ބައްސާމް ގޮތް ދޫނުކޮށް، އިންތިޚާބު ކުރިއަށް ގެންދަނީ

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ އިންތިޚާބު ކުރިއަށް ނުގެންގޮސް، މަޑު ޖައްސާލުމަށް ކޮނިޝަނަރ އޮފް ސްޕޯޓްސް އިން އެންގި ނަމަވެސް، އިންތިޚާބު ކުރިއަށް ގެންދާނެ ކަމަށް އެ އިދާރާ އިން ބުނެފި އެވެ.

ބުރާސްފަތި ދުވަހު ސްޕޯޓްސް ކޮމިޝަނުން ނެރުނު ބަޔާނެއްގައި ބުނެފައިވަނީ އެފްއޭއެމްގެ އިންތިޚާބުގެ ކަންކަން މަޑު ޖައްސާލުމަށް އެ އިދާރާ އަށް އަންގާފައިވާނެ ކަމަށެވެ. ނޫސް ބަޔާނުގައި ބުނެފައި ވަނީ އެފްއޭއެމުގެ އެކްސްކޯގެ ނުވަ މެމްބަރުންގެ ތެރެއިން ފަސް މެމްބަރުން އިސްތިއުފާ ދީފައިވާތީވެ، މިހާރު ކޯރަމް ގެއްލިފައިވާ ކަމަށެވެ. އަދި އެ އިދާރާގެ ޖެނެރަލް ސެކްރެޓަރީ ވެސް އިސްތިއުފާ ދީފައިވާ ކަމަށާއި، އެސޯސިއޭޝަން މިވަގުތު ހިނގަމުންދަނީ އަސާސީ ގަވާއިދާ ޚިލާފަށް ކަމަށެވެ. މިހެންވެ ދުނިޔޭގެ ފުޓްބޯޅަ ޖަމިއްޔާ (ފީފާ) އާއި އޭޝިޔާގެ ފުޓްބޯޅަ ޖަމިއްޔާ (އޭއެފްސީ)އާ މަޝްވަރާކޮށް ގޮތެއް ނިންމަންދެން އެފްއޭއެމް އިންތިހާބު ކުރިއަށް ނުގެންދިއުމަށް އެފްއޭއެމަށް އަންގާފައިވާ ކަމަށެވެ. މީގެ އިތުރުން ނޫސް ބަޔާނުގައި ވަނީ އެފްއޭއެމް އެކްސްކޯ އަށް އައިސްފައިވާ އެއްވެސް ބަދަލެއްގެ ތަފްސީލް ވެސް މިނިސްޓްރީ އާއި ކަމިޝަނަރާ ހިއްސާކޮށްފައިނުވާ ކަމަށެވެ.

އެ ބަޔާން ނެރުންތާ އިރުކޮޅެއްގެ ތެރޭގައި އެފްއޭއެމުން ވަނީ ބަޔާނެއް ނެރެފަ އެވެ. އެ ބަޔާނުގައި އެފްއޭއެމުން ބުނެފައި ވަނީ، އެފްއޭއެމްގެ ހިންގާ ކޮމެޓީގެ އަޣުލަބިއްޔަތު ގެއްލިފައި ނުވާ ކަމަށެވެ. އަދި ދިވެހިރާއްޖޭގެ ކުޅިވަރުގެ ޤާނޫނާއި، ޖަމިއްޔާތަށް ރަޖިސްޓްރީކޮށް ހިންގުމާ ބެހޭ ގަވާއިދުގެ ދަށުން، އެ އެސޯސިއޭޝަންގެ ހިންގާ ކޮމެޓީ އަށް އައްޔަންކޮށްފައިވާ މެމްބަރުންނަށް މަސްއޫލިއްޔަތު އަދާ ކުރުމަށް އެއްވެސް ހުރަހެއް ނެތް ކަމަށެވެ. އަދި ހަމަ އެހެންމެ، މެމްބަރުންގެ ޞައްހަކަމާމެދު އެއްވެސް ސުވާލެއް ނެތް ކަމަށް ވެސް ވަނީ ބުނެފަ އެވެ. އެހެންކަމުން އެފްއޭއެމްގެ ރައީސްކަމުގެ މަޤާމު ހުސްވެފައި ނުވާ ކަމަށް ވެސް ވަނީ ފާހަގަކޮށްފަ އެވެ.

އޭގެ ފަހުން އެފްއޭއެމްގެ ރަސްމީ މީޑިއާ ގުރޫޕުގައި ނޫސްވެރިޔަކު ކުރި ސުވާލަށް ޖަވާބު ދެއްވަމުން، އެ އިދާރާގެ ވަގުތީ ޖެނަރަލް ސެކްރެޓަރީ މުޙައްމަދު ޖައުޝަން ޝަރީފް ވިދާޅުވީ، ސްޕޯޓްސް ކޮމިޝަނުން ނެރެފައިވާ ބަޔާނުގައިވާ މައުލޫމަތަކީ އެންމެ ޞައްހަ މައުލޫމާތު ނޫން ކަމަށެވެ. ހަމައެއާއެކު ކޮމިޝަނުން ފޮނުވާފައިވާ ސިޓީ އަށް އެފްއޭއެމުން ޖަވާބު ދީފައިވާނެ ކަމަށާއި، އިންތިޚާބުގެ ކަންކަން ހުއްޓާ ނުލާ ކުރިއަށް ގެންދާނެ ކަމަށް ވެސް ވަނީ ވިދާޅުވެފަ އެވެ.

އެފްއޭއެމްގެ އިންތިޚާބު އަންނަ ޖަނަވަރީ މަހުގެ 31 ވަނަ ދުވަހު ބާއްވަން އެ އިދާރާ އިން އޮތީ އިއުލާންކޮށްފަ އެވެ. އެ އިންތިޚާބުގައި ވާދަކުރެއްވުމަށް ފޯމު ހުށަހެޅުއްވީ ދެ ފަރާތަކުންނެވެ. އެއީ އެފްއޭއެމްގެ ކުރީގެ ރައީސް އަދި މަހިބަދޫ ދާއިރާގެ މެމްބަރު އަޙުމަދު ޠާރިޤު (ޓޮމް) އަދި އެފްއޭއެމްގެ މިހާރުގެ ހިންގާ ކޮމެޓީގައި ހިމެނިވަޑައިގަންނަވާ ކުލަބު އީގަލްސްގެ ވައިސް ޗެއާމަން މުފާވިޒު ހާޝިމް (މުފާ) އެވެ.