އެފްއޭއެމުގެ އިންތިޚާބު ބާއްވަން އިއުލާނުކުރި އެކްސްކޯގެ ބައްދަލުވުމުގެ މައުލޫމާތު ހޯދަން ކަމިޝަނަރ އޮފް ސްޕޯޓްސްއިން ފޮނުވި ސިޓީއަށް ޖަވާބުދާރީނުވެ، އެފްއޭއެމުން ހިމޭންވެއްޖެއެވެ.
މިކަން ހިނގިއިރު، ކޮރަޕްޝަނުގެ ތުހުމަތު ކުރެވި، އެފްއޭއެމުގެ ރައީސް ބައްސާމް އަދީލްގެ ޕާސްޕޯޓް ވަނީ ހިފަހައްޓާފައެވެ. އަދި އޭނާގެ މައްސަލަ ފުލުހުންދަނީ ބަލަމުންނެވެ.
ކަމިޝަނަރ އޮފް ސްޕޯޓްސް އެދިފައިވަނީ އެފްއޭއެމުގެ އިންތިޚާބު ބާއްވަން ނިންމި އެކްސްކޯގެ ހަތް ކަމެއް އޮޅުން ފޮލުވައިދިނުމަށެވެ. އެއީ އެކްސްކޯ ޔައުމިއްޔާއާއި، އެކްސްކޯގެ ބައްދަލުވުން ބޭއްވި ތަނާއި ވަގުތާއި، ބައްދަލުވުމަށް ހާޒިރުވި މެމްބަރުންނާއި، ނިންމި ނިންމުންތަކެވެ. މި މައުލޫމާތު އެފްއޭއެމުން ކަމިޝަނަރ އޮފް ސްޕޯޓްސްއަށް ފޮނުވަން ދީފައިވަނީ އިއްޔެގެ ނިޔަލަށެވެ. ނަމަވެސް އިތުބާރުހުރި މަސްދަރަކުން ވަނީ، އެފްއޭއެމުން މިކަމަށް ޖަވާބުދާރީ ނުވިކަން ޔަގީންކޮށްދީފައެވެ. މިކަމުގައި އެފްއޭއެމުގެ ބަހެއް ލިބޭގޮތެއް ނުވެއެވެ.
އިތުބާރުހުރި، އަދި ލީކުވެފައިވާ ސްކްރީން ޝޮޓްތަކުން ޔަގީންވެފައިވާ ގޮތުގައި އެފްއޭއެމުން އެކްސްކޯ ބައްދަލުވުން ބާއްވާފައެެއްނުވެއެވެ. އިލެކްޝަން އިއުލާންކޮށްފައިވަނީ ވަޓްސްއަޕް ގްރޫޕެއްގައި މަޝްވަރާކުރުމަށްފަހުއެވެ. އަދި މިކަން ކުރިއިރު އެފްއޭއެމުގެ އިންތިޚާބީ ނުވަ މެމްބަރުންގެ ތެރެއިން ފަސް މެމްބަރުން ވަނީ އިސްތިއުފާދީފައެވެ.
ނަމަވެސް އެއިދާރާއިން މިއަދު ވަނީ އަންނަ މަހު އިންތިޚާބު ބާއްވަން ނިންމައި، ކެނޑިޑޭޓުންގެ ފޯމުތައް ބަލައިގެންފައެވެ.
މުސާރަނުދެވި، އެތައް މަހެއްވުމާއި، ހިންގުން ދޯދިޔާވުމާއި، ދަރަނި ބޮޑުވެ، ފާޑުކިއުން އަމާޒުވެ، އެކްސްކޯގެ އިންތިޚާބީ މެމްބަރުންގެ ކޯރަމް ގެއްލިފައިވާއިރު، ބައްސާމް މަގާމުގައި ހުންނަވައިގެން އިންސާފުވެރި އިންތިޚާބެއް ބާއްވަން ދަތިކަމަށް ބުނެ ފުޓްބޯޅައިގެ ގިނަ ފަރާތްތަކުން އަންނަނީ ފާޑުކިޔަމުންނެވެ.
