ފައިލޭރިއާ ޖެހުނު މީހުންގެ ތެރެއިން 9 މީހަކަށް ހެދި އިތުރު ޓެސްޓުތަކުގެ ނަތީޖާ މާދަމާ ލިބޭނެ
15 ޑިސެމްބަރު 2023 | ހުކުރު 09:50ފައިލޭރިއާގެ ކޭސްތައް ފެނުނީ މި މަހުގެ 1 އަދި 2 ވަނަ ދުވަހު ކުޅުދުއްފުށީގައި ހިންގި ބިދޭސީ މަސައްކަތްތެރިންގެ ސްކްރީނިން ކޭމްޕުގެ ތެރޭގައި
ކުޅުދުއްފުށި ސިޓީ
ރާއްޖެއިން ނައްތާލެވިފައިވާ ފައިލޭރިޔާ ބަލިޖެހުނު 17 މީހުންގެ ތެރެއިން، ބަލި ދެނެގަތުމަށް ނުވަ މީހަކަށް ހެދި ޓެސްޓްތަކުގެ ނަތީޖާ މާދަމާ ލިބޭނެ ކަމަށް ކުޅުދުއްފުށި ސިޓީގެ ހޮސްޕިޓަލުން ބުނެފި އެވެ.
2016 ވަނަ އަހަރު ރާއްޖެއިން ނައްތާލެވިފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ނިންމި ފައިލޭރިއާ އަލުން ފެނިފައިވާ ކަމަށް އެޗްޕީއޭ އިން ރިޕޯޓުކޮށްފައިވަނީ މިދިޔަ ބުރާސްފަތި ދުވަހުގެ ރޭ އެވެ.
އެކަން އަންގައި އެ އިދާރާ އިން ނެރުނު ބަޔާނެއްގައި ބުނީ އެ ކޭސްތައް ފެނުނީ މި މަހުގެ 1 އަދި 2 ވަނަ ދުވަހު ކުޅުދުއްފުށީގައި ހިންގި ބިދޭސީ މަސައްކަތްތެރިންގެ ސްކްރީނިން ކޭމްޕުގެ ތެރޭގައި ޓެސްޓް ކުރެވުނު ބައެއް ބިދޭސީންގެ ފަރާތުން ކަމަށާއި، އެ މީހުންނަކީ ފައިލޭރިއާ މިހާރުވެސް ފެންނަމުންދާ ނުވަތަ އެންޑެމިކް ސަރަހައްދުތަކުން އައިސްފައިވާ މީހުން ކަމަށެވެ.
އެހެންކަމުން އެ ބިދޭސީން ސްކްރީން ކުރުމުގެ މަސައްކަތް ކުރުމަށް ކުޅުދުއްފުށީ ރީޖަނަލް ހޮސްޕިޓަލުން ކުރަމުން ދިޔަ ކަން އެ އިދާރާގެ ބަޔާނުގައި ފާހަގަ ކުރި އެވެ.
އެކަމުގެ މައުލޫމާތު ހޯދުމަށް އެ ސިޓީގެ ރީޖަނަލް ހޮސްޕިޓަލަށް ގުޅުމުން މީޑިޔާ އޮފިޝަލް މުޙައްމަދު މޫސާ ވިދާޅުވީ ބަލީގެ ޓެސްޓުން ޕޮޒިޓިވްވާ ފަރާތްތަކުގެ ބަލި ހުރިކަން ޔަގީން ކުރުމަށްޓަކައި އިތުރު ކޮންފަރމޭޓަރީ ޓެސްޓް ހެދުމުގެ މަސައްކަތްކުރި ގެންގޮސްފައިވާ ކަމަށެވެ.
އެގޮތުން ހުކުރު ދުވަހުގެ ރޭގެ ވަގުތެއްގައި 9 މީހަކަށް ހެދި ޓެސްޓްތަކުގެ ނަތީޖާ ލިބޭނީ ހޮނިހިރު ދުވަހު ކަމަށް އެ ހޮސްޕިޓަލުގެ ލެބުން އަންގާފައިވާ ކަމަށް އޭނަ ވިދާޅުވި އެވެ.
އެ ބަލި އެހެން ބައެއްގެ ފަރާތުން އަދި ފެނިފައިނުވާއިރު، އެހެން ބައެއްގެ ފަރާތުން ބައްޔަށް ޓެސްޓު ކުރުމުގެ މަސައްކަތް ކުރާނީ މިހާރު ހުރި ޓެސްޓްތަކުގެ ނަތީޖާތަކަށް ބެލުމަށްފަހުގައި ކަމަށް ވެސް މުޙައްމަދު ވިދާޅުވި އެވެ.
އަދި އެ ސިޓީގެ 17 މީހަކަށް ފައިލޭރިއާ ޖެހިފައިވާކަމަށް ވާއިރު، އެ ބިދޭސީންގެ ގައުމުގެ މައުލޫމާތު ފޯރުކޮށްދެވޭނީ ކޮންފާމެޓަރީ ޓެސްޓުތަކަށް ފަހުގައި ކަމަށް ވެސް މުޙައްމަދު ވިދާޅުވި އެވެ.
ފައިލޭރިއާ އަކީ މަދިރީގެ ޒަރިއްޔާ އިން ފެތުރޭ ބައްޔަކަށް ވުމުން، ބަލި ފެތުރުން ކޮންޓްރޯލް ކުރުމަށް އެޗްޕީއޭގެ ލަފާގެ މަތިން އެ ހޮސްޕިޓަލުން ދަނީ އާންމުންނަށް މައުލޫމާތު ފޯރުކޮށްދެމުންނެވެ. އެގޮތުން މަދިރި އާލާވާ ތަންތަން ނައްތާލުން ފަދަ މައުލޫމާތުތައް މިވަގުތަށް ދަނީ ފޯރުކޮށްދެމުންނެވެ.
ފައިލޭރިއާއަކީ ރާއްޖޭގެ ޕަބްލިކް ހެލްތު ނުރައްކަލެއް ނޫންކަމަށް ނިންމާ، ރާއްޖެއަކީ މި ސަރަހައްދުގައި ފައިލޭރިއާއިން ސަލާމަތްވެފައިވާ ފުރަތަމަ ގައުމުގެ ގޮތުގައި ދުނިޔޭގެ ސިއްހަތު ޖަމިއްޔާއިން ކަނޑައަޅާފައިވަނީ 2016 ވަނަ އަހަރެވެ.
