''ބޯކަނޑާލެވިދާނެ ކަމަށާއި، ބޯގުދު ނުކުރާނެ'' ކަމަށް ބުނެ، ގިނަ އަދަދެއްގެ ޓެކްސީ ޑްރައިވަރުން ސަރުކާރާ ދެކޮޅަށް މުޒާހަރާކޮށްފިއެވެ.

ހުޅުމާލެ ރުށްގަނޑު ޕާކު 1 ގައި ކުރިއަށް ގެންދިޔަ މި މުޒާހަރާގައި ގިނަ އަދަދެއްގެ ޓެކްސީ ޑްރައިވަރުން އެއްވެ ކަންބޮޑުވުން ފާޅުކޮށްފައިވެއެވެ.

މި ޑްރައިވަރުންތައް ބުދަ ދުވަހުގެ ހަވީރު 4:00 ގައި މި ސަރަހައްދަށް އެއްވި ނަމަވެސް ފުލުހުން ވަނީ ފުރަތަމަ ހުރަސްއަޅާފައެވެ. ނަމަވެސް ގިނަ އަދަދެއްގެ ޓެކްސީ ޑްރައިވަރުން އެއްވެ، މަގުމަތި ޓްރެފިކް ވުމާއެކު، ޕާކުގެ އެތެރެއަށް ކާރުތައް ވެއްދުމަށް ހުއްދަ ދިނެވެ.

ޑްރައިވަރުން ފާހަގަކުރި ބައެއް ކަންބޮޑުވުންތަކުގެ ތެރޭގައި، އެސްއެމްއީ ލޯނުތަކަށް ގެނެސްފައިވާ ކާރުތަކާއި އަދި މިހާރުވެސް މާލެ އެތެރެކުރެވިފައިވާ ކާރުތައް ރީ ރަޖިސްޓްރީ ނުކޮށް އިތުރު ކާރުތައް ގެނެސް ރަޖިސްޓްރީ ކުރުމުގެ މައްސަލަ ހިމެނެއެވެ. ރައީސް ޑރ.މުހައްމަދު މުއިއްޒު ވައުދުވެވަޑައިގެންނެވި ރަޖިސްޓްރީ ކުރާނެ ޕާކިން ސްޕޭސް ކޮބައިތޯއާއި، އަދި ޕާކިން ބިލްޑިންގތައް ކޮބައިތޯ ސުވާލުކޮށްފައިވެއެވެ. އަދި މިނިވަން ވިޔަފާރިއަކަށް ސަރުކާރުން ވަނީ ޓެކްސީ ވިޔަފާރި ހަލާކުކޮށްލައި، ޓެކްސީ ޑްރައިވަރުން ނިކަމެތި ކުރުމަށް ކަމަށް އެމީހުން ބުނެފައިވެއެވެ. ޓެކްސީ ފްލީޓްގެ ބަދަލުގައި މި ޚިދުމަތް ރަނގަޅުކުރުމަށް އެހީތެރިވުމަށް މުޒާހަރާގެ ބައިވެރިން ވަނީ ގޮވާލާފައެވެ.

ޓެކްސީ ޑްރައިވަރުން އާއްމު ރައްޔިތުންނަށް އުނދަގޫކޮށް، ނުއަގުގައި ޚިދުމަތަށް ފައިސާ ނަގާކަމަށް ކުރެވޭ ތުހުމަތުތަކަށް ވެސް މި މުޒާހަރާގެ ބައިވެރިވި ޑްރައިވަރުން ވަނީ ރައްދު ދީފައެވެ. އެމީހުން ބުނެފައިވަނީ އަބަދުވެސް މަސައްކަތް ކުރަމުންދަނީ ރައްޔިތުންނަށް ރަނގަޅު ޚިދުމަތެއް ދިނުމަށް ކަމަށާއި، ނުއަގުގައި ފައިސާ ނުނަގާ ކަމަށެވެ. އަދި ރައްޔިތުން އެދޭނަމަ ޓެކްސީގައި މީޓަރު ހަރުކުރުމަށް ވެސް ތައްޔާރަށް ތިބި ކަމަށް އެމީހުން ބުނެފައިވެއެވެ.

މީގެ އިތުރުން ޓްރާންސްޕޯޓް މިނިސްޓަރު މުހައްމަދު އަމީން ޓެކްސީ ޑްރައިވަރުންގެ ކަންބޮޑުވުންތައް އަޑުއަހައި، ހައްލު ހޯދައިދިނުމަށް ގޮވާލާފައިވެއެވެ. އަދި ރައްޔިތުންގެ އަޑު ނާހާ ކަމަށްވާނަމަ އިސްތިއުފާ ދެއްވަންޖެހޭ ކަމަށާއި، މަގާމަށް ކުފޫ ހަމަނުވާ ކަމަށް ޑްރައިވަރުން ބުނެފައިވެއެވެ. އަދި ރައީސް މުއިއްޒު ޑްރައިވަރުންނާއި ބައްދަލުކުރެއްވުމަށް ނިންމެވުމަށްފަހު، އެކަން ކެންސަލް ކޮށްފައިވާތީ އެކަމުގެ ކަންބޮޑުވުން ވެސް ޑްރައިވަރުން ވަނީ ކޮށްފައެވެ.

ރައީސް މުއިއްޒުގެ ސަރުކާރަށް އަހަރެއް ވެގެންދިޔައިރު، ޓެކްސީ ޑްރައިވަރުންގެ ކަންބޮޑުވުންތަކެއް ހައްލެއް ހޯދައިދެވިފައިނުވާ ކަމަށާއި، މިސަރުކާރުގެ ވަރަށް ބޮޑު ފެއިލްވުމެއް ކަމަށް އެމީހުން ބުނެއެވެ. އަދި މިހާރު މިސަރުކާރަށް އަދި މިނިސްޓަރު އަމީނަށް އިތުބާރު ގެއްލިފައިވާ ކަމަށެވެ. ޓެކްސީ ޑްރައިވަރުން ބުނެފައިވަނީ މައްސަލަތަކަށް ހައްލެއް ނުލިބޭނަމަ، ކަންބޮޑުވުންތައް އަޑު ނާހާނަމަ ސިލްސިލާ މުޒާހަރާތަކެއް ކުރިއަށް ގެންދާނެ ކަމަށެވެ.