އެފްއޭއެމް އިންތިހާބު: އެއް ޓީމަކުން ދެ ކެނޑިޑޭޓުންނަށް ތާއީދު ކުރުން ހުއްދަ: ޝާހު

ފުޓްބޯޅަ އެސޯސިއޭޝަން އޮފް މޯލްޑިވްސްގެ އިންތިހާބުގައި އެއް ކުލަބަކުން ދެ ކެނޑިޑޭޓަކަށް ތާއީދު ކުރުން މަނާކޮށްފައިނުވާ ކަމަށް ތަޖުރިބާކާރު ހިންގުންތެރިޔާ އަދިކުރީގެ ގައުމީ ކެޕްޓަން ޝާހު އިސްމާއީލް (ސާޔާ) ވިދާޅުވެއްޖެ އެވެ.

އެފްއޭއެމުގެ ޖެނެރަލް ސެކްރެޓަރީކަން ވެސް ކުރެއްވި، އަދި ފަހުން ރައީސް ބައްސާމް އަދީލް ޖަލީލްގެ ދައުރުގައި ސީއީއޯގެ މަގާމު ވެސް ދުވަސްކޮޅަކަށް ފުރުއްވި ޝާހު މިފަދައިން ވިދާޅުވީ ފުރަތަމަ ޑިވިޝަނުގެ ވެލެންސިއާއިން ދެ ކެނޑިޑޭޓުންނަށް ތާއީދު ސިޓީ ދީފައިވާ މައްސަލަ ބޮޑުވެފައިވަނިކޮށެވެ.

އެފްއޭއެމުގެ އިންތިހާބުގެ ވާދަވެރިކަމުގައި މިހާރު އެންމެ ބޮޑު އަރައިރުމަކަށް ވެފައި އޮތީ ވެސް ދެ ކެނޑިޑޭޓެއްގެ އަތުގައި ވެލެންސިއާގެ ތާއީދު ސިޓީ އޮތުމެވެ.

މި މައްސަލައިގައި އެފްއޭއެމުގެ ރައީސް ބައްސާމް އަދީލް ޖަލީލް ބޭނުންފުޅުވަނީ ވެލެންސިއާގެ ސިޓީ ބާތިލްކޮށް، ކުރީގެ ގައުމީ ފޯވަޑް އަހުމަދު ތޯރިގް (ޓޮމް)ގެ ކެނޑިޑެސީ ގެއްލުވާލުމަށެވެ. ބައްސާމް ތާއީދު ކުރައްވަނީ އޭނާގެ އެކްސްކޯ މެމްބަރު އީގަލްސްގެ މުފާވިޒް ހާޝިމަށެވެ.

އެފްއޭއެމުގެ އަސާސީ ގަވާއިދުގެ އިނގިރޭސި ކޮޕީގެ އެންމެ ފަހު މާއްދާގައިވަނީ ކުރިމަތިލާ ކެނޑިޑޭޓަކު ފުރަތަމަ ޑިވިޝަނުގެ ތިން ކުލަބުގެ ތާއީދު ހޯދަންވާނެ ކަމަށެވެ. މި ގަވާއިދުގައި އެއް ކުލަބަކުން ދެ ކެނޑިޑޭޓަކަށް ތާއީދުކޮށްފިނަމަ ކެނޑިޑެސީ ބާތިލްވާނެ ވާނެވާހަކަ ބުނެފައިނުވެ އެވެ.

ފުރަތަމަ ޑިވިޝަނުގައި އަށް ކުލަބު އޮންނައިރު ކޮންމެ ކުލަބަކަށް ތާއީދުކުރެވޭނީ އެންމެ ކެނޑިޑޭޓަކަށް ހަދައިފިނަމަ އެފްއޭއެމް އިންތިހާބުގައި ތިން ވަނަ ކެނޑިޑޭޓަކަށް ވާދަކުރުމުގެ ދޮރު ބަންދުވާނެ އެވެ.