ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ގެ ހިންގާ ކޮމެޓީން އިތުރު ތިން މެމްބަރުން އިސްތިއުފާ ދެއްވައި، ރައީސް ބައްސާމް އަދީލް ޖަލީލްގެ އިތުބާރު ގެއްލުވާލައްވައިފިއެވެ.

މީގެ ކުރިން އެފްއޭއެމްގެ ހިންގާ ކޮމެޓީން ދެ މެމްބަރަކު ވަނީ އިސްތިއުފާ ދެއްވާފައެވެ. އެއީ މުއާވިޔަތު ހަލީލް (މުއާބެ) އަދި ހުސައިން ޝާފިއު (ކޮއްކީ)އެވެ. އޭގެ ފަހުން މި މަހުގެ 15 ވަނަ ދުވަހު އިތުރު ތިން މެމްބަރުން ވަނީ އިސްތިއުފާގެ ސިޓީ ހުށަހަޅުއްވާފައެވެ. އެއީ މުހައްމަދު ޝިފާއު، އާމިނަތު ޝަނީޒް އަދި އަހުމަދު ނަޝީދު (ޑޭވް) އެވެ.

އެފްއޭއެމްގެ ހިންގާ ކޮމެޓީން މިހާތަނަށް ފަސް މެމްބަރުން އިސްތިއުފާ ދެއްވާފައިވާއިރު، ބާކީ ތިއްބެވީ ފަސް މެމްބަރުންނެެވެ. އެއީ ބައްސާމްގެ އިތުރުން ނައިބު ރައީސް އަލީ އުމަރު، މުފާވިޒް ހާޝިމް (މުފާ) އަދި އަހްމަދު ޝަކީބެވެ. ދެން އިންނަވާނީ ދާދި ފަހުން ހިންގާ ކޮމެޓީއަށް އައްޔަންކުރެއްވި އަބްދުﷲ ޝިބާއު (ޝިބާ)އެވެ.

ނަމަވެސް މީގެ ތެރެއިން ޝިބާއަށް ވޯޓު ދިނުމުގެ ހައްގެއް، ނުވަތަ އެއްވެސް ހައިސިއްޔަތެއް ނޯންނާނެއެވެ. އެފްއޭއެމްގެ އަސާސީ ގަވާއިދު ބުނާގޮތުން، ހިންގާ ކޮމެޓީން މެމްބަރަކު އިސްތިއުފާ ދީފިނަމަ، އެ މަގާމަށް މީހަކު އިންތިޚާބުކުރަން ޖެހެނީ އޯޑިނަރީ ކޮންގްރެސްއަކުންނެވެ. އެހެންކަމުން އެފަދަ ކޮންގްރެސްއަކުން މެނުވީ ޝިބާއަށް އެއްވެސް ހައިސިއްޔަތެއް ނުލިބޭނެއެވެ.

އެފްއޭއެމްގެ ހިންގާ ކޮމެޓީން މެމްބަރުންތައް އިސްތިއުފާ ދެއްވާފައިވާއިރު، އަންނަ މަހު އެ އެސޯސިއޭޝަންގެ އިންތިޚާބު ބާއްވަންވެސް އޮތީ އިއުލާންކޮށްފައެވެ. އެހެންނަމަވެސް، އެ އިންތިޚާބުގެ ކަންކަން ސާފުކުރުމަށް ކޮމިޝަނަރ އޮފް ސްޕޯޓްސްއިން މިހާރު ވަނީ އެފްއޭއެމްގައި އެދިފައެވެ.

އެފްއޭއެމްގެ ހިންގުމުގައި ބޮއްސުންލައި، އެ އިދާރާ ވަނީ ބަނގުރޫޓުވުމާ ކައިރިވެފައެވެ. އެގޮތުން އެ އިދާރާއަށް އެކި ގޮތްގޮތުން ލިބެމުން އަންނަ ފައިސާއަށް އެ އިދާރާގެ ވެރިން ޚިޔާނާތްތެރިވާކަމުގެ ތުހުމަތު ކޮށްފައިވެއެވެ. އެ މައްސަލައިގެ މައިގަނޑު ސަސްޕެކްޓަކީ ބައްސާމް ކަމަށް ޕްރޮސެކިއުޓާ ޖެނަރަލް (ޕީޖީ) ހުސައިން ޝަމީމް ވިދާޅުވެފައިވާއިރު، އެ މައްސަލަ މިހާރު އޮތީ ދައުވާކުރާ ހިސާބުގައެވެ.