ސަރުކާރު ވަޒީރެއްގެ ރިޝްވަތުގެ ބޮޑެތި ހުށަހެޅުންތަކެއް އެމްޑީޕީގެ ޕީޖީއަށް: "ބޭނުން ކަމެއް ކޮށްދޭނަން"
އަބްދުއްރަހީމް ގުޅުއްވި، ބޭނުންފުޅުވާ ކަންކަން ހިއްސާކުރައްވާފައިވޭ
ހޮނިހިރު ދުވަހު އެމްޑީޕީގެ ޕާލަމެންޓްރީ ގްރޫޕުގެ ފަރާތުން ބޭއްވި ނޫސްވެރިންގެ ބައްދަލުވުމެއްގެ ތެރެއިން
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ކެބިނެޓުގެ ވަޒީރުންނަށް ވަރަށް ބޮޑެތި ތުހުމަތުތަކެއް، ރައްޔިތުންގެ މަޖިލީހުގެ ހެންވޭރު ދެކުނު ދާއިރާގެ މެންބަރު ހުސައިން ޝަހީމް (އަދުން ހުސައިން) ކުރައްވައިފިއެވެ.
ހޮނިހިރު ދުވަހު އެމްޑީޕީގެ ޕާލަމެންޓްރީ ގްރޫޕުގެ ފަރާތުން ބޭއްވި ނޫސްވެރިންގެ ބައްދަލުވުމެއްގައި ހުސައިން ވިދާޅުވީ، ވަޒީރުންނަށް ރުހުން ނުދިނުމަށް އެއްވެސް އިރެއްގައި މަސައްކަތްނުކުރާ ކަމަށެވެ. މި މަސައްކަތާ ގުޅޭގޮތުން ޕީއެންސީގެ ޗެއަރޕަރސަން އަދި ރައީސްގެ އިސް އެޑްވައިޒަރު އަބްދުއްރަހީމް އަބްދުﷲ ގުޅުއްވި ކަމަށާއި، ބޭނުންފުޅުވާ ކަންކަން ހިއްސާކުރައްވާފައި ވާކަމަށެވެ. އަދި އެމްޑީއޭގެ މެންބަރަކުވެސް ގުޅުއްވި ކަމަށާއި، ރުހުން ދޭންޖެހޭ އެންމެ ވަޒީރެއްގެ ނަންފުޅު ހިއްސާކުރައްވާފައި ވާކަމަށް ހުސައިން ވިދާޅުވިއެވެ.
މިސަރުކާރުގެ 4 ބޭފުޅުންނާ ހުކުރު ދުވަހުގެ ރޭ ދިމާވިކަން ފާހަގަކުރައްވައި ހުސައިން ވިދާޅުވީ، ހުކުރު ޚުތުބާ އަމާޒުކޮށްފައިވަނީ ރައީސް މުއިއްޒަށް ކަމަށާއި، އެއީ ކޮށްފައިވާ ފުރައްސާރައެއް ކަމަށް އެބޭފުޅުން ވިދާޅުވިކަމަށެވެ. އެހެންކަމުން އެކަމާ ގުޅުންހުރި ވަޒީރަށް ރުހުން ނުދިމަށް އެބޭފުޅުން އެދިވަޑައިގެންފައި ވާކަމަށް ހުސައިން ވިދާޅުވިއެވެ.
މީގެ އިތުރުން ހުސައިން ވިދާޅުވީ، މިސަރުކާރުގެ ވަޒީރަކު ވަޓްއަޕް ގުރޫޕެއް ހައްދަވައި، އެގޫޕަށް ޕީޖީގެ ހުރިހާ މެންބަރުން އެޑްކުރެއްވުމަށްފަހު، ވިދާޅުވި ކަމެއް ކޮށްދެއްވާނެކަމަށް އެ ގުރޫޕްގައި ވިދާޅުވެފައި ވާކަމަށެވެ. އަދި އެބޭފުޅާގެ އެ މެސެޖް ދެއްވުމަށްފަހު އަމިއްލަފުޅަށް ގުރޫޕް ދޫކޮށްލައްވާފައި ވާކަމަށް ހުސައިން ވިދާޅުވިއެވެ.
ހުސައިން ވިދާޅުވީ މިސަރުކާރުގެ ވަޒީރުންނަށް ރުހުން ދިނުމަށް ދަތިވެގެން ނޫޅޭކަމަށެވެ. ނަމަވެސް ސަރުކާރުގެ ތެރޭގައި ވަރަށް ކަންކަން ހިނގާ ކަމަށާއި، އެބޭފުޅުން އުޅުއްވާ ގޮތުން އުނދަގޫފުޅުވާކަން ހުސައިން ފާހަގަކުރެއްވިއެވެ.
