މަސްތުވާތަކެއްޗާ ދެކޮޅަށް ކުރަމުންދާ މަސައްކަތުގެ ތެރެއިން ފަސް މިލިއަނަށް ވުރެ ގިނަ ރުފިޔާގެ މަސްތުވާތަކެތި އަތުލައިގަނެފިއެވެ.

ހޯމްލޭންޑު ސެކިއުރިޓީ މިނިސްޓަރު އަލީ އިހުސާން ކުރެއްވި ޓްވީޓެއްގައި ވިދާޅުވީ އެތަކެތި އަތުލައިގަނެފައި ވަނީ ފުލުހުންނާއި ކަސްޓަމްސް، އިމިގްރޭޝަން އަދި ކަރެކްޝަންސްގެ ގުޅިފައިވާ ޓާސްކްފޯސްއިން ކުރި މަސައްކަތުން ކަމަށެވެ.

އެ ޓާސްކްފޯސް އިން ހިންގި އޮޮޕަރޭޝަންގައި ފާއިތުވި ދެ ހަފްތާއެއްހާ ދުވަހުގެ ތެރޭގައި ޤާނޫނާއި ޚިލާފުވެގެން 53 ބިދޭސީއަކު ހައްޔަރުކޮށްފައިވާ ކަމަށް ވެސް އޭނާ ވިދާޅުވިއެވެ. އެހެންނަމަވެސް އަތުލައިގައި ބިދޭސީންނާއި ޑްރަގްގެ ކޭސް އާއި ގުޅުމެއް ނެތްކަމަށް އިހުސާންގެ ޕޯސްޓުން އެނގެއެވެ.

އެ އޮޕަރޭޝަންގެ އިތުރު ތަފްސީލްތައް އޭނާ ހާމައެއް ނުކުރައްވައެވެ.

އަދި މިހާތަނަށް އައި އިރު މަސްތުވާތަކެތި ހޯދާފައި ވަނީއެއް ތަނަކުންތޯ، އަދި އެތަކެތި ހޯދި ރަށާއި އެޑްރެސް އަދި އެތަކެއްޗަކީ އެކަކު އެތެރެކުރި އެއްޗެހިތޯ، ނުވަތަ ބަޔަކު ގުޅިގެން އެތެރެކުރި ތަކެތިތޯ ވެސް ސަރުކާރުގެ އިދާރާއަކުން ސާފުކޮށްދީފައެއް ނުވެއެވެ.