ބިންވެރިންގެ ހައްގުތައް ކަށަވަރުކޮށްދިނުމަށް އެދި އުސްފަސްގަނޑު ސަރަހައްދުގައި ހިމޭން މުޒާހަރާއެއް ކުރިއަށްގެންގޮސްފި

ބިންވެރިންގެ ހައްގުތައް ކަށަވަރުކޮށްދިނުމަށް އެދި، އުސްފަސްގަނޑު ސަރަހައްދަށް ރައްޔިތުންތަކެއް އެއްވެ ހިމޭން މުޒާހަރާއެއް ކުރިއަށްގެންގޮސްފިއެވެ.

ބުރާސްފަތި ދުވަހުގެ ރޭ ޕްރޮގްރެސިވް ކޮންގްރެސް ކޯލިޝަން ލީޑަރު، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ބައިވެރިވެވަޑައިގަންނަވާ ޕްރޮގްރެސިވް ކޮންގްރެސް ކޯލިޝަންގެ ޚާއްސަ ޖަލްސާ ދަރުބާރުގޭގައި ކުރިއަށްދާނެއެވެ.

Advertisement

އުސްފަސްގަނޑާ ދިމާއަށް ވަންނަ ހިސާބުގައި މުޒާހަރާގެ ބައިވެރިން ތިބިއިރު، ރައީސް މުއިއްޒު ޖަލްސާއަށް ވަޑައިގެންފައިވަނީ ބޮޑުތަކުރުފާނު މަގުން ބްރިޖާ ވީ ފަޅިންނެވެ.

އެއްވެ ތިބި އާއްމުން ހިފައިގެން ތިބި ޕޯސްޓަރުތަކުގެ ވަނީ ބިންވެރިންގެ ހައްގުތައް ކަށަވަރު ކޮށްދިނުމަށާއި، ކުރީ ސަރުކާރުގައި ދޫކޮށްފައިވާ ބިންތައް ކޮބައިތޯ ސުވާލު އުފައްދާފައެވެ. އަދި ގުޅީފަޅު ތަރައްގީގެ ބަޖެޓު ކޮބައިތޯވެސް ސުވާލު އުފައްދާފައިވެއެވެ.

ސަރުކާރާ ދެކޮޅަށް ކުރިއަށްގެންދިޔަ ހިމޭން މުޒާހަރާގެ ބައިވެރިންނަށް ދަރުބާރުގެ ކައިރިއަށް ނުވަދެވޭގޮތަށް ފުލުހުން ދިޔައީ އެސަހައްދުގައި ހަރަކާތްތެރިވަމުންނެވެ.

ބިންވެރިންގެ ހައްގުތައް ކަށަވަރުކޮށްދިނުމަށް އެދި އުސްފަސްގަނޑު ސަރަހައްދަށް ރައްޔިތުންތަކެއް އެއްވެ، ސަރުކާރާ ދެކޮޅަށް ހިމޭން މުޒާހަރާއެއް ކުރިއަށްގެންދިޔައިރު، ބިންވެރިޔާ ސްކީމްގެ ދަށުން ހުޅުމާލެ، ގުޅީފަޅު، އަދި ގިރާވަރުފަޅުން ދޫކޮށްފައިވާ ގޯތިތަކާމެދު ސަރުކާރުން އަމަލުކުރަމުންދާ ގޮތުން ވަނީ ސުވާލު އުފެދިފައެވެ. ހުޅުމާލެ ފޭސް-2އިން ދޫކޮށްފައިވާ ބިންތަކުގެ އިންފާރު ވަކިކުރިނަމަވެސް މަސައްކަތް ފެށުމަށް އެސަރަހައްދަށް ނުވަދެވޭކަމުގެ ޝަކުވާ ބޮޑެވެ.

މީގެ އިތުރުން މިސަރަހައްދުތައް ތަރައްގީކުރުމުގެ ބަދަލުގައި މިސަރުކާރުން އަމާޒު ހިފާފައިވަނީ ފުށިދިއްގަރުފަޅު ހިއްކައިގެން ރަސްމާލެ ތަރައްގީ ކުރުމަށެވެ. ގޯތިދޫކޮށްފައިވާ ސަރަހައްދުތައް އާބާދުކުރުމަށް ސަރުކާރުން އެއްވެސް މަސައްކަތެއް މިހާތަނަށް އައިއިރު ކޮށްފައިނުވާތީ ގިނަ އަދަދެއްގެ އާއްމު ރައްޔިތުން ދަނީ ކަންބޮޑުވުން ފާޅުކުރަމުންނެވެ.