ރޯމާ އިން ނަޕޯލީ ބަލިކޮށްފި

އިޓާލިއަން ލީގުގައި އެންމެ ފަހުގެ ޗެމްޕިއަން ނަޕޯލީއާ ދެކޮޅަށް ކުޅުނު މެޗުން ރޯމާ މޮޅުވެއްޖެ އެވެ.

ލީގުގައި އާދީއްތަ ދުވަހު ރޯމާގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 2-0 ންނެވެ. އެ މެޗަށް ނިކުތްއިރު ވެސް ނަޕޯލީ އޮތީ ޕްރެޝަރުގަ އެވެ. އެއީ އެންމެ ފަހުން އިޓާލިއަން ކަޕްގެ ގަދަ 16 ވަނަ ބުރުގެ މެޗުން ބަލިވެ، އެ މުބާރާތުން ކެޓުމުންނެވެ.

ރޯމާގެ ދަނޑުގައި ކުޅުނު މެޗުގައި އެ ޓީމުން ދެ ލަނޑު ވެސް ޖެހީ ދެ ވަނަ ހާފުގަ އެވެ. ގިނަ ކާޑުތަކެއް ފެނުނު މެޗުގައި ނަޕޯލީ އަށް އެންމެ ބޮޑު ގެއްލުމެއް ދެއްކީ، 66 ވަނަ މިނެޓުގައި އެ ޓީމުގެ މަތެއު ޕޮލިޓާނޯ އަށް ސީދާ ރަތް ކާޑު ދެއްކުމުންނެވެ. ރޯމާ އިން މެޗުގައި ލަނޑު ޖަހައި ލީޑު ނެގީ އޭގެ ފަހުންނެވެ. މެޗުގެ 76 ވަނަ މިނެޓުގައި އެ ޓީމަށް ލީޑު ނަގައިދިނީ ލޮރެންޒޯ ޕެލެގްރިނީ އެވެ. މެޗުގައި އޭނާ ކުޅެން ނިކުމެފައި ވަނީ ބަދަލު ކުޅުންތެރިޔެއްގެ ގޮތުގަ އެވެ. އޭގެ ފަހުން 86 ވަނަ މިނެޓުގައި ނަޕޯލީގެ ފޯވާޑް ވިކްޓަރ އޮސީމެން އަށް ވަނީ ދެ ވަނަ ރީނދޫ ކާޑާއެކު ރަތް ކާޑު ދައްކައިފަ އެވެ. މެޗުގައި ރޯމާ އިން އެ ޓީމުގެ ފަހު ލަނޑު ޖެހީ އިތުރު ވަގުތުގަ އެވެ. އީވާން އެން ޑިކާ ތަނަވަސް ކޮށްދިން ފުރުސަތެއްގައި އެ ލަނޑު ޖެހީ އެ ޓީމުގައި މޮޅަށް ކުޅެމުން އަންނަ ބެލްޖިއަމްގެ ރޮމެލޫ ލުކާކޫ އެވެ.

މޮޅާއެކު ރޯމާ އިން ވަނީ ނަޕޯލީ ފަހަތަށް ޖައްސާލުމަށްފަހު، ހަ ވަނަ އަށް ޖެހިލައިފަ އެވެ. އެއީ މިހާތަނަށް ލީގުގައި ކުޅުނު 17 މެޗުން 28 ޕޮއިންޓު ހޯދައިގެންނެވެ. ހަމަ އެ އަދަދަށް މެޗު ކުޅެގެން ހަތް ވަނައިގައި ނަޕޯލީ އޮތީ 27 ޕޮއިންޓާއެކު އެވެ.