ހައްޖު ކޯޕަރޭޝަންގެ ޚިދުމަތްތައް މާރކެޓް ކުރުމަށް އެޖެންޓުން ހޯދުމަށް އިއުލާންކޮށްފި
އެޕްލިކޭޝަން ފޯމު 15 ޖަނަވަރީގެ ކުރިން ހުށަހަޅަންޖެހޭ
ހައްޖުވެރިން އެނބުރި ރާއްޖެއަށް އައިދުވަހެއްގައި ސިފައިންނާއި، ހައްޖު ކޯޕްރޭޝަންގެ މުވައްޒަފުން އެހީތެރިކަން ފޯރުކޮށްދެނީ- ފައިލް ފޮޓޯ
މޯލްޑިވްސް ހައްޖު ކޯޕަރޭޝަން ލިމިޓެޑްގެ ޚިދުމަތްތައް މާރކެޓްކުރުމަށް އެޖެންޓުން ހޯދުމަށް އިއުލާންކޮށްފިއެވެ.
ހައްޖު ކޯޕްރޭޝަނުން ބުނީ ޚިދުމަތްތައް އިތުރަށް ފުޅާކޮށް ޚިދުމަތްތަކާގުޅޭ މައުލޫމާތު ފުޅާ ދާއިރާއެއްގައި މުޅި ރާއްޖޭގެ ރައްޔިތުންނަށް ފޯރުކޮށްދިނުމުގެ މަގުސަދުގައި ރާއްޖޭގެ ހުރިހާ އަތޮޅަކާއި ރަށެއް ހިމެނޭގޮތަށް ކުންފުންޏަށް އެޖެންޓުން ހޯދުމަށް އިއުލާންކޮށްފައިވާ ކަމަށެވެ.
އެގޮތުން އެޖެންޓް ކަމަށް އެދި ހުށަހަޅާ ފޯމް، މުއްދަތު ހަމަނުވާ ދިވެހި ރައްޔިތެއްކަން އަންގައިދޭ ކާޑުގެ ކޮޕީ، ވަނަވަރު / ޕްރޮފައިލް، ތަޢުލީމާއި ތަޖުރިބާ އަންގައިދޭ ލިޔެކިޔުންތަކުގެ ކޮޕީ އަދި އަދާކޮށްފައިވާ ނުވަތަ އަދާކުރަމުން ގެންދާ ވަޒީފާ ނުވަތަ ކުރަމުން ގެންދާ މަސައްކަތްތަކާ ގުޅޭ މައުލޫމާތު އެނގޭނެ ރަސްމީ ލިޔުމުގެ ކޮޕީ ހުށަހަޅަންޖެއެވެ.
ހައްޖު ކޯޕްރޭޝަނުން ބުނީ އެޕްލިކޭޝަން ފޯމު 15 ޖަނަވަރީ 2024 ވާ ހޯމަ ދުވަހުގެ 15:00 ގެ ކުރިން ހުށަހަޅަންޖެހޭ ކަމަށެވެ. އަދި އީމެއިލް މެދުވެރިކޮށް އެޕްލިކޭޝަން ފޯމް ހުށަހެޅޭނެ ކަމަށް އެކޯޕްރޭޝަނުން ބުނެއެވެ.
އެޖެންޓު މެދުވެރިވެގެން އުމްރާއަށް ރަޖިސްޓްރީކޮށް އުމްރާ ފުރިހަމަ ކުރާ ކޮންމެ އުމްރާވެރިއެއްގެ ނިސްބަތުން 500 ރުފިޔާގެ ކޮމިޝަނެއް ދިނުމަށްވެސް ހަމަޖެހިފައިވެއެވެ.
