ހަނގުރާމައިގެ މެދުތެރެއިން ޣައްޒާއަށް އެހީ ފޯރުކޮށެއް ނުދެވޭނެ: ރައީސް

ޔަހޫދީ އިސްރާއީލުން ޣައްޒާއަށް ދެމުންދާ ހަމަލަތައް ހުއްޓާލައިގެން މެނުވީ، ހާލުގައި ޖެހިފައިތިބި ޣައްޒާގެ ރައްޔިތުންނަށް އިންސާނީ އެހީފޯރުކޮށް ނުދެވޭނެކަމަށް، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

ޣައްޒާގެ ރައްޔިތުންނަށް އިންސާނީ އެހީތެރިކަން ފޯރުކޮށްދިނުން އިތުރުކުރުމަށް ގޮވާލައި. އދ.ގެ ސަލާމަތީ މަޖިލީހުން ފާސްކުރި ގަރާރާ ގުޅިގެން ރައީސް މުއިއްޒު އެކްސްގައި ކުރެއްވި ޕޯސްޓުގައި ވިދާޅުވީ، އެ ގަރާރަކީ ރަނގަޅު މަގަށް އެޅުނު ފިޔަވަޅެއްކަމަށެވެ.

އެހެންނަމަވެސް ޒަޔަނިސްޓުން ޣައްޒާގެ ރައްޔިތުންނަށް އަނިޔާވެރި ހަމަލަތަކެއް ދެމުންދާއިރު، އެ ހަމަލަތަކުގެ މެދުތެރެއިން ޣައްޒާއަށް އެހީ ފޯރުކޮށްދެވޭނެ ކަމަށް ގަބޫލުނުކުރައްވާ ކަމަށް ރައީސް ވިދާޅުވިއެވެ.

އެހެންކަމުން، އެ ގަރާރުގެ މައްޗަށް ބައިނަލްއަގުވާމީ މުޖުތަމައު އެކުގައި މަސައްކަތްކޮށް، މިހާރުން މިހާރަށް ހުރިހާ ހަމަނުޖެހުންތައް ނިމުމަކަށް ގެނެސް، ފަލަސްތީނުގެ ރައްޔިތުންގެ ހައްގުތައް ކަށަވަރުކޮށްދިނުމަށް ރައީސް ވަނީ ދުނިޔޭގެ ގައުމުތަކަށް ގޮވާލައްވާފައެވެ.

އަދި ޣައްޒާގެ ރައްޔިތުންނަށް އެމީހުންގެ ހައްގުތައް ކަށަވަރުކުރުމަށް މިހާރަށްވުރެ ހަރުދަނާ ފިޔަވަޅުތަކެއް އަޅާނެކަމަށް އުންމީދުކުރައްވާ ކަމަށްވެސް ރައީސް ވިދާޅުވިއެވެ.