފައެވެ. ހަމަ އެފަދައިން، ޤައުމެއް ތަރައްޤީވުމުގައި ވެސް އެފަދަ ބަދަހި ގުޅުން ހިމެނިގެންވާ ކަމަށާއި އެއީ ރައްޔިތުންނާއި ވެރީންގެ ގުޅުން ކަމަށް ރައީސް ވިދާޅުވިއެވެ. ވެރީން ރައްޔިތުންނަށް ރަޙުމުހުރި ބަޔަކަށްވުމާއި، ވަޢުދަށް ކަމޭހިތަން ޖެހޭ ކަމަށް ވިދާޅުވިއެވެ. އަދި ހަމައެހެންމެ ރައްޔިތުން ވެރީންނަށް ކިޔަމަންވުމާއި، ރައްޔިތުން ވެރިންނަށް އެއްބާރުލުން ދިނުމަށް ބާރު އަޅުއްވާ ރައީސް ވަނީ ވާހަކަފުޅުދައްކަވާފައެވެ.

ރައީސް ވިދާޅުވީ އިރާދަކުރެއްވިއްޔާ އަލަށް ފެށުނު މީލާދީ އާ އަހަރަކީ، ދިވެހިރާއްޖެއަށާއި ދިވެހީންނަށް އުޖާލާ އަލިވިލުމެއް ކަމަށެވެ. އަދި މި ފެށުނު އުފާވެރި މީލާދީ އާ އަހަރުގެ ތަހުނިޔާއާއި ހެޔޮއެދުންތައް ލޮބުވެތި އެންމެހައި ދިވެހި އަޚުންނާއި އުޚްތުންނަށް ރައީސް ވަނީ އަރިސްކުރައްވާފައެވެ.

ރައީސް އިތުރަށް ވިދާޅުވީ ފާއިތުވި އަހަރަކީ ދިވެހީން ވަރަށް މުހިންމު ނިންމުންތަކެއް ނިންމި އަހަރެއް ކަމަށެވެ. އަދި މި ނިމިދިޔަ އަހަރަކީ ވަރަށް ކުލަގަދަ ތަޞައްވުރުތަކެއް ކުރެހި އަހަރެއް ކަމަށާއި އެއީ ދިވެހިރާއްޖޭގައި ބޭރުގެ އެއްވެސް ޢަސްކަރީ ބާރެއް އޮވެގެންނުވާނެކަން ދިވެހީން ނިންމި އަހަރެއް ކަމަށް ވިދާޅުވިއެވެ. ހަމައެހެންމެ ދުނިޔޭގެ އެހެން ޤައުމުތައް ހާސިލުކުރާ ފަދަ ކުރިއެރުމާއި ތަހުޒީބާއި ތަރައްޤީ ބޭނުންކަން ރައްޔިތުން ނިންމާފައިވާ ކަމަށް ވެސް ވިދާޅުވިއެވެ. އެހެންކަމުން އެ ކަމަށްޓަކައި ފިކުރީ ގޮތުން ޖީލުތައް އިސްލާމީ، ދިވެހި ޤައުމީ ސިފަތަކާއެކު ބިނާކުރަން ވެއްޖެކަމަށް ދިވެހީން އެއްބަސްވެފައިވާ ކަމަށް ރައީސްގެ ހިޠާބުގައި ވިދާޅުވިއެވެ. ހަމަ އެހެންމެ، ޢުމްރާނީ ގޮތުން އެންމެ ޒަމާނީ ގެދޮރުވެރިކަމާއި ރަށްވެހިކަމަށް ތައްޔާރުވެފައިވާ ކަމަށް ރައީސް ވަނީ ވިދާޅުވެފައެވެ.

ހަމައެހެންމެ ދިވެހީންގެ މި ނިންމުންތައް ޙަޤީޤަތަކަށް ހެދުމަށްޓަކައި އާ ސަރުކާރެއް ހޮވައި، އެ ސަރުކާރާ މި އަމާނާތް ހަވާލުކޮށްފައިވާ ކަމަށް ރައީސް މުއިއްޒު ވިދާޅުވިއެވެ. އާ އަހަރަށް ދިވެހީން ދެކޭ ހުވަފެންތައް ބިނާވެފައި ވަނީ މި އުންމީދުތަކާއި ތަޞައްވުރުތަކުގެ މައްޗަށް ކަމަށް ރައީސް ވަނީ ވިދާޅުވެފައެވެ. އެމަނިކުފާނު ދެކެވަޑައިގަންނަވާ ގޮތުގައި ތަރައްޤީ ފެށިގެން އަންނަންވާނީ ތިރިން މައްޗަށް ކަމަށާއި ތަރައްޤީގެ ވިސްނުންތައް އުފަންވާންވާނީ ރައްޔިތުންގެ ސިކުނޑިތަކުގަ ކަމަށް ރައީސް ވަނީ ވިދާޅުވެފައެވެ. އަދި އެ ރައްޔިތުން އެކަމުގެ މަސްއޫލިއްޔަތު ހަވާލުކުރާ ފަރާތްތަކުގެ ވާޖިބަކަށް ވާންވާނީ، މާތް ﷲއަށް ބިރުވެތިވެ، ތެދުވެރިކަމާއި ވަފާތެރިކަމާއެކު، އެ ޒިންމާތަކާއި މަސްއޫލިއްޔަތުތައް ފުރިހަމައަށް އަދާކުރުން ކަމަށް ވެސް ރައީސް ވިދާޅުވިއެވެ.

ރައީސް އިތުރަށް ވިދާޅުވީ ނިމިދިޔަ އަހަރުގެ ފަހު ހަފުތާތަކާއި، މި ފެށުނު އަހަރުގެ ފުރަތަމަ ހަފުތާތަކަކީ، ތަރައްޤީގެ ވަރަށް ޚާއްޞަ މޫސުމެއް ކަމަށެވެ. މިއީ މި ސަރުކާރުގެ ހަފުތާ ސާދައިގެ ތެރޭގައި ގިނަގުނަ ވަޢުދުތަކެއް އަކުރުން އަކުރަށް ސީދާ ސުންގަޑިއަށް ފުއްދަމުންދާ ދުވަސްތަކެއް ކަމަށް ރައީސް ސިފަކުރެއްވިއެވެ.

ތަރައްޤީއަށްޓަކައި ވިސްނުންތެރިކަމާއި ހަމަޖެހުން ބޭނުންވާ ކަމަށާއި ތެދުވެރިކަމާއި އިޚްލާޞްތެރިކަން ބޭނުންވާ ކަމަށް ރައީސް ވަނީ ވިދާޅުވެފައެވެ. އަދި އާ އަހަރަކީ ތިމާގެ އަމިއްލަ ނަފުސު ތެދުވެރިކަމުގެ މައްޗަށް ބިނާކުރާ އަހަރަކަށް ހެދުމަށް ރައީސް އިލްތިމާސްކުރެއްވިއެވެ. އަދި އާ އަހަރަކީ އިވޭ އަޑުތަކާއި، ލިބޭ މަޢުލޫމާތުން ދޮގުތެދު ވަކިކުރާ އަހަރަކަށް ހަދަން ވެސް ނަސޭހަތްތެރިވެވަޑައިގަތެވެ. އާ އަހަރަކީ ޙަޤީޤަތް ޤަބޫލުކޮށް، އާ އުންމީދުތަކާއި، އާ ކުރިއެރުންތަކާ އެކު ހަލުވިކޮށް ކުރިޔަށްދާ އަހަރެއް ކަމުގައި ހެދުމަށް ވެސް ރައީސް ނަސޭހަތްދެއްވިއެވެ. އަދި އަޅުގަނޑުމެން ދިވެހީންނަކީ އެއް ޤައުމެއް ކަމަށާއި މިއި އެއް ބައެއް ކަމަށް ރައީސް ވިދާޅުވިއެވެ.