އަންނަ މަހު އޮންނަ ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ އިންތިޚާބުގައި ވާދަ ނުކުރެއްވުމަށް، އެ އެސޯސިއޭޝަންގެ މިހާރުގެ ރައީސް ބައްސާމް އަދީލް ޖަލީލް ނިންމަވައިފިއެވެ.
އެކަން ހާމަކުރައްވައި ބައްސާމް މީޑިއާތަކަށް ފޮނުއްވި ބަޔާނެއްގައި ވިދާޅުވީ، އެފްއޭއެމްގައި އެކިއެކި ހައިސިއްޔަތުން އެތަކެއް ކާމިޔާބީތަކާއި ނާކާމިޔާބީތަކާ، އޭނާއާއި އޭނާގެ ޓީމުން ކުރިމަތިލައްވާފައި ވާނެކަމަށެވެ.
ބައްސާމްގެ ބަޔާނުގައި ވަނީ އޭނާގެ ދައުރުގައި ކުރެވުނު ބައެއް ކާމިޔާބު މަސައްކަތްތައް ވެސް ފާހަގަކުރައްވާފައެވެ. އެގޮތުން ސަރަހައްދީ މުބާރާތްތަކުން ސީނިއަރ އަދި ޖޫނިއަރ ޓީމުތައް ރަނގަޅު ކާމިޔާބީތަކެއް ހޯދާފައިވާކަމަށް ވިދާޅުވެފައިވެއެވެ. ބައްސާމް ވިދާޅުވީ ފުޓުބޯޅައަށް ގިނަގުނަ ހެޔޮ ބަދަލުތަކެއް ގެނައުމަށްޓަކައި އެތަކެއް މަސައްކަތްތަކެއް ކުރައްވާފައިވާކަމަށާއި، އަދިވެސް ކުރަން ހުރި ކަންކަން ގިނަ ކަމަށެވެ.
މީގެ އިތުރުން ބައްސާމް ވިދާޅުވީ ދިވެހި ފުޓުބޯޅައަށް ފާގަތި ދުވަސްތަކެއް ހޯއްދަވައިދެއްވުމަކީ އޭނާގެ އުންމީދު ކަމަށެވެ. އެކަން ހާސިލްކުރެއްވުމަށް އޭނާވެސް ގިނަ މަސައްކަތްތަކެއް ކުރައްވާފައިވާކަން ފާހަގަކުރައްވައި ބައްސާމް ވިދާޅުވީ، ދިވެހި ފުޓުބޯޅަ އައު ޒައާމަތެއްގެ ގިޔާދަތުގެ ދަށުން ކުރިއަށްގެންދިޔުމުގެ ފުރުސަތު ދިނުމަކީ އެންމެ ރަނގަޅު ގޮތްކަމަށެވެ. އެހެންވެ، އަންނަ ޖަނަވަރީ މަހުގެ 31 ވަނަ ދުވަހު އޮންނަ އެފްއޭއެމްގެ އިންތިޚާބުގައި ވާދަ ނުކުރައްވަން ނިންމަވާފައިވާކަމަށް ބައްސާމް ވަނީ ވިދާޅުވެފައެވެ.
ބަޔާން ނިންމަވާލައްވަމުން ބައްސާމް ވިދާޅުވީ، މިނިވަން އިންސާފުވެރި އިންތިޚާބަކަށް ފުރުސަތު ދިނުމަކީ އޭނާގެ މަސްއޫލިއްޔަތެއް ކަމަށެވެ. އެހެންކަމުން އެފްއޭއެމްގެ އިންތިޚާބުގެ ކަންކަން، އިލެކްޓޯރަލް ކޮމެޓީގެ ބެލުމުގެދަށުން ކުރިއަށް ގެންދެވޭނެ ކަމަށާއި، އިދާރީ ހިންގުމުގެ ކަންކަން ނައިބު ރައީސާއި ޖެނަރަލް ސެކްރެޓަރީގެ ބެއްލެވުމުގެދަށުން ކުރިއަށްދާނެ ކަމަށް ވަނީ ވިދާޅުވެފައެވެ.
އެފްއޭއެމްގެ އިންތިޚާބުގައި ވާދަނުކުރެެއްވުމަށް ބައްސާމް ނިންމެވިއިރު، ބައްސާމް މިހާރު ހުންނެވީ ދެވަނަ ދައުރެއްގައެވެ. ބައްސާމްގެ ރައީސްކަމުގައި ދިވެހި ފުޓުބޯޅައިގެ ހާލަތު އިންތިހާއަށް ދަށަށް ގޮސްފައިވާއިރު، އެފްއޭއެމްގައި ކޮރަޕްޝަންގެ މައްސަލަތައްވެސް ވަނީ ބޮޑުވެފައެވެ. އެކަމާ ދެކޮޅަށް ޖިނާއީ ތަހުގީގެއް ފަށާފައިވާއިރު، އެ މައްސަލަ އޮތީ ދައުވާކުރާ ހިސާބުގައެވެ.
