ޓެކްސީ ޑްރައިވަރުންގެ މުޒާހަރާ ހޫނުވެ، އިސްކޮށް އުޅުނު ދެ ޑްރައިވަރުން ފުލުހުންގެ ބެލުމުގެ ދަށަށް
ހުޅުމާލެއިން ހައިވޭއަށް 4 ފުރޮޅުލީ ވެހިކަލްތަކަށް ނޭރޭ ގޮތަށް މުޅި ސަރަހައްދުގައި ކާރުތައް ޕާކު ކުރުމަށްފަހު ޑްރައިވަރުން ވަނީ އަޑު އުފުލާފައި
ޓެކްސީ ޑްރައިވަރެއް ފުލުހުންގެ ބެލުމުގެ ދަށަށް ގެންދަނީ
ޓެކްސީ ޑްރައިވަރުންގެ މުޒާހަރާގައި އިސްކޮށް އުޅުނު ދެ ޑްރައިވަރުން ފުލުހުންގެ ބެލުމުގެ ދަށަށް ގެންގޮސްފައިވާ ކަމަށް މުޒާހަރާގެ ބައިވެރިން ބުނެފިއެވެ.
ބުދަ ދުވަހުގެ ހަވީރު ޓެކްސީ ޑްރައިވަރުން ވަނީ އެމީހުންގެ ކަންބޮޑުވުންތައް ސަރުކާރުން އަޑު ނާހާ ކަމަށްބުނެ ސުލްހަވެރި މުޒާހަރާއަށް ނުކުމެފައެވެ. ހުޅުމާލެ ރުށްގަނޑު ޕާކު 1 ގައި ކުރިއަށް ގެންދިޔަ މި މުޒާހަރާގައި ގިނަ އަދަދެއްގެ ޓެކްސީ ޑްރައިވަރުން އެއްވެ ކަންބޮޑުވުން ފާޅުކޮށްފައިވެއެވެ. މި ޑްރައިވަރުންތައް ބުދަ ދުވަހުގެ ހަވީރު 4:00 ގައި މި ސަރަހައްދަށް އެއްވި ނަމަވެސް ފުލުހުން ވަނީ ފުރަތަމަ ހުރަސްއަޅާފައެވެ. ނަމަވެސް ގިނަ އަދަދެއްގެ ޓެކްސީ ޑްރައިވަރުން އެއްވެ، މަގުމަތި ޓްރެފިކް ވުމާއެކު، ޕާކުގެ އެތެރެއަށް ކާރުތައް ވެއްދުމަށް ހުއްދަ ދިނެވެ.
އޭގެފަހުން ބުދަ ދުވަހުގެ ރޭ އިޝާ ނަމާދަށްފަހު ޓެކްސީ ޑްރައިވަރުންތައް ވަނީ މަގުމައްޗަށް އަޑު އުފުލުމަށް ނުކުމެފައެވެ.
އެގޮތުން ހުޅުމާލެއިން ހައިވޭއަށް އަރާ ލޭން ބަންދުވާ ގޮތަށް ޓެކްސީތަކުގައި ޑްރައިވަރުންތައް އެސަރަހައްދަށް އެއްވިއެވެ. ހައިވޭއަށް 4 ފުރޮޅުލީ ވެހިކަލްތަކަށް ނޭރޭ ގޮތަށް މުޅި ސަރަހައްދުގައި ކާރުތައް ޕާކު ކުރުމަށްފަހު ޑްރައިވަރުން ވަނީ އަޑު އުފުލާފައެވެ. ބުދަ ދުވަހުގެ ރޭ 8:45 ހާއިރު އެސަރަހައްދު ޑްރައިވަރުންތައް ބަންދުކޮށްލުމާއި ގުޅިގެން 9:00 ހާއިރު ގިނަ އަދަދެއްގެ އެސްއޯ ފުލުހުން ގޮސް، މުޒާހަރާގައި އިސްކޮށް އުޅުނު ދެ ޑްރައިވަރުން ފުލުހުންގެ ބެލުމުގެ ދަށަށް ގެންގޮސްފައިވާ ކަމަށް މުޒާހަރާގެ ބައިވެރިން ބުނެފައިވެއެވެ. އަދި ޕާކުކޮށްގެން ތިބި ޓެކްސީތަކުގެ މީހުންނާއި ސުވާލުކޮށް އެސަރަހައްދުން ފޮނުވާލާފައިވެއެވެ.
ހުޅުމާލެއިން ހައިވޭއަށް އަރާ ސަރަހައްދު ވަރަށް ބޮޑަށް ޓްރެފިކްވެ، އާއްމުންނަށް ވަނީ ދަތިތައް ކުރިމަތިވެފައެވެ. އެސަރަހައްދު އާއްމު ހާލަތަށް ގެނެސްފައިވަނީ ބުދަ ދުވަހުގެ ރޭ 9:18 ހާއިރެވެ.
ޓެކްސީ ޑްރައިވަރުންގެ މުޒާހަރާގައި އިސްކޮށް އުޅުނު ދެ ޑްރައިވަރުން ފުލުހުންގެ ބެލުމުގެ ދަށަށް ގެންގޮސްފައިވާ މުޒާހަރާގެ ބައިވެރިން ބުނި ނަމަވެސް މިކަމާއި ގުޅޭގޮތުން ފުލުހުންގެ ބަހެއް އަދި ވަނީ ލިބޭ ގޮތް ނުވެފައެވެ.
މުޒާހަރާގައި ބައިވެރިވި ޑްރައިވަރުން ބުނެފައިވަނީ ސަރުކާރަށް ކަންބޮޑުވުންތައް އިއްވާނެ ކަމަށާއި، މައްސަލަތަކަށް ސަރުކާރުން އިޖާބަ ނުދޭނަމަ މުޒާހަރާތައް ކުރިއަށް ގެންދާނެ ކަމަށެވެ.
