ބަހަނާ ހުސްވެ، ބައްސާމް އަދި އެފްއޭއެމް ޑިފެންސަށް!

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ހިންގުމުގައި ހުރި ދޯހަޅި ކަންކަމުގެ ވާހަކަ އަބަދުމެ ދެކެވުނު ނަމަވެސް، އެކަންކަން އޮތީ ޙައްލު ނުވެ އެވެ. ސަރުކާރުތަކުން އެފްއޭއެމް އިސްލާޙު ކުރުމަށް އިންތިހާ އަށް މަސައްކަތް ކުރި ނަމަވެސް، އެކަމުގައި އަލި މަގެއް ނުފެނެ އެވެ. ވަކި ހިސާބަކުން އަތް ދޫކޮށްލަން ޖެހެނީ، އެފްއޭއެމްގެ ބަހަނާތައް ގިނަވުމުންނެވެ. ދުނިޔޭގެ ފުޓުބޯޅައިގެ މައި އިދާރާ (ފީފާ) އިން ރާއްޖެ ސަސްޕެންޑު ކޮށްފާނެ ކަމުގެ ބަހަނާ އަކީ، އިތުބާރު ގެއްލިފައިވާ އެފްއޭއެމްގެ މިހާރުގެ ރައީސް ބައްސާމް އަދީލް ޖަލީލާއި، އޭނާގެ ޓީމުން ދައްކާ އެންމެ ބޮޑު ބަހަނާ އެވެ. ދިވެހިންގެ އެއް ވަނަ ކުޅިވަރު އަދި ޤައުމީ ކުޅިވަރުގެ ގޮތުގައި ދެކެމުން އަންނަ ފުޓުބޯޅަ އަށް ދެރައެއް ލިބެން، ހަމަ އެންމެ މީހަކު ވެސް ނޭދޭނެ އެވެ.

އެފްއޭއެމްގެ ހިންގުމުގައި ހުރި މައްސަލަތަކުގެ ލިސްޓެއް ހަދައިފިނަމަ، އެ ލިސްޓުގެ ދިގުކަން ކޮޅުން ލައިގެން ދާނެ އެވެ. އިދާރީ ގޮތުން ކުރަން ހުރި ކަންކަމުން ފެށިގެން ގޮސް، ޓެކްނިކަލް ކަންކަން ވެސް ހުރީ އެ ހިސާބުގަ އެވެ. ކުޅިވަރުގެ ލޯބި ކެނޑި، އެފްއޭއެމަކީ ތިމާމެހެން ޖީބު ބޮޑު ކުރަން ޖައްސާ އުކުޅަކަށްވީ ފަހުން، ދިވެހި ފުޓުބޯޅައިގެ ދިރުން ހިނގައްޖެ އެވެ. ފޯރި ގެއްލިއްޖެ އެވެ. ކުޅިވަރަށް ކުޅުންތެރިން، ކޯޗުން އަދި އާންމު ރައްޔިތުން ދެމުން އައި ސަޕޯޓާއި، ލޯބި ވެސް ފަނޑުވެއްޖެ އެވެ. އެކަން މިއަދު ހުރިހާ ދިމާލަކުން އޮތީ ފެންނާށެވެ. ޝައްކެއް ވެސް ނެތް ގޮތުގައި އެއީ ފުޓުބޯޅައިގެ މައްސަލައެއް ނޫނެވެ. އެއީ ފުޓުބޯޅަ ހިންގަން ހަވާލުވެ ތިބި ވެރިންގެ އިހުމާލެވެ. އެވެރިންގެ ނާޤާބިލު ކަމެވެ.

ބައްސާމްގެ ދެ ވަނަ ދައުރު ނިމެން ކުޑަތަންވެފައިވާއިރު، ފުޓުބޯޅަ އޮތީ ފުން މިން ނޭނގޭ އަނދަވަޅެއްގަ އެވެ. ފުޓުބޯޅަ ސަލާމަތް ކުރުމަށް ނަގަން ޖެހޭ ރިސްކު އިންތިހާ އަށް ބޮޑުއިރު، ވާން ޖެހޭ ޤުރުބާނީ ވެސް އިންތިހާ އަށް ބޮޑެވެ. އެފްއޭއެމްގައި މަސައްކަތް ކުރަމުން އަންނަ މުވައްޒަފުންނަށް މުސާރަ ނުދޭ ވާހަކަ ދައްކަން ފެށުމުން، އެންމެ ފުރަތަމަ އެ އިދާރާ އިން ފެށީ އެކަން ދޮގު ކުރާށެވެ. އެންމެ ފަހުން އެކަމުގެ ހަގީގަތް ސާފުވެގެން ދިޔައީ، މުސާރަ ނުދީ ގިނަ ދުވަސް ވެގެން މުވައްޒަފުން މަސައްކަތަށް ނިކުތުން ހުއްޓާލުމުންނެވެ. ބައެއް މުވައްޒަފުން ވަޒީފާ އިން ވަކިވީއިރު ވެސް، މުސާރަ ނުދޭތާ އެތައް މަހެއް އޮތީވެފަ އެވެ. އަނެއްކޮޅުން، ޕެންޝަން ފައިސާ އަށް ޚިޔާނާތްތެރިވުމާއި، ޤައުމީ ކުޅުންތެރިންނަށް ދޭން ޖެހޭ ފައިސާ އަށް ވެސް އޮތީ ބޮޑުތަނުން ޚިޔާނާތްތެރިވެފަ އެވެ.

އަނެއްކަމަކީ، އެފްއޭއެމް ދަރަނިވެރިވެގެން ދިޔަ މިންވަރެވެ. އެކި އެކި އިދާރާތަކުންނާއި، ތަންތަނުން ޚިދުމަތް ހޯދުމަށްފަހު، އެ ތަންތަނަށް ދައްކަން ޖެހޭ ފައިސާ ވެސް އޮތީ ނުދައްކަ އެވެ. ހޮސްޕިޓާތަކުން ފެށިގެން ގޮސް ހޮޓާތަކެވެ. ބޮޑެތި ފިހާރަތަކުން ފެށިގެން ގޮސް، އާދައިގެން ކަންމަތީ ފިހާރަ އަށް ވެސް އެފްއޭއެމް އޮތީ ދަރައިފަ އެވެ. އެކަމުގެ ސަބަބުން، އެ މައްސަލަތައް ވަނީ ޝަރުއީ މަރުހަލާއާ ހަމައަށް ވެސް ގޮސްފަ އެވެ. އެ ތަންތަނަށް ފައިސާ ދެއްކުމަށް އެފްއޭއެމާ ދެކޮޅަށް ޝަރުއީ މަރުހަލާ އިން އެތައް ޙުކުމެއް އައިސްފައިވާއިރު، ކޯޓުތަކުގައި ވެސް އެފްއޭއެމް ބޭޒާރުވަނީ އެވެ. މިއީ ދިވެހި ފުޓުބޯޅައިގެ ޙަޔާތުގައި ޖެހެމުން އަންނަ ކަޅު ލައްތަކެކެވެ.

އެފްއޭއެމަށް އެކި އިދާރާތަކުން ދެމުން އަންނަ ފައިސާ އަށް ވެސް އޮތީ ޚިޔާނާތްތެރިވެފަ އެވެ. ސަރުކާރުން ދެމުން އަންނަ ފައިސާ އާއި، ބައިނަލްއަޤުވާމީ އިދާރާތަކުން ދެމުން އައި ފައިސާ އެވެ. އެ ފައިސާތައް ބޭނުންކުރި ކަމަށް ފުރަތަމަ ހެއްދެވީ ދެކޮޅެވެ. ނަމަވެސް ދިވެހި ފުލުހުންނާއި، ޕްރޮސެކިއުޓާ ޖެނަރަލް (ޕީޖީ) ގުޅިގެން ކުރިއަށް ގެންދިޔަ ތަހުގީގުން ހުރިހާ ކަމެއް ފަޅާ އެރި އެވެ. ފައިސާތައް ބޭނުންކޮށްފައިވާ ގޮތާއި، ދަތުރު ކޮށްފައިވާ ގޮތާއި، ފައިސާ ދައްކާފައިވާ ފިހާރަތަކާއި، ހޮޓާތައް ވެސް ތަހުގީގަށް އޮތީ ފެންނާށެވެ. އެ މައްސަލަ މިހާރު އޮތީ ދައުވާ ކުރާ ހިސާބުގަ އެވެ. އެ މައްސަލައިން ބައްސާމަށް ސަލާމަތްވެވޭނެ ގޮތެއް ޖެހޭނީ އަމިއްލަ އަށް އުފަން ކުރުވާށެވެ.

އެފްއޭއެމްގެ މައްސަލަތައް އެ މަގުން ހިނގަމުން އަންނަކަން ބައިނަލްއަޤުވާމީ އިދާރާތުގެ ސަމާލުކަމަށް އޮތީ އައިސްފަ އެވެ. އެހެންވެ، މިހާރު އެފްއޭއެމަށް ފައިސާ ދެނީ މަރުހަލާތަކަށް ބަހާލައިގެންނެވެ. ފުރަތަމަ މަރުހަލާގައި ދީފައިވާ ފައިސާ ބޭނުން ކުރުމަށްފަހު، ބޭނުން ކުރި ގޮތުގެ ތަފުސީލު ވެސް ހިއްސާކުުރުމަށް އޮތީ އަންގައިފަ އެވެ. ދެ ވަނަ ފަހަރަށް ފައިސާ ދޭނީ އޭގެ ފަހުނުންނެވެ.

ހުރިހާ ބަހަނާއެއް ހުސްވެ، މިއަދު ބައްސާމް އަދި އެފްއޭއެމް ކުޅެނީ ޑިފެންސް އަށެވެ. އަވަސް އަރުވާލައިގެން އަންނަ މަހު ބާއްވަން އުޅުނު އިންތިޚާބު މަޑު ޖައްސާލަން ކޮމިޝަނަރ އޮފް ސްޕޯޓްސް މުޙައްމަދު ޠަލާލް އޮތީ އަންގަވައިފަ އެވެ. ކޮމިޝަނަރ ފާހަގަ ކުރައްވާފައިވާ ގޮތުގައި އެފްއޭއެމުން ކަންކަން ކުރަމުން އަންނަނީ އޮޅުވާލުމެއްގެ ތެރެއިންނެވެ. ކަންކަން ކުރަމުން އައީ، އަދި މިހާރު ވެސް ކުރަމުން ދަނީ އިޖުރާއަތްތަކާ ޚިލާފަށެވެ. ހިންގާ ކޮމެޓީގެ ހުސްވި މަޤާމުތަކާއި، ޖެނަރަލް ސެކްރެޓަރީގެ މަޤާމަށް ބޭފުޅަކު ޢަައްޔަން ކުރުމަށް ބާއްވަން ޖެހޭ ހިންގާ ކޮމެޓީގެ ބައްދަލުވުމެއް ވެސް ނުބާއްވަ އެވެ. އެކަން ކޮށްފައި ވަނީ ބައްސާމް އަމިއްލަ އަމިއްލަ އަށް، އެފްއޭއެމްގެ ވަޓްސްއެޕް ގުރޫޕެއްގައި ޖެއްސެވި މެސެޖަކުންނެވެ.

މިއަދު، މަސައްކަތް ކުރައްވަމުން އެ ގެންދަވަނީ ނުބާއްވާ އޮތް ބައްދަލުވުމެއް ބޭއްވި ކަމަށް ބުނެ، ހިންގާ ކޮމެޓީގެ މެމްބަރުންގެ ސޮއި ކުރެއްވުމަށެވެ. ނަމަވެސް، ފަސް މެމްބަރުން އިސްތިއުފާ ދެއްވާފައިވާއިރު، ނުބާއްވާ ބައްދަލުވުމެއް ބޭއްވި ކަމަށް ބުނެ ސޮއި ކުރަން، ގިނަ މެމްބަރުން އަންނަނީ ދެކޮޅު ހައްދަވަމުންނެވެ. ޖަހާނެ ހުރިހާ ފައްޔެއް ބައްސާމަށް ހުސްވެއްޖެ އެވެ. އިތުރަށް ކުރިއަށް ދެވޭނެ ގޮތެެއް ނެތި، މިހާތަނަށް ގަދަ ފައި ވިއްދައިގެން އިންނެވި އިނުމަށް ނިމުން އައިސްފި އެވެ. މިއަދު، ބައްސާމަށް ދެއްކޭނެ އެއްވެސް ބަހަނާއެއް ނެތެވެ. މިހާރު ކުޅުއްވަމުން އެ ގެންދަވަނީ ޑިފެންސަށެވެ.