ތިން ވަނަ ކެންޑިޑޭޓަކަށް އެފްއޭއެމްގެ ދޮރު ބަންދުކޮށްފި

ފުޓްބޯޅަ އެސޯސިއޭޝަން އޮފް މޯލްޑިވްސްގެ އިންތިހާބަށް ތިން ވަނަ ކެންޑިޑޭޓަކަށް ކުރިމަތިނުލެވޭ ގޮތަށް އެ އިދާރާގެ އަސާސީ ގަވާއިދު ހަދާފައިވާކަން ފަޅާއަރައިފި އެވެ.

އެފްއޭއެމުގެ އަސާސީ ގަވާއިދުގެ އެންމެ ފަހު މާއްދާގައި ލިޔެފައިވަނީ އިންތިހާބަށް ކުރިމަތިލާ ކެންޑިޑޭޓަކު ފުރަތަމަ ޑިވިޝަނުގެ ތިން ކުލަބުގެ ތާއީދު ހޯދަންޖެހޭނެ ކަމަށެވެ. ފުރަތަމަ ޑިވިޝަނުގައި މިވަގުތު އޮތީ އަށް ކުލަބެވެ. މިހެންވެ ގަވާއިދުގެ މި މާއްދާ އޮތް ގޮތުން ތިން ވަނަ ކެންޑިޑޭޓަކަށް ތިން ކުލަބުގެ ތާއީދު ނުހޯދޭނެ މަގު މި އޮތީ ބަންދުކޮށްފަ އެވެ. އަދި މި މާއްދާ މިހެން އޮތުމުން ފުރަތަމަ ޑިވިޝަނުގެ ހަ ކުލަބު އެކަކަށް ތާއީދުކޮށްފިނަމަ އިންތިހާބީ ކޮންގްރެސްގައި އޮންނާނީ އެންމެ ކެންޑިޑޭޓެއްގެ ނަމެވެ. ޖެހޭނީ ފެންނަ ނުފެންނަ ވޯޓު ނަގާށެވެ.

ދެން އޮތީ އެފްއޭއެމުން ފޮރުވައިގެން އުޅޭ އިނގިރޭސި ގަވާއިދާއި ކަމިޝަނަރ އޮފް ސްޕޯޓްސް އަށް ދައްކައި ފާސްކުރި ދިވެހި ތަރުޖަމާގައިވާ ތަފާތެވެ. ކުރިމަތިލާ ކެންޑިޑޭޓަކު ފުރަތަމަ ޑިވިޝަނުގެ ތިން ކުލަބުގެ ތާއީދު ހޯދަންޖެހޭ އެއްވެސް ވާހަކައެއް ދިވެހި ގަވާއިދުގައި ނެތެވެ. ނަމަވެސް މިކަމުގައި އިނގިރޭސި ގަވާއިދުގައިވާ ގޮތަށް އަމަލުކުރަން ޖެހެނީ އެފްއޭއެމުގެ ގަވާއިދުގައި ކަމެއް ފުށުއަރައިފިނަމަ ގޮތް ނިންމަންޖެހޭނީ އިނގިރޭސި ގަވާއިދަށް ބަލައިގެން ކަމަށް ލިޔެފައިވާތީ އެވެ.

އެފްއޭއެމުގެ ކުރިއަށް އޮތް އިންތިހާބަށް ކުރިމަތިލެއްވި ދެ ކެންޑިޑޭޓުންގެ މެދުގައި ޖެހިފައިވާ މައްސަލަ އަކީ ވެސް ގަވާއިދުގައިވާ މި މައްސަލަ އެވެ. ކުރީގެ ގައުމީ ފޯވަޑް އަހުމަދު ތޯރިގް (ޓޮމް) ކުރިމަތިލެއްވީ މާޒިޔާ އާއި ވެލެންސިއާ އަދި ޓީސީގެ ތާއީދާ އެކުގަ އެވެ. ފާޑުކިއުމާއި ހިޔާނާތުގެ ތުހުމަތު ކުރެވިފައިވާ އެފްއޭއެމުގެ މިހާރުގެ ރައީސް ބައްސާމް އަދީލް ޖަލީލްގެ އެކްސްކޯ މެންބަރު މުފާވިޒް ހާޝިމް އަށް ތާއީދުކޮށްފައިވަނީ ޓޮމް އަށް ތާއީދުކޮށްފައިވަނީ ފަސް ކުލަބަކުންނެވެ. އެއީ މުވާވިޒް ނިސްބަތްވާ އީގަލްސް އާއި ގްރީން ސްޓްރީޓްސް އާއި ބުރު ސްޕޯޓްސް ކުލަބާއި ސަސް އާއި ޔުނައިޓެޑް ވިކްޓަރީ އެވެ. މުވާވިޒްގެ ޓީމުން ވަނީ ވެލެންސިއާގެ ބައެއް މެމްބަރުންގެ ސޮޔާއެކު އެކުލަބުގެ ސިޓީއެއް ވެސް ތާއީދު ކުރާ ކަމަށް ފޮނުވައިފަ އެވެ. މިހެންވެ ވެލެންސިއާގެ ސިޓީ ކެންސަލްވެއްޖެނަމަ ޓޮމްގެ ކެންޑިޑެސީ ބާތިލްވާނެ އެވެ.

އެކަމަކު އެފްއޭއެމުގެ ގަވާއިދު އެއް ކުލަބަކުން ދެ ކެންޑިޑޭޓަކަށް ތާއީދު ކުރުން މަނާނުކުރެ އެވެ.