އާސެނަލްއާ ލިވަޕޫލް އެއްވަރު، އެއްވަނާގައި އާސެނަލް!

އިނގިރޭސި ޕްރިމިއަރ ލީގު ތާވަލްގެ އެއްވަނާގައި އޮތް އާސެނަލް އާއި ލިވަޕޫލް އެއްވަރުވެއްޖެއެވެ.

މެޗު އެއްވަރުވުމުން ތާވަލްގައި އާސެނަލްގެ މަގާމަކަށް ބަދަލެއް ނާދެއެވެ. ޕޮއިންޓެއްގެ ލީޑަކާ އެކު އެއްވަނާގައި އޮތީ އާސެނަލް އެވެ. މެޗުން ހޯދި ޕޮއިންޓާއެކު ލިވަޕޫލް ވަނީ ދެވަނަ އަށް ޖެހިލާފައެވެ. މެޗުން މޮޅުވެގެން އެއްވަނަ އަށް ޖެހިލަންވެސް ލިވަޕޫލަށް ފުރުޞަތު އޮތެވެ. ލިވަޕޫލްގެ ދަނޑުގައި ކުޅުނު މެޗު އެއްވަރުވީ 1-1 ނެވެ. މެޗު ފަށައިގެން ހަތަރު ވަނަ މިނެޓުގައި ޑިފެންޑަރ ގަބްރިއެލް ލަނޑު ޖަހާ އާސެނަލް އަށް ލީޑް ހޯދައިދިނެވެ. އޮޑެގާޑްގެ ހިލޭޖެހުން ގަބްރިއެލް ގޯލަށް ފޮނުވާލީ ބޮލުންނެވެ. ލިވަޕޫލުން މެޗުގެ ނަތީޖާ ހަމަހަމަކުރީ 29 ވަަނަ މިނެޓުގައި ސަލާހުގެ ލަނޑުންނެވެ. މެޗަށްފަހު އާސެނަލް ކޯޗު އާޓެޓާ ބުނީ އެއްވަރުވުމަކީ އިންސާފްވެރި ނަތީޖާއެއް ކަމަށެވެ.

މިނަތީޖާއާއެކު ލިވަޕޫލް ދެވަނައަށް ޖެހިލީ 39 ޕޮއިންޓާ އެކުއެވެ. ތިންވަނާގައި އޮތް އެސްޓަން ވިލާއާ ދެމެދު އޮތީ ގޯލްގެ ތަފާތެވެ. ހަތަރު ވަނާގައި އޮތީ 2-1 ން އެވަޓަން ބަލިކުރި ޓޮޓްނަމްއެވެ ޓޮޓްނަމްގެ ދަނޑުގައި ކުޅުނު މެޗުގެ 9 ވަނަ މިނެޓުގައި ލީޑް ނަގައިދިނީ ރިޗާލިސަން އެވެ. އޭގެ 9 މިނެޓު ފަހުން ދެވަނަ ލަނޑު ޖެހީ ކެޕްޓަން ސޮން އެވެ. އެވަޓަންގެ ހަމައެކަނި ލަނޑު ފަހު އަށް މިނެޓުގެ ތެރޭގައި ޖެހީ އަންދްރޭ ގޮމޭޒް އެވެ. ޓޮޓްނަމް އޮތީ 36 ޕޮއިންޓާ އެކުއެވެ. އެންމެ ފަހުގެ ޗެމްޕިއަން މެންޗެސްޓަރ ސިޓީ މިހާރު އޮތީ 34 ޕޮއިންޓާއެކު ފަސް ވަނާގައެވެ. މިހަފްތާގައި ސިޓީން ލީގު މެޗެއް ނުކުޅެއެވެ. އެއީ ކްލަބް ވަރލްޑްކަޕް ސެމީއާއި ފައިނަލް ކުޅެން އޮތުމުންނެވެ. އެމުބާރާތް ސިޓީން ވަނީ ކާމިޔާބުކޮށްފައެވެ.