އެފްއޭއެމްގެ ރައީސްކަމަށް މުފާ ވެސް ވާދަކުރައްވަނީ

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސްކަމަށް ވާދަކުރެެއްވުމަށް މުފާވިޒް ހާޝިމް (މުފާ) ފޯމު ހުށަހަޅުއްވައިފި އެވެ.

އަންނަ ޖަނަވަރީ މަހު އޮންނަ އިންތިޚާބުގައި ވާދަކުރެއްވުމަށް މުފާ ފޯމު ހުށަހެޅުއްވީ ބުދަ ދުވަހު އެވެ. މުފާ އަކީ ކުލަބު އީގަލްސްގެ ވައިސް ޗެއާމަން އެވެ. އެފްއޭއެމްގެ މިހާރުގެ ހިންގާ ކޮމެޓީގައި ވެސް މުފާ ހިމެނެ އެވެ.

މުފާގެ އިތުރުން ހިންގާ ކޮމެޓީގައި ހިމެނެނީ، ސީނިއާ ނައިބު ރައީސްކަމަށް މުޙައްމަދު އަޙުސަން، ނައިބު ރައީސް ކަމަށް މުއާވިޔަތު ޚަލީލް (މުއާބެ) އެވެ. މީގެ އިތުރުން ދެން ހިމެނެނީ އަޙުމަދު ޝަކީބް (ޑޮކް)، މުޙައްމަދު ޙަސަން، ޙަސަން އަދުހަމް، އަރުޝަދު އަޝްރަފް، މަރިޔަމް މިރްފަތު އަދި އިސްމާއީލް ޝަފީއު އެވެ.

އެފްއޭއެމްގެ އިންތިޚާބުގައި ވާދަކުރުމުގެ ފުރުސަތު މިއަދު ހަމަވާނެ އެވެ. މިހާތަނަށް ފޯމު ހުށަހަޅުއްވާފައި ވަނީ މުއާގެ އިތުރުން، އެފްއޭއެމްގެ ކުރީގެ ރައީސް އަޙުމަދު ޠާރިޤު (ޓޮމް) އެވެ.