ބަޖެޓުން ފުށިދިއްގަރުފަޅު ހިއްކުމުގެ މަސައްކަތް އުނިކޮށްފައި ވަނިކޮށް، ފުށިދިއްގަރުފަޅު ހިއްކައިގެން ތަރައްޤީކުރަން ފަށާފައިވާ "ރަސްމާލެ" އަށް ސަރުކާރުން ޚަރަދެއް ނުކުރާނެކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

މުއިއްޒު އެފަދައިން ވިދާޅުވީ ކަންގަތި އެވޯޑް 2023 ދިނުމަށް ބޭއްވި ޙަފްލާ ޝަރަފުވެރިކޮށްދެއްވާ ވާހަކަފުޅުދައްކަވަމުންނެވެ. ރަސްމާލެ މަޝްރޫޢު ފެށިގެން މިހާރު ކުރިއަށްދާއިރު އެ މަޝްރޫޢު ކުރިޔަށް އެ ދަނީ ދިވެހި ދައުލަތުގެ ބަޖެޓުން އެއްވެސް ޚަރަދެއް ކުރަން ނުޖެހޭގޮތަށް ކަމަށް ރައީސް ވިދާޅުވިއެވެ. އިރާދަކުރެއްވިއްޔާ، އެ މަޝްރޫޢު އެގޮތުގައި ކުރިޔަށް ގެންގޮސް ނިންމާލާނެކަމަށް ވެސް ރައީސް ވަނީ އެ ހަފްލާގައި ވިދާޅުވެފައެވެ. ރައީސް އެހެން ވިދާޅުވެފައި މިވަނީ ފުށިދިއްގަރުފަޅުގެ ބަޖެޓް ކޯޑުވެސް މަޖިލީހުން އުނިކޮށްފައި ވަނިކޮށެވެ.

ފުށިދިއްގަރު ފަޅު "ރަސްމާލެ"ގެ ނަމުގައި ހިއްކުމަކީ ބިޔަ މަޝްރޫޢުއެއް ކަމަށް ރައީސް ވަނީ ވިދާޅުވެފައެވެ. އެތަނަކީ އެއީ ހުޅުމާލޭގެ ތިން ހުޅުމާލެ ވަރުގެ ތަނެއް ކަމަށް ވެސް ރައީސް ވިދާޅުވިއެވެ. މީގެ އިތުރުން ރައީސް ވިދާޅުވީ އިތުރަށް، ގިރާވަރު ފަޅާއި، ގުޅިފަޅު ހިއްކައި، އެންމެ ޒަމާނީ ފެންވަރުގައި، އާ ޝަހަރުތަކެއް ދިވެހީންގެ ޙަޔާތަށް ހަދިޔާކުރެވޭނެ ކަމަށެވެ.

ހަމައެހެންމެ ރަސްމާލެ ވާނީ ނިކަން ވިންދު ހުރި ސިޓީއަކަށް ކަމަށާއި އެތަން ވާނީ ދުނިޔޭގައިވެސް ނަން ވިދާލާ ނަމޫނާ ސިޓީއަކަށް ކަމަށް ރައީސް ވަނީ ވިދާޅުވެފައެވެ. އަދި ރަސްމާލެ މި ބިނާކުރަނީ ތިމާވެށްޓާ ރައްޓެހި، ޒަމާނީ، ޑިޖިޓަލް، ސްމާޓް ސިޓީއެއްގެ ގޮތުގައި ކަމަށް އެމަނިކުފާނު ވަނީ ވިދާޅުވެފައެވެ.

މި ފަސް އަހަރު ނިމޭއިރު، އެއްވެސް ދިވެހި ރައްޔިތަކު، ގެދޮރިވެރިކަން ނެތި ނުހުންނާނެ ކަމަށް ސަރުކާރުން ބުނެއެވެ. ފުށިދިއްގަރުފަޅުގެ މަޝްރޫއަށް 400 މިލިއަން ރުފިޔާ ކަނޑައަޅައި، އެ އަދަދު އަންނަ އަހަރުގެ ބަޖެޓުގައި މި ސަރުކާރުން ހިމެނިއެވެ. ނަމަވެސް އެ މަޝްރޫއުގެ ފައިނޭންސާގުޅޭ ތަފްސީލެއް ނެތުމާއެކު، މަޖިލީހުގެ ބަޖެޓު ދިރާސާކުރާ ކޮމިޓީން ވަނީ ބަޖެޓުން އެ 400 މިލިއަން އުނިކޮށްްފައެެވެ. ފުށިދިއްގަރުފަޅު ތަރައްްޤީކުރުމުގެ މަސައްކަތުގެ މާލީ ތަފްސީލްތައް ސަރުކާރުން ހާމައެއް ނުކުރައްވައެވެ. އެގޮތުން އެ މަޝްރޫޢުއަށް ޚަރަދުކުރާ ގޮތާއި ހިނގާ ޚަރަދުގެ ތަފްސީލެއް ހާމައެއް ނުކުރައްވައެެވެ.