މަންމައަށް ހަމަލާދިނީ ނަފްސާނީ ބަލި ހުންނަ ދަރިއެއް: ފުލުހުން
އަނިޔާ ވެފައިވަނީ 51 އަހަރުގެ ދިވެހި އަންހެނަކަށް
ވެށިފަހި ފްލެޓުތަކެއް
ހުޅުމާލޭގައި މަންމައަކަށް ވަޅިން ހަމަލާދިން ދަރިއަކީ ނަފްސާނީ މައްސަލައެއް ހުންނަ މީހެއް ކަމަށް ދިވެހި ފުލުހުންގެ ޚިދުމަތުން ބުނެފިއެވެ.
ފުލުހުން ބުނީ ހުޅުމާލެ ފޭސް 1 ގެ ފްލެޓެއްގައި ފިރިހެނަކު ތޫނު އެއްޗެއް ބޭނުންކޮށްގެން އަންހެނަކަށް ހަމަލާދީފައިވާ މައްސަލައެއް ހޯމަ ދުވަހުގެ އިރުއޮއްސި 6:50 ހާއިރު ފުލުހުންނަށް ރިޕޯޓްކޮށްފައިވާކަމަށެވެ. އަނިޔާވެފައިވާ މީހާއަށް ހުޅުމާލެ ހޮސްޕިޓަލުގައި ފަރުވާދެމުން އަންނައިރު އޭނާގެ ހާލު ސީރިއަސް ކަމަށް ފުލުހުން ބުންޏެވެ.
މި މައްސަލައިގައި އަނިޔާ ލިބުނީ 51 އަހަރުގެ ދިވެހި އަންހެނަކަށް ކަމަށާއި ހަމަލާދީފައިވަނީ އާއިލީ މައްސަލައެއްގައި އެ އަންހެން މީހާގެ ދަރިފުޅު ކަމަށް މިހާތަނަށް ބެލިބެލުމުން އެނގިފައިވާކަމަށް ފުލުހުން ބުންޏެވެ.
ފުލުހުން ބނީ މި މައްސަލައިގައި ތުހުމަތު ކުރެވޭ މީހާއަކީ ނަފްސާނީ ބަލި ހުންނަ މީހެއް ކަމަށެވެ. އަދި އޭނާ ޑޮކްޓަރަށް ދެއްކުމުގެ މަސައްކަތް ކުރަމުންދާ ކަމަށް ފުލުހުން ބުންޏެވެ. އެ މީހާއާ ގުޅޭ އިތުރު މައުލޫމާތެެއް ފުލުހުން ހާމަކޮށްފައި ނުވެއެވެ.
މިމައްސަލަ ފުލުހުން އަންނަނީ ތަހުގީގުކުރަމުންނެވެ.
