ދެވަނަ ޑިވިޝަންގެ ޗެމްޕިއަން ޓީމާއި ރަނައަޕް ޓީމަށްވެސް ފުރަތަމަ ޑިވިޝަނުން ޖާގަދޭން ނިންމައިފިއެވެ.

އެފްއޭއެމްގެ ޖެނެރަލް ސެކެޓްރީ ޖައުޝަން ޝަރީފް ވިދާޅުވީ އެބަދަލު ގެންނަން ނިންމައިފި ކަމަށާއި ގަވާއިދުގައި އެބަދަލު އޮންނާނެ ކަމަށެވެ. ނަމަވެސް ފުރަތަމަ ނިންމީ ޗެމްޕިއަން ޓީމަށް އެކަނި ފުރަތަމަ ޑިވިޝަންގެ ޖާގަ ދޭގޮތަށެވެ. ޖައުޝަން ވިދާޅުވީ ވަރަށްގިނަ ގޮތްގޮތަށް ބެލުމަށްފަހު ގެނެވެން އޮތް އެންމެ ރަނގަޅު ބަދަލަކީ ދެޓީމަށް ފުރުޞަތު ދިނުން ކަމަށެވެ. އެބަދަލު ގެނައީ ކުޅިވަރު މިނިސްޓްރީން ވެސް އެކަމަށް އެދިގެންކަމަށް ޖައުޝަން ވިދާޅުވިއެވެ.

މީގެއިތުރުން ފުރަތަމަ ޑިވިޝަންގެ އެއްވެސް ޓީމެއް ރެލިގޭޓް ނުވާނެކަމަށް ވެސް ޖައުޝަން ވިދާޅުވިއެވެ. ދިވެހި ލީގުގެ މެދުން މެޗުތަކަށް ހާޒިރުވެވެން ނެތްކަން އަންގާ ލީގުގެ ދެވަނަ ބުރުގެ ބޮޑުބައެއް ނުކުޅެ ދޫކޮށްލި ދެޓީމް ވެސް އަންނަ އަހަރުވެސް އޮންނާނީ ފުރަތަމަ ޑިވިޝަންގައެވެ. ފުރަތަމަ ޑިވިޝަންގެ ޖާގަ ލިބޭނެ ޓީމެއް ކަނޑައެޅުމަށް ކޮލިފިކޭޝަން އެއް ނުކުޅޭނެއެވެ.

ނަމަވެސް ދެވަނަ ޑިވިޝަންގައި ވާދަކުރާ ކްލަބަކުން ބުނީ ދެވަނަ ޓިވިޝަންގެ ތިން ޓީމަކަށް ފުރަތަމަ ޑިވިޝަނުން ޖާގަ ދޭނެކަމަށް ތަކުރާރުކޮށް އެފްއޭއެމްގެ ރައީސް ބައްސާމް އަދީލް ޖަލީލް ވިދާޅުވި ކަމަށެވެ. އެކިފަހަރު މަތިން ފަސްވަމުން އައިސް ދެވަނަ ޑިވިޝަން ފުޓްބޯޅަ މުބާރާތުގެ ގުރުއަތުލުން މިއަދު ބާއްވާނެކަން އެފްއޭއެމްއިން ވަނީ ބުނެފައެވެ. މުބާރާތުގައި ބައިވެރިވެފައިވާ ޓީމްތައް ބަހާލަނީ ތިން ގްރޫޕަކަށެވެ.

މުބާރާތް ފަށަން އެފްއޭއެމްއިން މިހާރު ކަނޑައަޅާފައިވަނީ މިމަހުގެ 26 ވަނަ ދުވަހު އެވެ. ރާއްޖޭގެ ފުޓްބޯޅައިގެ ކުރީގެ ގަދަ ދެބާރު ނިއުރޭޑިއަންޓާއި, ވިކްޓްރީއާއި, ލެގޫންސްއާއި މަސްއޮޑީއާއި ކުޑަހެންވެއިރު ވެސް ދަނީ ދެވަނަ ޑިވިޝަނަށް ވަރަށް ރަނގަޅަށް ތައްޔާރުވަމުންނެވެ.