އިންތިޚާބު ބާއްވަން އެފްއޭއެމުން ނިންމި ބައްދަލުވުމުގެ ތަފްސީލު ހޯދަން ސްޕޯޓްސް ކޮމިޝަނުން އެދިއްޖެ

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ އިންތިޚާބު ބާއްވަން، އެ އެސޯސިއޭޝަންގެ ހިންގާ ކޮމިޓީން ނިންމި ގޮތުގެ ތަފްސީލު ހޯދުމަށް، ކޮމިޝަނަރ އޮފް ސްޕޯޓްސްއިން އެދިއްޖެއެވެ.

އެފްއޭއެމްގެ އިންތިޚާބު ބާއްވަން އިއުލާންކުރީ މި މަހުގެ 17 ވަނަ ދުވަހުއެވެ. އެގޮތުން އަންނަ ޖަނަވަރީ މަހުގެ 31 ވަނަ ދުވަހު އިންތިޚާބު ބޭއްވުމަށް، އެ އެސޯސިއޭޝަންގެ ހިންގާ ކޮމެޓީގެ 20 ވަނަ ބައްދަލުވުމުން ނިންމާފައި ވާކަމަށް ވަނީ ބުނެފައެވެ. އަދި އިންތިޚާބުގައި ވާދަކުރުމުގެ ފުރުސަތު މި މަހުގެ 27 ވަނަ ދުވަހާ ހަމައަށް ވަނީ ހުޅުވާލާފައެވެ.

ކޮމިޝަނަރ އޮފް ސްޕޯޓްސްއިން އެފްއޭއެމަށް ފޮނުވި ސިޓީއެއްގައި ބުނެފައިވަނީ، އެފްއޭއެމްގެ އިންތިޚާބަށް އިއުލާންކޮށްފައި ވާކަމުގެ މައުލޫމާތު ނޫސްތަކުންނާއި، ސޯޝަލް މީޑިއާ މެދުވެރިކޮށް، އަދި ބައެއް ކުލަބުތަކުގެ ފަރާތުން ލިބިފައިވާކަމަށެވެ.

އެހެންކަމުން، އެބައްދަލުވުމާގުޅޭ ބައެއް ކަންކަން ސާފުކޮށްދިނުމަށް ވެސް ވަނީ އެދިފައެވެ.

އެގޮތުން، އިންތިޚާބާ ގުޅޭގޮތުން ނިންމާފައިވާ ނިންމުމުގެ ތަފްސީލު، ހިންގާ ކޮމިޓިގެ މުދައްތުގައި ބާކީ އެތައް ދުވަހެއް އޮއްވައި ހިންގާ ކޮމިޓީގެ އަވަސް އިންތިޚާބެއް ބޭއްވުމަށް، ހިންގާ ކޮމިޓީގެ 20 ވަނަ ބައްދަލުވުމުގައި ނިންމަން ޖެހުނު ސަބަބު، އިންތިޚާބު ބޭއްވުމަށް ނިންމި ހިންގާ ކޮމިޓީގެ 20 ވަނަ ބައްދަލުވުމުގެ އެޖެންޑާ އަދި ޔައުމިއްޔާ، ހިންގާ ކޮމިޓީގެ 20 ވަނަ ބައްދަލުވުން އޮތް ތަނާއި، ބައްދަލުވުމުގެ ހާޒިރީ އަދި އެފްއޭއެމްގެ ދާއިމީ މެންބަރުންގެ ލިސްޓް އަންގައިދިނުމަށް ވަނީ އެދިފައެވެ.