ފްލެޓުގެ މައްސަލަ: އޭސީސީއަށް އެއްވި އާއްމު ރައްޔިތުންނާއި ކޮމިޝަންގެ މެންބަރުން ބައްދަލެއް ނުކުރި
ފްލެޓުގެ މައްސަލާގެ ތަހުގީގު ހުއްޓުމެއް ނެތި ކުރިއަށްދޭ
އޭސީސީއަށް އެއްވި ބައެއް އާއްމު ރައްޔިތުން
ކުރީ ސަރުކާރުން ފެށި ގެދޮރުވެރިޔާ ސްކީމުގެ ދަށުން ދޫކުރާ ފްލެޓުތަކުގެ މައްސަލަ ނުނިމި ލަސްވާތީ އެންޓި ކޮރަޕްޝަން ކޮމިޝަން (އޭސީސީ)އަށް ގިނަ އަދަދެއްގެ ބަޔަކު އެއްވެ ނުރުހުން ފާޅުކޮށްފިއެވެ.
މިމައްސަލައާ ގުޅިގެން ފްލެޓު ލިބުނު ގިނަ އަދަދެއްގެ ރައްޔިތުންތަކެއް ވަނީ ބުދަ ދުވަހުގެ ހެނދުނު ހައުސިން މިނިސްޓްރީއަށް ގޮސްފައެވެ. އަދި މި މައްސަލާގައި ކުރިއަށް ދެވޭނީ އޭސީސީން ގޮތެއް ނިންމުމުން ކަމަށް ހައުސިން މިނިސްޓްރީން މައުލޫމާތު ދީފައިވާ ކަމަށް އެމީހުން ބުނެއެވެ. އަދި ހައުސިން މިނިސްޓްރީން މިމަސައްކަތް އަވަސްކޮށްދިނުމަށް އެދި އޭސީސީއަށް ދެފަހަރެއްގެ މަތިން ސިޓީ ފޮނުވާފައިވާ ކަމަށާއި، މަސައްކަތް ކުރިއަށްދާ ގޮތުގެ ޓައިމްލައިން ހިއްސާކޮށްދިނުމަށް އެދިފައިވާ ކަމަށެވެ. ނަމަވެސް އަދި އޭސީސީގެ ފަރާތުން އެއްވެސް ޖަވާބެއް ލިބިފައިނުވާ ކަމަށް ހައުސިން މިނިސްޓްރީން މައުލޫމާތު ދީފައިވާ ކަމަށް އެމީހުން ބުނެއެވެ.
އިތުރަށް މައުލޫމާތު ސާފުކުރަން ބޭނުންވާތީ އެމީހުން ވަނީ އޭސީސީއަށް ގޮސްފައެވެ. އޭސީސީއަށް ގޮސް ދެ ގަޑިއިރު މަޑުކޮށް ނުރުހުން ފާޅުކުރި ނަމަވެސް އެސީސީގެ އިސް އެއްވެސް ބޭފުޅަކާއި ބައްދަލުވާ ގޮތެއް ނުވިއެވެ.
މިމައްސަލައާ ގުޅިގެން ކަންބޮޑުވުންފާޅުކުރި އިސްމާއީލް ނާއިފް ބުނީ އޭސީސީ މިމައްސަލަ ދިގުދަންމާތީ ގިނަ އަދަދެއްގެ ރައްޔިތުންގެ ހައްގު ގެއްލޭ ކަމަށެވެ. ޕޯޓަލްގެ އެކްސެސް 10 ޑިސެންބަރު 2023 ގައި ލިބިފައިވާއިރު، މިމައްސަލާގެ އެންމެފަހުގެ މައުލޫމާތު ހިއްސާކުރަންޖެހޭ ކަމަށެވެ. ދިގުދެމިގެންދާ ކޮންމެ ދުވަހަކީ ހާލަތު ބަދަލުވާނެ ދުވަހެއް ކަމަށް އެނާ ބުނެފައިވެއެވެ.
ނާއިފް ބުނީ ފްލެޓް ލިބުނު މީހުންގެ ތެރޭގައި ފާއިތުވެދިޔަ 3 ސަރުކާރުގައި ވެސް ފްލެޓުގެ ލިޔުން ލިބުނު ނަމަވެސް ފްލެޓް ފަހު ވަގުތު އަތުން ގެއްލުނު މީހުން އުޅޭ ކަމަށެވެ. އެހެންކަމުން މިމައްސަލަ ދިގުލައިގެން ދިއުމަކީ ވަރަށް ބޮޑު ކަންބޮޑުވުމެއް ކަމަށް އޭނާ ބުނެފައިވެއެވެ.
މީގެ އިތުރުން ނާއިފް ބުނީ މި މަސައްކަތް ކުރިއަށްދާނެ ގޮތުގެ ޓައިމްލައިނެއް ދޭނެ ކަމަށް އޭސީސީން ބުނެފައިވާ ކަމަށާއި، ޓައިމްލައިން ހިއްސާކޮށްފައިނުވާތީ ކަންބޮޑުވާ ކަމަށެވެ. އޭސީސީގެ މެންބަރުންނާއި ބުދަ ދުވަހު ބައްދަލުކުރުމަށް މަސައްކަތް ކުރި ނަމަވެސް އެކަން ކާމިޔާބުވެފައިނުވާ ކަމަށާއި، ފޯނަށް ޖަވާބު ވެސް ނުދޭ ކަމަށް އޭނާ ބުނެފައިވެއެވެ.
މިމައްސަލައާ ގުޅިގެން ރާއްޖެއެމްވީއަށް އޭސީސީން ބުނީ ފްލެޓުގެ މައްސަލާގެ ތަހުގީގު ހުއްޓުމެއް ނެތި ކުރިއަށްދާ ކަމަށާއި، ވަރަށް އަވަހަށް މައްސަލަ ނިންމުމަށް މަސައްކަތް ކުރަމުންދާ ކަމަށެވެ. ނަމަވެސް މިދަނޑިވަޅުގައި މަސައްކަތް ކުރިއަށްދާ ގޮތުގެ ޓައިމްލައިން ހިއްސާކުރުމަށް ދަތި ކަމަށް އޭސީސީން ބުނެއެވެ.
