ބޯހިޔާވަހިކަމާ މެދު މާލެ މީހުންގެ އޮތް މާޔޫސްކަމަށް ހައްލު ހޯދައިދެވޭނީ އާޒިމް އަށް - ހިސާން
މާލޭ މީހުން ބޭނުން ވަނީ ދޮގުވެރިއެއް ނޫން ކަމަށާއި ބޭނުންވަނީ ޤަނޫނު އަސާސީ އަށް އިޙުތިރާމްކުރާނެ މީހެއް ކަމަށް ހިސާން ވިދާޅުވި
އެމްޑީޕީގެ ކަންމަތީ ބައްދަލުވުމުގެ ތެރެއިން
ބޯހިޔާވަހިކަމާއި މެދު މާލޭ މީހުންގެ އޮތް މާޔޫސްކަމަށް ހައްލު ހޯދައި ދެވޭނީ އެމްޑީޕީގެ މާލޭ މޭޔަރު ކެންޑިޑޭޓް އާދަމް އާޒިމްއަށް ކަމަށް ރައްޔިތުންގެ މަޖިލީހުގެ ތުޅާދޫ ދާއިރާގެ މެންބަރު ހިސާން ހުސައިން ވިދާޅުވެއްޖެއެވެ.
ހިސާން އެފަދައިން ވިދާޅުވީ އެމްޑީޕީގެ ފަރާތުން މާލެ ސިޓީގެ މޭޔަރުކަމަށް ވާދަކުރައްވާ އާދަމް އާޒިމާއި މާލެ ސިޓީ ކައުންސިލްގެ މާފަންނު ދެކުނު ދާއިރާގެ ގޮނޑިއަށް ވާދަކުރައްވާ އަހްމަދު އިމްރާނުގެ ކެމްޕެއިންގެ ތެރެއިން ބުދަ ދުވަހުގެރޭ ވަނީ ބޮނޑިބަތްޕާކުގައި ބޭއްވި ކަންމަތީ ބައްދަލުވުމުގައި ވާހަކަފުޅު ދައްކަވަމުންނެވެ.
އެގޮތުން މާލެ އަކީ ދުނިޔޭގެ ނިސްބަތުން ބަލާއިރު ވެސް އެންމެ ބޮޑަށް ތޮއްޖެހިފައިވާ އެއް ތަންކަމަށް ވާއިރު، މާލެއަށް މޭޔަރަކު ހޮވުމުގައި ވަރަށް ބޮޑަށް ވިސްނަން ޖެހޭ ކަމަށް ހިސާން ވިދާޅުވިއެވެ. އަދި އާއްމުން ވޯޓު ދީގެން މާލެސިޓީ ކައުންސިލަށް މޭޔަރަކު ހޮވަނީ މާލެ ސަރަހައްދަށް ދިމާވެފައިވާ މައްސަލަތައް ހައްލުކުރުމުގެ މަޤްސަދުގައި ކަމަށް ވެސް ހިސާން ވިދާޅުވިއެވެ. އެހެންކަމުން ތެދުވެރިކަމާއި އަމާނާތްތެރިކަމާ އެކު ރައްޔިތުން ހަވާލުކުރާ މަސްއޫލިއްޔަތު އަދާކުރާނެ މީހަކަށް ވޯޓުދިނުން މުހިންމުކަމަށް ހިސާން ވިދާޅުވިއެވެ.
ހިސާން ވަނީ އާޒިމް އަކީ މާލޭގެ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލަ އަށް ހައްލު ހޯދައި ދިނުމަށް މަސައްކަތްކުރައްވާނެ ބޭފުޅެއް ކަމަށް ވިދާޅުވެފައެވެ. އަދި ފާއިތުވެދިޔަ އަހަރުތަކުގައި އާޒިމް ވަނީ އޭނާ އަށް ހަވާލުކުރައްވާ ކޮންމެ ކަމެއް ވެސް ރަނގަޅަށް އަދާކުރައްވާ، ހަރުދަނާ، ޤާބިލް ބޭފުޅެއްކަން ސާބިތުކޮށްދީފައި ކަމަށް ހިސާން ވިދާޅުވިއެވެ. އަދި އާޒިމްއަކީ ކަންކަމުގައި ޒިންމާ ނަންގަވާ، އެކަމަށް ފަރިތަ ބޭފުޅެއް ކަމަށް ވެސް ހިސާން ވިދާޅުވިއެވެ.
ހިސާން އިތުރަށް ވިދާޅުވީ މާލެ އަށް ބޭނުން ވަނީ އާޒިމް ފަދަ މޭޔަރެއް ކަމަށެވެ. މާލޭ މީހުން ބޭނުން ވަނީ ދޮގުވެރިއެއް ނޫން ކަމަށާއި ބޭނުންވަނީ ޤަނޫނު އަސާސީ އަށް އިޙްތިރާމްކުރާނެ މީހެއް ކަމަށް ވެސް ހިސާން ވަނީ ވިދާޅުވެފައެވެ.
