މާޒިޔާ އަށް ސާބިއާގެ ޑިފެންޑަރެއް ގެނެސްފި
28 ޖުލައި 2017 | ހުކުރު 13:37ޓްރާންސްފާގައި މާޒިޔާ އަށް ވަނީ ހަތަރު ކުޅުންތެރިން ގެނެސްފައި
މާޒިޔާއާ އަލަށް ގުޅުނު ބޯޖާން މިހަލޮވިޗް
މާޒިޔާ ސްޕޯޓްސް އެންޑް ރެކްރިއޭޝަނަށް ސާބިއާގެ ޑިފެންޑަރެއްކަމަށްވާ ބޯޖާން މިހަލޮވިޗް ގެނެސްފި އެވެ.
އުމުރުން 28 އަހަރުގެ މިހަލޮވިޗް މާޒިޔާއަށް ގެނެސްފައިވަނީ އެޓީމުގެ ރުމޭނިޔާގެ ޑިފެންޑަރު އަންދުރޭ ކޯޑޯސް ދޫކޮށްލުމަށްފަހު އެވެ.
މިހަލޮވިޗް ވަނީ މީގެކުރިން ބެލަރޫސް ޕްރިމިއާ ލިގުގެ އެފްސީ މިސްކް ރަޔޮން، އަރްމީނިއާ ޕްރިމިއާ ލީގުގެ އެފްސީ ބަނަންޓުސް އަދި ހަންގޭރީގެ ދެވަނަ ޑިވިޝަން ކްލަބެއްކަމަށްވާ ޖަޕެސްޓަށްވެސް ކުޅެފައެވެ. އޭނާ މިދިޔަ އަހަރު ކުޅުނީ އެފްސީ މިސްކް ރަޔޮން އަށެވެ.
މިހަލޮވިޗް މާލެ އައިސް މާޒިޔާ ޓީމާ ގުޅިފައިވާއިރު، އޭނާ ވަނީ ބުރާސްފަތި ދުވަހު އޮތް މާޒިޔާގެ ފަރިތަކުރުންތަކުގައި ބައިވެރިވެފައެވެ.
އަންނަ މަހު ފަށާ ޕްރިމިއާ ލީގަށް ތައްޔާރުވުމުގެ ގޮތުން މާޒިޔާ އިން ވަނީ މިހަލޮވިޗްގެ އިތުރުން ދިވެހި ދެ ކުޅުންތެރިން އަދި ބިދޭސީ ދެ ކުޅުންތެރިން ގެނެސްފައެވެ. އޭގެ ތެރޭގައި ހިމެނޭ ދިވެހި ދެ ކުޅުންތެރިންނަކީ ވިކްޓްރީ އަށް ކުޅުނު އިސްމާއިލް އީސާ (މެސީ) އަދި މުހައްމަދު އާރިފް (ބަކާ) އެވެ.
މާޒިޔާ އިން އެޓީމުގެ ބިދޭސީ ދެ ކުޅުންތެރިން ދޫކޮށްލާފައިވާއިރު، އަލަށް ގެނެސްފައިވަނީ ވިކްޓްރީއަށް ކުޅެމުން އައި ސީރިޔާގެ ކީޕަރު މަހުމޫދު އަލްޔޫސުފް އަދި ކްރޮއޭޝިއާގެ އަންދުރޭ ކެރިޗް އެވެ. އެހެންނަމަވެސް މާޒިޔާއާ އެކު މާލޭ ލީގު ކުޅުނު މިލޮސް ކަވަސަވިޗް އެޓީމުން ދުލެއް ނުކުރެއެވެ.
