މުއިއްޒުގެ ކެމްޕޭނަށް ބައިމިލިއަން ރުފިޔާ ޚަރަދު ކުރެއްވި ފާތިމަތު ތައުފީޤަށް އެމްއެމްޕީއާރްސީގެ އެމްޑީކަން
575،070 (ފަސްލައްކަ ހަތްދިހަ ފަސްހާސް ހަތްދިހަ) ރުފިޔާގެ ތަކެތި ފޯރުކޮށްދީފައިވޭ
އެމްއެމްޕީއާރުސީގެ މެނޭޖިން ޑިރެކްޓަރުގެ މަގާމަށް ފާތިމަތު ތައުފީޤު ވަނީ އައްޔަނު ކުރައްވާފައި
މޯލްޑިވްސް މާކެޓިން އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރުސީ) ގެ މެނޭޖިން ޑިރެކްޓަރުގެ މަގާމަށް ފާތިމަތު ތައުފީޤު އައްޔަނު ކުރައްވައިފިއެވެ.
އޭނާ އެ މަޤާމަށް އައްޔަނު ކުރެއްވުމުން އެމްއެމްޕީއާރްސީން ވަނީ މަރުޙަބާވެސް ކިޔާފައެވެ.
މީގެކުރިން އޭނާ އައްޔަން ކުރައްވާ ގޮތަށް އޮތީ އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން (އެސްޑީއެފްސީ) ގެ މެނޭޖިން ޑިރެކްޓަރަށްކަމަށް ބައެއް ނޫސްތަކުން ރިޕޯޓު ކޮށްފައިވެއެވެ.
ފާތިމަތު ތައުފީޤަކީ ނިމިދިޔަ ރިޔާސީ އިންތިޚާބުގައި މިހާރުގެ ރައީސް ޑރ މުޙައްމަދު މުއިއްޒުގެ ކެމްޕޭނަށްވެސް ޚަރަދު ކުރައްވާފައިވާ ފަރާތެކެވެ. އެގޮތުން މުއިއްޒުގެ މާލީ ބަޔާނުގައިވާ ގޮތުން ފާތިމަތު ތައުފީޤު ވަނީ ބައި މިލިއަނަށްވުރެ ގިނަ ރުފިޔާ މުއިއްޒުގެ ކެމްޕޭނަށް ޚަރަދު ކުރައްވާފައެވެ.
މުއިއްޒުގެ މާލީ ބަޔާނަށް ބަލާއިރު، ވަކިވަކި ފަރުދުންގެ ފަރާތުން ލިބިވަޑައިގެންނެވި ތަކެތީގެ ލިސްޓުގައި، ފާތިމަތު ތައުފީޤުވެސް 575،070 (ފަސްލައްކަ ހަތްދިހަ ފަސްހާސް ހަތްދިހަ) ރުފިޔާގެ ތަކެތި ފޯރުކޮށްދީފައިވާކަމަށް ބަޔާންކޮށްފައިވެއެވެ.
އޭގެ ތެރޭގައި ހިމެނެނީ ދަތުރާއި، ހުރުމާއި، ކެއުމާއި، އެހެނިހެން "މެޓީރިއަލްސް" ކަމަށްވެސް މާލީ ބަޔާނުގައި ފާހަގަކޮށްފައިވެއެވެ.
