އެފްއޭއެމް އިންތިޚާބު: މަކަރާއި އޮޅުވާލުމުގެ ތެރޭގައި

ފުޓްބޯޅަ އެސޯސިއޭޝަންގެ ހިންގުން ބޮއްސުންލައި، މުވައްޒަފުންނަށް 10 މަސް ދުވަހުގެ މުސާރަނުދެވި، ފާޑުކިއުން އޮހެން ފަށައި، ރައީސް ކަމުން ބައްސާމް އަދީލް ޖަލީލް އިސްތިއުފާ ދިނުމަށް އެތައް ބަޔަކު ގޮވަމުން ދިއުމާއެކު މިހާރު ވަނީ އައު އިންތިޚާބެއް އިއުލާނުކޮށްފައެވެ. މިއީ ފާޑަކަށް މަޖުބޫރުން ކުރި ކަމެކެވެ. އެއީ ބައްސާމް އެފްއޭއެމްގެ ފައިސާއަށް ޚިޔާނާތްތެރިކަމުގެ ތުހުމަތުގައި ފުލުހުން އެފްއޭއެމް ބަލައި ފާސްކުރުމަށްފަހު، ފެށި ތަހުގީގާއެކު ބައްސާމްގެ ޕާސްޕޯޓް ހިފެހެއްޓުމުންނެވެ.

މިވަގުތުވެސް އެފްއޭއެމް ހިންގަމުންދަނީ ބައްސާމެވެ. އިސްތިއުފާއެއް ނުދެއްވައެވެ. ގެންދަވަނީ ގޮނޑިކޮއްކޮ ރައީސަކު ގެނައުމަށް މަސައްކަތް ކުރައްވަމުންނެވެ.

މިކަން ޔަގީންވާ ވަރަށް ގިނަ ސަބަބުތައް އެބަހުއްޓެވެ. އެންމެ ބޮޑު ސަބަބަކީ އިލެކްޝަނަށް ކުރިމަތިލާ ފަރާތްތަކުން ފޯމު ހުށަހަޅަންޖެހޭ މުއްދަތު މާދަމާ ހަމަވާއިރު، އިންތިޚާބާގުޅޭ އެއްވެސް މައުލޫމާތެއް އިސްވެ އެފްއޭއެމުން އިއުލާނުކޮށްފައި ނެތުމެވެ. މިކަމާ ގުޅިގެން ސުވާލުކުރުމުން ޖަވާބެއްވެސް ނުދެއްވަނީއެވެ.

އެފްއޭއެމް އިންތިޚާބުގައި އޮޅުވާލުމާއި މަރަކާއި ހިމެނޭކަން ސާބިތުކޮށްދޭ އެއް ކަމަކީ އިންތިޚާބު ބާއްވަން ނެގި އިލެކްޓޯރަލް ކޮމިޓީ މިއަދާ ހަމައަށް އިއުލާންކޮށްފައި ނުވުމެވެ. 17 ޑިސެމްބަރުގައި އިއުލާންކުރި އިންތިޚާބުގެ ކަންކަން އޮޅުފިލުވައި ނުދީ މިއަދަށް މިއީ 9 ވަނަ ދުވަހެވެ. އެކަމަކު އިލެކްޓޯރަލް ކޮމިޓީގައި ތިބި ބަޔަކުވެސް އެނގޭނެ އެއްވެސް ގޮތެއްނެތެވެ.

ދެވަނަ ކަމަކީ، އިންތިޚާބުގައި ވޯޓު ލުމުގެ ހައްގު ލިބިގެންވާ ފަރާތްތައް ވެސް ސިއްރުކޮށްފައި އޮތުމެވެ. އިންތިޚާބުގައި ވޯޓުލުމުގެ ހައްގު ލިބެނީ ކިތައް ކުލަބަށް ކަމެއް ޔަގީނެއްނޫނެވެ. މިހާތަނަށް ކަށަވަރުވެފައިވާ ހަމައެކަނި ކަމަކީ ފުރަތަމަ ޑިވިޝަނުގައި އޮތް 8 ޓީމަށް ވޯޓުލެވޭނެކަމެވެ. އެފްއޭމުގެ އަސާސީ ގަވާއިދުގެ 22 ވަނަ މާއްދާގައި، އެކި ޑިވިޝަންތަކަށް ވޯޓުލެވޭގޮތް ކަނޑައަޅާފައިވާއިރު، ދެވަނަ ޑިވިޝަނުން އެ ފުރުސަތު ލިބެނީ 10 ކުލަބަށެވެ. އެކަމަކު މިއަދު ހަވީރު ފަށާ ދެވަނަ ޑިވިޝަނުގައި 15 ކުލަބު ބައިވެރިކޮށްފައިވެއެވެ.

ތިންވަނަ ކަމަކީ އެފްއޭއެމުން މެމްބަރުކަން ދީފައިވާ ކުލަބުތަކާއި މެމްބަރުކަމުން އެކި ސަބަބުތަކާހުރެ ވަކިވެފައިވާ ކުލަބުތަކުގެ ތަފްސީލުވެސް އެނގެން ނެތުމެވެ. މިއިން ކަމަކާބެހޭ ގޮތުން ޖަވާބުދާރީވާނެ މީހަކުވެސް ނެތުމެވެ.

ހަތަރުވަނަ ކަމަކީ އެފްއޭއެމުގައި މިހާރުވެސް ބައްސާމާއެކު މަސައްކަތް ކުރާ ފަރާތްތައް އިންތިހާބަށް ނުކުންނަން ތައްޔާރުވަމުން ދިއުމެވެ. މިހެންވެ މުއްދަތު ހަމަވާފަހުން ލިޔެކިއުން ބަދަލު ކުރުމުގެ ފުރުސަތު އެބައޮތެވެ. މީގެ ކުރީ އިންތިޚާބުތަކުގައި އެކަންކަން ކޮށްފައިވާ ކަމުގެ ތުހުމަތު ވަނީ ކުރެވިފައެވެ.

މިހެންވެ އެފްއޭއެމުގެ އިންތިޚާބު ސައްހަކުރުމަށް ކުލަބުތަކުންނާއި ކަމިޝަނަރ އޮފް ސްޕޯޓްސްއާއި ކުޅިވަރާބެހޭ ވަޒީރު އިސްނަންގަވަން ޖެހެއެވެ.