ހުޅުމާލޭ 2 ވަނަ ފިޔަވަހީގެ ބަންދުކޮށްފައިވާ ސަރަހައްދަށް، ޒަރޫރީ ބޭނުމަކު ނޫނީ ނުވަދެވޭނެ: އާބަންކޯ

ޒަރޫރީ ބޭނުމަކާނުލައި ހުޅުމާލޭ ދެވަނަ ފިޔަވަހީގެ ބަންދުކޮށްފައިވާ ސަރަހައްދަށް ނުވަދެވޭނެކަމަށް އާބަންކޯއިން ބުނެފިއެވެ.

އާބަންކޯއިން ހޯމަ ދުވަހު ނެރުނު ބަޔާނެއްގައި ބުނީ، މިދުވަސްވަރަކީ މަދިރީގެ ޒަރީއާއިން ފެތުރޭ ބަލިތައް ގިނަ، ހުޅުމާލޭގައިވެސް މަދިރި ގިނަވެފައިވާ ދުވަސްވަރެއްކަމުން، ހުޅުމާލޭގެ ފޭސް 2ގައި ބަންދުކޮށްފައިވާ ސަރަހައްދަކީ ކޮންސްޓްރަކްޝަން މަސައްކަތުގެ އިތުރުން، ހުސްބިންތަކުގައި ބޮޑެތި ގަސްތަކާއި ވިނަ ހުރި ސަރަހައްދެއް ކަމަށެވެ.

އެހެންކަމުން މަދިރި ގިނަވުމާއެކު، ސިއްހީ ދާއިރާގެ ޚިދުމަތްތެރިން ދަނީ، މިކަމަށް ޚާއްސަ ސަމާލުކަމެއް ދިނުމަށް ތަކުރާރުކޮށް އިލްތިމާސް ކުރަމުން ކަމަށާއި، އެއާއެކު އެ ސަރަހައްދުގައި މަސައްކަތްކުރާ ފަރާތްތަކުން މިކަމަށް އިތުރަށް ސަމާލުކަން ދިނުމަށް އެ ކޯޕަރޭޝަނުން އެދޭކަމަށެވެ.

އާބަންކޯއިން އިތުރަށް ބުނީ، ފޭސް ދޭއްގައި ބަންދުކޮށްފައިވާ ސަރަހައްދަކީ އާންމުންނަށް ހުޅުވާލެވިފައިވާ ސަރަހައްދެއް ނޫންކަމަށާއި، އެހެން ނަމަވެސް މަދުން ނަމަވެސް އާންމުން މި ސަރަހައްދަށް ވަންނަކަން އެ ކޯޕަރޭޝަނަށް ފާހަގަކުރެވިފައި ވާކަމަށެވެ.

އަދި ތަކުރާރުކޮށް އެކި ފަހަރުމަތިން އެ ސަރަހައްދަށް ނުވަނުމަށް އެ ކޯޕަރޭޝަނުން އިލްތިމާސްކޮށްފައި ވާކަމަށްވެސް އެ ބަޔާނުގައި ބުންޏެވެ.

އެހެންކަމުން، ހުއްދައެއްނެތި ޒަރޫރީ އެއްވެސް ބޭނުމަކާނުލައި އެ ސަރަހައްދަށް ނުވަނުމަށް އަންގައި އިއުލާންކުރާކަމަށް އެ ބަޔާނުގައި ބުންޏެވެ. އަދި އެފަދަ ކަންކަމުގައި އެ ކޯޕްރޭޝަނަށް ލިބޭ އެއްބާރުލުން ފާހަގަކޮށް، އެންމެހާ ރައްޔިތުންނަށް އާބަންކޯއިން ވަނީ ޝުކުރު އަދާކޮށްފައެވެ.