ބާސެލޯނާގެ ކުޅުންތެރިން ތިބީ ޒަވީ އާއެކު: ކަންސޭލޯ

ސްޕެއިންގެ ބާސެލޯނާގެ އެންމެހާ ކުޅުންތެރިން ތިބީ އެ ޓީމުގެ ކޯޗު ޒަވީ ހެނާންޑޭޒް އާއެކު ކަމަށް، އެ ޓީމަށް ކުޅެމުން އަންނަ ޕޯޗުގަލްގެ ޔާއޯ ކަންސޭލޯ ބުނެފި އެވެ.

ލޯނު އެއްބަސްވުމެއްގެ ދަށުން ބާސެލޯނާ އަށް ކުޅެމުން އަންނަ ކަންސޭލޯ މިހެން ބުނީ، ނަތީޖާ ނުނެރެވި ޒަވީ އަށް ޕްރެޝަރު ބޮޑުވަމުން އަންނަ ކަމަށް ސްޕެއިންގެ މީޑިއާ ތަކުގައި ދެކެވެމުން އަންނަ ވާހަކަތަކާ ގުޅިގެންނެވެ.

ކަންސޭލޯ ބުނީ، އޭނާ ހިމެނޭހެން ބާސެލޯނާގެ ހުރިހާ ކުޅުންތެރިން ތިބީ ޒަވީ އާއެކު ކަމަށެވެ. މީޑިއާ ތަކުން ކޮންމެ ވާހަކައެއް ދެއްކި ނަމަވެސް، އެ ޓީމުގެ ކުޅުންތެރިންގެ ފުރިހަމަ އިތުބާރު ޒަވީ އަށް އޮންނަ ކަމަށް އޭނާ ވަނީ ބުނެފަ އެެވެ. އަދި ޒަވީ އާއެކު ކުރިއަށް ގޮސް، ޒަވީ އަށް ދޭން ޖެހޭ އެންމެހާ ސަޕޯޓެއް ކުޅުންތެރިން ދޭނެ ކަމަށް ވެސް އޭނާ ވަނީ ބުނެފަ އެވެ.

މީގެ އިތުރުން ކަންސޭލޯ ބުނީ، ޒަވީ އަކީ ވަރަށް ރަނގަޅު ކޯޗެއް ކަމަށާއި، ބާސެލޯނާ އަށް ދެރައެއް ލިބެން އޭނާ ބޭނުންނުވާނެ ކަމަށެވެ. ޒަވީ އަކީ ބާސެލޯނާގެ ފުރިހަމަ ލެޖެންޑެއްކަން ފާހަގަކޮށް ކަންސޭލޯ ބުނީ، ނަތީޖާ ނުނެރެވޭތީ އަބަދު ވެސް ޒަވީ ކަންބޮޑުވާ ކަމަށެވެ. ކަންސޭލޯ ދެކޭ ގޮތުގައި އެކަން ރަނގަޅު ކުރެވޭނީ ބާސެލޯނާގެ ކުޅުންތެރިން އަދި ޒަވީ އެކުވެގެން ކުރެވޭ މަސައްކަތުންނެވެ. އޭނާ ފާހަގަ ކުރި ގޮތުގައި އަބަދު ވެސް ޒަވީ މަސައްކަތް ކުރަމުން އަންނަނީ ބާސެލޯނާ އަށް އެންމެ ރަނގަޅުވާނެ މަގުންނެވެ. އަދި ޒަވީ އާއެކު މަސައްކަތް ކުރުމުގެ އިތުރުން، ޒަވީގެ އިރުޝާދުގެ ދަށުން ކުޅުމުގެ ފުރުސަތު ލިބުމަކީ އުފަލެއް ކަމަށް ވެސް އޭނާ ވަނީ ބުނެފަ އެވެ.

ބާސެލޯނާގައި އޭނާގެ ކުޅުމާ ގުޅޭ ގޮތުން ކަންސޭލޯ ބުނީ، ބާސެލޯނާގައި އޭނާ ހުރީ ހިތްހަމަ ޖެހިގެން ކަމަށެވެ. މެންޗެސްޓަރ ސިޓީގައި ހުރުމަށްފަަހު ކަަންސޭލޯ ބާސެލޯނާ އަށް ބަދަލުވީ އެއް އަހަރުގެ ލޯނު އެއްބަަސްވުމެއްގެ ދަށުންނެެވެ. އެ އެއްބަސްވުން މި ސީޒަންގެ ނިޔަލަށް ހަމަވާއިރު، ބާސެލޯނާ އިން ދާއިމީ އެއްބަސްވުމެއްގެ ދަށުން އޭނާ ބަހައްޓަން ބޭނުންވާ ކަމަށް މީޑިއާ ރިޕޯޓުތައް ބުނެ އެވެ.