ޔަތީމު ޙާލުގައި ނާމާން ދަތުރެއްކޮށް، އިޓަލީވިލާތުގެ މަގުތައް ފަތަހަ ކުރީ މަންމައާއި ކޮއްކޮމެނަށްޓަކައި!

އުޖާލާ ދިރިއުޅުމެއްގެ ހުވަފެންތައް ނުދެކޭ މީހަކު މަދުވާނެއެވެ. ހިތްދަތިކަމާއި ތަކުލީފުގައި ދުވަސްތައް ގުނަން ޖެހޭ ޙާލަތްތަކުގައި އެކަން ބަދަލު ކުރުމަށް ޢަޒުމު ކަނޑައަޅައެވެ. އެފަދަ އެކަކީ ހަނަފަސް ސަހަރާއެއްގައި އުޅެމުން ދިޔަ ހިތްދަތި ދިރިއުޅުން ދޫކޮށް، ކަނޑުމަތީގެ ނަމާން ދަތުރަކަށް ފަހު ވިލާތުގައި ދިރިއުޅުން ކޮޅަށް ޖެހުމުގެ ޢަޒުމުގައި ތެދުވި މާދޫ ކޫލިބާލީއެވެ. ރެފިއުޖީ ހިޖުރަވެރިއެއްގެ ގޮތުގައި ކޫލިބާލީ ފެށި ދަތުރުގެ މަންޒިލަކަށް ވީ އިޓަލީވިލާތުގެ ފްލޯރަންސްއެވެ. ހިޖުރައިގެ ދަތުރު އެހާ ހިސާބުން ނިމުނެއް ކަމަކު، ކޫލިބާލީގެ ދަތުރުތައް ފެށެނީ އަދި އެހާ ހިސާބުންނެވެ. ކޫލިބާލީއަކީ އިޓަލީވިލާތުގައި ހިމާޔަތާއި ހިޔާވަހިކަން ހޯދަމުންދާ ހިޖުރަވެރިންނަށް ތަމްރީނު ދޭ އެކަޑަމީއިން، ފްލޯރަންސްގައި ބަސްދުއްވާ މީހެއްގެ ލައިސަންސް ދިން ފުރަތަމަ މީހާއެވެ.

މިހާ ހިސާބަށް އައުމަށް އޭނާ ކުރި ޔަޤީން ކަމެއް ނެތް ދަތުރުގެ ނިމުން އެހާ ފޮނި ވެދާނެ ކަމަކަށް ފަހަރެއްގައިވެސް ކޫލިބާލީ އުންމީދެއް ނުކުރެއެވެ. ނަމަވެސް އޭނާއަކީ މިއަދު، ހިޖުރަވެރިންނާ މެދު ވިލާތުގެ ޤައުމުތަކުން ގެންގުޅޭ ނިކަމެތިކޮށްލުމުގެ ފިކުރު މުޅިން ބަދަލު ކޮށްލި ޒުވާން، މަސައްކަތްތެރިއެކެވެ. އިޓަލީވިލާތަކީ މިވަގުތު ޒުވާން މަސައްކަތްތެރިންނަށް އިންތިހާއަށް ބޭނުން ޖެހިފައި އޮތް ޤައުމަކަށް ވުމީ، ކޫލިބާލީގެ ނަޞީބު ކަމުގައިވެސް ދެންނެވިދާނެއެވެ.

ޔަތީމު ޙާލުގައި ދިރިއުޅެމުން އައި ކޫލިބާލީ، ގިނީ ކޮނަކްރީ ދޫކޮށް ހިޖުރައަށް ފުރީ 2018 ވަނަ އަހަރުގެ ތެރޭގައެވެ. ފޮނި ހުވަފެންތަކާވެސް އެކުގައެވެ. ކިޔަވައިގެން ހަރުދަނާ މީހަކަށްވެ، އޭނާގެ އެއްބަނޑު އެއްބަފާ ކުދިންނާއި މަންމަ ބެލެހެއްޓޭ ވަރަށް މާލީ ތަނަވަސްކަން ހޯދުމުގެ ޢަޒުމުގައެވެ. ހުވަފެންތަކުގައި ޙަޤީޤީ ކުލަ ޖެއްސުމަށް ކޫލިބާލީ ކުރި ދަތުރުގައި އޭނާ ވަނީ މާލީ، އަލްޖަޒާއިރު، މަޣްރިބު އަދި ލީބިޔާވެސް ހުރަސްކޮށްފައެވެ. އިޓަލީވިލާތުގެ އައްސޭރިފަށާ ހިސާބަށް ދެވުނީ، އޭނާ ފަދަ 161 ހިޖުރަވެރިއަކާއެކު މެޑިޓަރޭނިއަން ކަނޑުގައި، އޭނާ ދަތުރު ކުރަމުން ދިޔަ ބޯޓުން ކޫލިބާލީ ސަލާމަތް ކުރި ހިސާބުންނެވެ.

އޭގެ 5 އަހަރު ފަހެވެ. ކޫލިބާލީގެ ކާމިޔާބީގެ ވަނަވަރު އެހާމެ ނަލައެވެ. ފްލޯރަންސްގެ ސަރަޙައްދީ ބަސް ކުންފުނި، އައުތޮލީނޭ ތުސްކާންއިން ހިޖުރަވެރިންނާއި ހިމާޔަތް ހޯދަން އެދިގެން އައި މީހުންނަށް ޚާއްޞަކޮށްގެން ހިންގަން ފެށީ ޓްރެއިނިންގް އެކަޑަމީއިން އެންމެ ފުރަތަމަ ވަޒީފާ ދިން ޑްރައިވަރަކީ ކޫލިބާލީއެވެ. މި މަޝްރޫޢާ މެދު، ޢުމުރުން 24 އަހަރުގެ ކޫލިބާލީގެ ހިތުގައި އެންމެ ފުރަތަމަ އުފެދުނީ ސުވާލުތަކެކެވެ. 

އިޓަލީވިލާތަކީ ޒުވާން މަސައްކަތްތެރިންނަށް އިންތިހާއަށް ބޭނުން ޖެހިފައި އޮތް ޤައުމަކަށް ވީ ނަމަވެސް، އެ ޤައުމުގެ ވެރިކަމުގައި މިވަގުތު ހުންނެވި ބޮޑުވަޒީރު، ޖޯޖިއާ މެލޯނީއަކީ، ހިޖުރަވެރިންނާ މާ ގަޔާވާ ޝަޚްސެއް ނޫނެވެ. ރެފިއުޖީންނާއި ހިޖުރަވެރިން ސަލާމަތް ކުރުމަށް، ހިލޭ އެހީދޭ ޖަމިއްޔާތަކުން ހިންގާ އެކި މަޝްރޫޢުތަކާވެސް ބޮޑު ވަޒީރު ދެކޮޅު ހައްދަވައެވެ. މި ހުރިހާ ކަމެއް މިހެން ހުރި އިރުވެސް، ކޫލިބާލީ ހުރީ ފަސްޖެހޭ ގޮތަކަށް ނޫނެވެ. އޭނާގެ އުންމީދަކީ، އެހެން މީހުންވެސް އޭނާގެ ކިބައިން ހިތްވަރު ލިބިގަނެ، ދިރިއުޅުމައިގެން ކުރިއަށް ދިއުމެވެ.

އިޓަލީވިލާތުގެ ވަޒީފާގެ ބާޒާރަށް ބަލާއިރު މަސައްކަތްތެރިންގެ ދަތިކަން އެންމެ ބޮޑަށް ކުރިމަތިވެފައި ވަނީ، މާ ބޮޑު ހުނަރުތަކެއް ނުވަތަ ތަމްރީނުތަކަކާވެސް ނުލާ މަސައްކަތް ކުރެވޭ ކޮންސްޓްރަކްޝަން، ފަތުރުވެރިކަން އަދި ދަނޑުވެރިކަމުގެ ސިނާޢަތުގައެވެ. ވަޒީފާ އަދާ ކުރާ ބައެއް ފަރާތްތަކުން އިއްތިފާޤުވާ ގޮތުގައި، އެކަން އެހެން ދިމާވަނީ ވަޒީފާ އަދާ ކުރަން ޖެހޭ މާޙައުލުގެ ގޮތުންނެވެ. އަދި އެކަށީގެންވާ ޢާމްދަނީއެއްވެސް ނުލިބޭތީއެވެ.

ކަން މިހެން އޮތް އިރު، އިޓަލީވިލާތުން ވަނީ، ވިލާތުގެ ޤައުމުތައް ނޫން އެހެން މަންޒިލްތަކަށް ނިސްބަތްވާ މީހުންނަށް ދޫކުރާ ވަރކް-ވިސާގެ ކޯޓާވެސް އިތުރު ކޮށްފައެވެ. 2023-2025 އަށް ދޫކުރާ ކޯޓާގެ ނިސްބަތް، އޭގެ ކުރީ 3 އަހަރާ އަޅާ ބަލާއިރު 150 ޕަސެންޓް އިތުރު ކޮށްފައިވާކަން ފާހަގަ ކުރަން ޖެހެއެވެ. މި އަހަރުގެ ކޯޓާއަކީ 136000 އެވެ. މިއީ 2008 ވަނަ އަހަރަށް ފަހު ރެކޯޑެކެވެ.