މިހާރު މާލެސިޓީ ކައުންސިލަކީ ވަރަށް ސިއްރުތަނެއް، އެކަން ބަދަލުކުރާނަން - އާޒިމް
ޚިދުމަތް ހޯދަން އާދޭސްކުރުމާއި ނުފޫޒު ބޭނުންކުރުމުގެ ސަޤާފަތް ނައްތަވާލައްވާނެ ކަމަށް އާޒިމް ވިދާޅުވި
މާލެ ސިޓީ ކައުންސިލްގެ މޭޔަރ ކަމަށް ކުރިމަތި ލައްވާފައިވާ އާދަމް އާޒިމް
މިހާރު މާލެސިޓީ ކައުންސިލަކީ ވަރަށް ސިއްރުތަނެ ކަމަށާއި އެކަން ބަދަލުކުރައްވާނެ ކަމަށް މާލެ ސިޓީ މޭޔަރ ކަމަށް ކުރިމަތި ލައްވާފައިވާ އަދި އެމްޓީސީސީގެ ކުރީގެ ސީއީއޯ އާދަމް އާޒިމް ވިދާޅުވެއްޖެއެވެ.
އާޒިމް މިފަދައިން ވިދާޅުވީ ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަދައްކަވަމުންނެވެ. އާޒިމް ވަނީ މާލެ ސިޓީ ކައުންސިލްގެ އާމްދަނީ ހަރަދުތަކާއި ރިސޯސަސް ހާމަކުރައްވާނެ ކަަމަށް ވިދާޅުވެފައެވެ. އެއީ ރައްޔިތުންގެ ފައިސާ އާއި މުދާކަމަށާއި އެތަކެއްޗާއި ކައުންސިލުން ކުރާ ޚާރަދުތަކުގެ ފުރިހަމަ ތަފްސީލް ރައްޔިތުންނަށް ލިބެން ޖެހޭ ކަމަށް އާޒިމް ވަނީ ވިދާޅުވެފައެވެ. އަދި ފުރަތަމަ ދުވަހުން ފެށިގެން އެކަންމަށްޓަކާ މަސައްކަތް ފައްޓަވާނެ ކަމަށް އާޒިމް ވިދާޅުވިއެވެ. އެގޮތުން ހަ މަސް ދުވަހުގެ ތެރޭގައި ހިސާބުތައް އެއްކޮށް އެ ހިސާބުތައް ހާމަކުރަން ފެށޭނެ ކަަމަށް އުންމީދުކުރައްވާ ކަަމަށް އާޒިމް ވިދާޅުވިއެވެ. އަދި މިހާރު މާލެ ސިޓީކައުންސިލްގެ ހިސާބުތައް ބެލެހެއްޓިފައިވާ މިންވަރު އެނގިވަޑައިނުގަންނަވާތީ އެ ހިސާބުތައް ހޯދާ ތަރުތީބުކުރަން ވަގުތުކޮޅެއް ނަގާނެ ކަމަށް ބެލެވޭ ކަމަށް އާޒިމް ވަނީ ވިދާޅުވެފައެވެ. ނަމަވެސް މައުލޫމާތުތައް ހާމަކުރުމަކީ ކުރަން ޖެހޭ ކަމެއް ކަމަށައި މާލެ ސިޓީ ކައުންސިލުގައި ފޮރުވަން ޖެހޭ އެއްވެސް ކަމެއް އޮންނަންވާނެ ކަަމަށް ޤަބޫލުނުކުރައްވާ ކަަމަށް އާޒިމް ވަނީ ވިދާޅުވެފައެވެ.
އާޒިމް އިތުރަށް ވިދާޅުވީ ކައުންސިލް ބައްދަލުވުންތައް އިތުރުކުރައްވާ އާއްމުންނާއި އޮންނަ ގުޅުން ބަދަހިކުރައްވާނެ ކަަމަށެވެ. އެގޮތުން އަހަރަކު މާލޭގައި މަދުވެގެން 4 ބައްދަލުވުން، ހުޅުމާލޭގައި މަދުވެގެން 4 ބައްދަލުވުން އަދި ވިލިމާލޭގައި މަދުވެގެން 4 ބައްދަލުވުން ބާއްވަވާނެ ކަަމަށް ވިދާޅުވިއެވެ. މިހާރު އޮންނަ އުސޫލުން ހަމައެކަނި މާލޭގައި ބައްދަލުވުންތައް ބޭއްވުމަކީ އެންމެ ރަނގަޅު ގޮތް ކަމަށް ޤަބޫލުނުކުރައްވާ ކަމަށް އާޒިމް ވިދާޅުވިއެވެ. އަދި އާޒިމް ވަނީ ގުޅީފަޅާއި ގިރާވަރުގައި މީހުން އާބާދުވުން އެ ތަންތަނުގައި ވެސް މަދުވެގެން 1 ބައްދަލުވުން އަހަރެއްގެ ތެރޭގައި ބާއްވާނެ ކަަމަށް ވިދާޅުވެފައެވެ.
މީގެ އިތުރުން އާޒިމް ވަނީ ޚިދުމަތް ހޯދުމުގައި މިހާރަށް ވުރެ ފަސޭހަ ގޮތްތަކެއް މަގުފަހިކޮށްދެއްވާނެ ކަަމަށް ވިދާޅުވެފައެވެ. އަދި ޚިދުމަތް ހޯދަން އާދޭސްކުރުމާއި ނުފޫޒު ބޭނުންކުރުމުގެ ސަޤާފަތް ނައްތަވާލައްވާނެ ކަމަށް އާޒިމް ވިދާޅުވިއެވެ.
