ނަޕޯލީގެ އެއްބަސްވުން އޮސީމެން އައު ކޮށްފި

އިޓާލިއަން ލީގުގެ އެންމެ ފަހުގެ ޗެމްޕިއަން ނަޕޯލީ އަށް ކުޅެމުން އަންނަ ނައިޖީރިއާގެ ފޯވާޑް ވިކްޓަ އޮސީމެން އެ ކުލަބުގެ އެއްބަސްވުން އައު ކޮށްފި އެވެ.

ނަޕޯލީ އާއެކު އޮސީމެން ސޮއި ކޮށްފައިވާ އެއްބަސްވުމުގެ މުއްދަތު ހަމަވާން އޮތީ 2025 ވަނަ އަހަރުގެ ޖޫން މަހުގެ ނިޔަލަށެވެ. ނަމަވެސް، ކުރިއަށް އޮތް ޓްރާންސްފާ މާކެޓުގައި އޭނާ ކުލަބު ބަދަލު ކުރަން އުޅޭ ކަމުގެ އަޑުތަކެއް ވެސް އޮތީ ފެތުރިފަ އެވެ. އޭރު ވެސް، ނަޕޯލީން އައީ އޭނާގެ އެއްބަސްވުން އައު ކުރުމުގެ މަސައްކަތް ކުރަމުންނެވެ.

އޮސީމެން ވަނީ ނަޕޯލީ އާއެކު އައު އެއްބަސްވުމެެއްގައި ސޮއި ކޮށްފަ އެވެ. އެ ކުލަބާއެކު އޭނާ ސޮއި ކުރި އައު އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ. ނަޕޯލީން އޭނާގެ އެއްބަސްވުން އައު ކުރަން ބޭނުންވީ، ކުލަބުގައި އޭނާ ދައްކަމުން އަންނަ މޮޅު ކުޅުމުގެ ސަބަބުންނެވެ. އޮސީމެން އަށް އޮތީ ސައުދީ ޕްރޯ ލީގުގެ ކުލަބުތަަކުގެ ހުށަހެޅުން ވެސް ލިބިފަ އެވެ. އަނެއްކޮޅުން، އިނގިރޭސި ޕްރިމިއާ ލީގުގެ ކުލަބުތަކުން ވެސް އޭނާ ހޯދުމުގެ ޝައުޤުވެރިކަން ގެންގުޅޭ ކަމަށް އޮތީ ރިޕޯޓުކޮށްފަ އެވެ.

އުމުރުން 24 އަހަރުގެ ކުޅުންތެރިޔާ، ލީލް ދޫކޮށް ނަޕޯލީ އަށް ބަދަލުވީ 2020 ވަނަ އަހަރު އެވެ. އޭގެ ފަހުން އޭނާ ވަނީ މިހާތަނަށް އެ ކުލަބަށް ކުޅެދިން 119 މެޗުން 67 ލަނޑު ޖަހައިފަ އެވެ. އޭނާ ވަނީ ނަޕޯލީ އާއެކު މިދިޔަ ސީޒަންގެ އިޓާލިއަން ލީގު ކާމިޔާބު ކޮށްފަ އެވެ. ނަޕޯލީން ލީގު ކާމިޔާބު ކުރިއިރު ވެސް އޭނާ ވަނީ މޮޅު ކުޅުމެއް ދައްކައިފަ އެވެ. ދާދި ފަހުން އޭނާ ވަނީ އެފްރިކާގެ މޮޅު ފުޓުބޯޅަ ކުޅުންތެރިޔާގެ މަގާމު ހޯދައިފަ އެވެ.