އަނިޔާގެ ސަބަބުން މިވަގުތު ކުޅުމާ ދުރުގައި ހުރި ބްރެޒިލްގެ ތަރި ނޭމާ ޖޫނިއާ އަށް، އަންނަ އަހަރު އޮންނަ ދެކުނު އެމެރިކާ ސަރަހައްދުގެ ފުޓުބޯޅަ މުބާރާތުގައި (ކޮޕާ އެމެރިކާ) ނުކުޅެވޭނެކަން ކަށަވަރުވެއްޖެ އެވެ.

ނޭމާ އަށް އެންމެ ފަހުން އަނިޔާވީ ފީފާ ވޯލްޑް ކަޕް ކޮލިފިކޭޝަންގައި ބްރެޒިލުން އުރުގުއޭއާ ދެކޮޅަށް ކުޅުނު މެޗުގަ އެވެ. އެ އަނިޔާގެ ސަބަބުން ނޭމާ ވަނީ ވައަތު ފައިގެ ކަކޫ ލިގަމެންޓްގެ އޮޕަރޭޝަނެއް ކޮށްފަ އެވެ. އެ އޮޕަރޭޝަނަށް ފަހު ނޭމާ ހުރީ ކުޅުމާ ދުރުގަ އެވެ. އެހެންވެ، އޭނާ ކުޅެމުން އަންނަ ކުލަބުކަމަށްވާ ސައޫދީ ޕްރޯ ލީގުގެ އަލް ހިލާލްގެ މެޗުތައް ވެސް ނޭމާ އަށް ވަނީ ގެއްލިފަ އެވެ.

ބްރެޒިލްގެ ޑޮކްޓަރު ލަސްމާ ބުނީ، އަނިޔާ އިން ރަނގަޅުވުމަށް ނޭމާ އަށް އަޅާފައިވާ ފިޔަވަޅުތައް ދޫކޮށްލުމުގެ ބޭނުމެއް ނެތް ކަމަށެވެ. އޭނާ ބުނީ މިހާލަތަށް ބަލާއިރު، އެކަން ކުރަން އަދި މާ އަވަސް ކަމަށެވެ. އަނިޔާ އިން ރަނގަޅުވެ ނޭމާ އަށް އަލުން އަނބުރާ ކުޅުމުގެ ތެރެއަށް އާދެވޭނެ ދުވަހަކާ ގުޅޭ ގޮތުން އޭނާ ބުނީ، އުންމީދު ކުރެވޭ ގޮތުގައި އަންނަ އަހަރުގެ އޯގަސްޓު މަހުގެ ތެރޭގައި ކުޅެވޭ ވަރަށް އޭނާގެ އަނިޔާ ރަނގަޅުވާނެ އެވެ. އެ މުއްދަތަށް ބަލާއިރު، އަންނަ އަހަރުގެ ކޮޕާ އެމެރިކާ ފުޓުބޯޅަ މުބާރާތުގައި ނޭމާ އަށް ނުކުޅެވޭނެ އެވެ.

އެމެރިކާގައި އަންނަ އަހަރުގެ ކޮޕާާ އެމެރިކާ ފުޓުބޯޅަ މުބާރާތް ކުރިއަށް ދާނީ، ޖޫން މަހުގެ 20 ވަނަ ދުވަހުން، ޖުލައި މަހުގެ 24 ވަނަ ދުވަހަށެވެ. މިފަހުން ނޭމާގެ އަނިޔާގެ މައްސަލަތައް ވަނީ ބޮޑުވެފަ އެވެ. ސްޕެއިންގެ ބާސެލޯނާގައި ހުރުމަށްފަހު، ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އަށް ބަދަލުވި ފަހުން، އަނިޔާގެ ސަބަބުން ނޭމާ އަށް އެކަށީގެންވާ ކުޅުމެއް ވެސް ނުދެއްކެ އެވެ.