ޕާކިސްތާނުގެ ހުޅަނގު އުތުރުގެ ޕޮލިސް ސްޓޭޝަނަކަށް ދިން ބޮމުގެ ހަމަލާއެއްގައި 23 އޮފިސަރުން މަރުވެ 32 މީހުން ޒަޚަމްވެއްޖެ

ޕާކިސްތާނުގެ ހުޅަނގު އުތުރުގައި ހުންނަ ޕޮލިސް ސްޓޭޝަނެއްގެ މައި ގޭޓުކައިރީގައި ހަތިޔާރުއެޅި ގްރޫޕަކުން ދިން ބޮމުގެ ހަމަލާއެއްގައި 23 ސިފައިން މަރުވެ 32 މީހުން ޒަޚަމްވެ އިމާރާތުގެ ބައެއް ވެއްޓިފައިވާ ކަމަށް އެ ޤައުމުގެ އަސްކަރިއްޔާ އާއިން ބުނެފިއެވެ.

މި ހަމަލައަކީ ފާއިތުވި މަސްތަކުގައި އެގައުމުން ފެނުނު އެންމެ ނުރައްކާތެރި އެއް ހަމަލާގެ ގޮތުގައި އަސްކަރިއްޔާއިން ވަނީ ސިފަކޮށްފައެވެ. އަދި މިހަމަލާގެ ސަބަބުން ވިޔަފާރިތަކަށާއި ފިހާރަތަކަށް ބޮޑެތި ގެއްލުންތަކެއް ލިބިފައިވާ ކަމަށްވެސް އަސްކަރިއްޔާއިން ބުނެއެވެ.

އަސްކަރިއްޔާއިން ނެރުނު ބަޔާނެއްގައި ބުނީ ހަ ހަނގުރާމަވެރިން ބަޑިޖަހާ، އެމީހުން މަރާލުމުގެ ކުރިން އެ މީހުންނާއި ސަލާމަތީ ބާރުތަކާ ދެމެދު އެތައް ގަޑިއިރެއް ވަންދެން ބަޑީގެ ހަމަލާތަކެއް ދީފައިވާ ކަމަށެވެ. އަދި ހަމަލާދިން ހަ މީހުން ވެސް މަރުވެފައިވާ ކަމަށް އެ ގައުމުގެ ފުލުހުން ވަނީ ކަށަވަރުކޮށްދީފައެވެ.

ބައެއް އޮފިސަރުންގެ ހާލު ސީރިއަސްކަމުން މަރުވި މީހުންގެ އަދަދު އިތުރުވުމަކީ އެކަށީގެންވާ ކަމެއް ކަމަށް ކަމާބެހޭ ފަރާތްތަކުން ބުނެއެވެ. ފުލުހުންގެ އިސް އޮފިޝަލަކު ނޫސްވެރިންނަށް މައުލޫމާތު ދެއްވަމުން ވިދާޅުވީ މަރުވި 23 މީހުންގެ ހަށިގަނޑު ހޮސްޕިޓަލަށް ބަދަލުކޮށްފައިވާ ކަމަށެވެ.

އަސްކަރިއްޔާގެ ބަޔާނުގައި ބުނެފައި ވަނީ އެއް ސަރަޙައްދެއްގައި ހިންގި ގިނަ އޮޕަރޭޝަންތަކުގައި "ސިފައިން 27 ހަނގުރާމަވެރިން މަރާލާފައިވާ" ކަމަށެވެ.

މި ހަމަލަ ދީފައިވަނީ އަފްޣާނިސްތާނުގެ ބޯޑަރުގައި އޮންނަ ޚައިބަރު ޕަޚްތޫންޚުވާ ޕްރޮވިންސްގެ ސިޓީއެއް ކަމަށްވާ ޑެރާ އިސްމާއިލް ޚާންގެ ދަރަބާން ޕޮލިސް ސްޓޭޝަނަށްކަމަށް އެބަޔާނުގައި ބުނެފައިވެއެވެ. މި ޕްރޮވިންސަކީ ހަނގުރާމަވެރި ޕާކިސްތާނު ޠާލިބާންނާއި، ގުޅުން އޮންނަނަ ޖަމާއަތެއް ކަމަށްވާ ތަހްރީކޭ ޠާލިބާން ޕާކިސްތާން ނުވަތަ ޓީޓީޕީގެ ކުރީގެ ބާރުގަދަ ޕްރޮވިންސެކެވެ.

އެ ހަމަލާގެ ޒިންމާ އުފުލާފި، އަލަށް އުފެދުނު ހަނގުރާމަވެރި ޖަމާއަތެއް ކަމަށްވާ ތަހްރީކޭ ޖިހާދު ޕާކިސްތާން ނުވަތަ ޓީޖޭޕީން ނެރުނު ބަޔާނެއްގައި ވަނީ އެ ހަމަލައަމާޒު ކޮށްފައިވަނީ ޕޮލިސް ސްޓޭޝަނުގައި ތިބި އޮފިސަރުންނަށް ކަމަށް ބުނެފައެވެ.

އަދި 20 އޮފިސަރުން މަރާލާފައިވާ ކަމަށް ވެސް އެ ބަޔާނުގައި ބުނެފައިވެއެވެ.

ހަމަލާ ދިން ސަރަހައްދު ކައިރީގައި ހޮޓަލެއް ހިންގާ މެހެރްބާން ޚާން މީޑިއާށް ކިޔައިދިން ގޮތުގައި ޕޮލިސް ސްޓޭޝަނަށް ހަމަލާދެމުން ދިޔަ އިރު އޭނާހުރީ ބަލާށެވެ. އެ ހަމަލާތަކުގައި އަސްކަރިއްޔާގެ އެތައް ބަޔަކު މަރުވެ ނުވަތަ ޒަޚަމްވި ތަން އެނާއަށް ފެނުނު ކަމަށް އޭނާ ބުނެއެވެ.

ޕާކިސްތާނުގެ ރައީސް އާރިފް އަލްވީ ވަނީ މި ހަމަލާ ކުށްވެރިކުރައްވައި "ޝަހީދުވި" މީހުންގެ އާއިލާތަކަށް ތައުޒިޔާ ވިދާޅުވެފައެވެ.

އަދި "އެމީހުންގެ ގުރުބާނީ ބޭކާރު ނުވާނެ" ކަމަށާއި އެފަދަ ހަމަލާތަކުން ސަލާމަތީ ބާރުތަކުގެ އަޒުމް ބަލިކަށި ނުކުރެވޭނެ ކަމަށް އޭނާ ވިދާޅުވިއެވެ.

ޕާކިސްތާނުގެ ވަގުތީ ދާޚިލީ ވަޒީރު ސަފްރާޒް ބުގްޓީ ވަނީ މި ހަމަލާ ކުށްވެރިކުރައްވައި މިއީ ޓެރަރިޒަމްގެ އަމަލެއް ކަމަށް ސިފަކުރައްވާފައެވެ.

ޚައިބަރު ޕަޚްތޫންޚުވާގައި ހަމަނުޖެހުންތައް އިތުރުވެ، މިއަހަރު ހަނގުރާމަވެރިން ވަނީ ނުރައްކާތެރި އެތައް ހަމަލާތަކެއް ދީފައެވެ. މިދިޔަ ޖެނުއަރީ މަހުގެ ތެރޭގައި ހުޅަނގު އުތުރުގެ ސިޓީއެއް ކަމަށްވާ ޕިޝާވަރުގެ މިސްކިތަކަށް ފުލުހެއްގެ ޔުނީފޯމްގައި ހުރިމީހަކު ދިން ބޮމުގެ ހަމަލާއެއްގައި 101 މީހުން މަރުވި އިރު އޭގެ ތެރޭގައި ގިނައީ ފުލުހުންނެވެ.

ޕާކިސްތާނުގެ ޠާލިބާނުން ދަނީ 2022 ވަނަ އަހަރުން ފެށިގެން ސަލާމަތީ ބާރުތަކަށް ހަމަލާތައް ދެމުންނެވެ. ކަމާބެހޭ ފަރާތްތަކުން ބުނަނީ 2021 ވަނަ އަހަރު ޠާލިބާނުން އަފްޣާނިސްތާނު ހިފުމުން ހަނގުރާމަވެރިންނަށް ހިތްވަރު ލިބިފައިވާ ކަމަށެވެ.

ޠާލިބާނުންގެ އިތުރުން ޓީޓީޕީ އަކީ ވަކި ޖަމާއަތެއް ނަމަވެސް އަފްޣާނިސްތާނުގެ ޠާލިބާނުންނާ ވަރަށް ގާތް ގުޅުމެއް އޮންނަ ޖަމާއަތެކެވެ.